លោក Li Zhanshu ប្រធានសភាប្រជាជនចិន និងលោកស្រី Olga Sanchez Cordero ប្រធានព្រឹទ្ធសភាម៉ិកស៊ិក

កាលពីថ្ងៃអង្គារ ទី១៩ ខែមេសា ឆ្នាំ២០២២ លោក Li Zhanshu ប្រធានសភាប្រជាជនចិន បានពិភាក្សាជាមួយលោកស្រី Olga Sanchez Cordero ប្រធានព្រឹទ្ធសភានៃសហរដ្ឋម៉ិកស៊ិក តាមប្រព័ន្ធ        វីដេអូ។  លោក Li បានស្នើឱ្យពង្រឹងចំណងទាក់ទងទ្វេភាគីថែមទៀត។ លោកប្រធានសភាប្រជាជនចិនរូបនេះបានថ្លែងថា នៅចំពោះមុខនៃជំងឺរាតត្បាតជាសកលកូវីដ-១៩ ចិន និងម៉ិកស៊ិក បានគាំទ្រគ្នាទៅវិញ ទៅមក និងបានធ្វើឱ្យមិត្តភាពរបស់ពួកគេកាន់តែស៊ីជម្រៅ។ ចិនបានត្រៀមរួចរាល់ហើយ ដើម្បីធ្វើការជាមួយម៉ិកស៊ិក ក្នុងការអនុវត្តយ៉ាងសកម្មចំពោះការមូលមតិគ្នាដ៏សំខាន់របស់ប្រមុខរដ្ឋនៃប្រទេសទាំងពីរ និងលើកកម្ពស់ភាពជាដៃគូយុទ្ធសាស្រ្តគ្រប់ជ្រុងជ្រោយរវាង ចិន-ម៉ិកស៊ិក ឈានដល់កម្រិតថ្មីមួយ។

លោក Li Zhanshu យល់ថា គោលការណ៍ចិនតែមួយ គឺជាមូលដ្ឋានគ្រឹះដ៏រឹងមាំនៃចំណងមិត្តភាពចិន-ម៉ិកស៊ិក ហើយចិនសូមវាយតម្លៃខ្ពស់ចំពោះការប្រកាន់ខ្ជាប់នូវគោលជំហរមួយនេះជាយូរមកហើយរបស់ម៉ិកស៊ិក។ ក្នុងពេលដែលប្រទេសទាំងពីរ បានចែករំលែកផលប្រយោជន៍រួមគ្នា ចំពោះកិច្ចការអន្តរជាតិ ដូច្នឹងចិន-ម៉ិកស៊ិក គួរតែពង្រឹងកិច្ចសម្របសម្រួលពហុភាគី និងពង្រឹងទំនាក់ទំនងនៅឆាកអន្តរជាតិ និងពហុភាគី ដូចជា នៅអង្គការសហប្រជាជាតិ និងក្រុមប្រទេស G20 ជាដើម ព្រមទាំងការពារសច្ចភាព                   និងពហុភាគីនិយម។  គួរកត់សម្គាល់ថា ទាំងចិន  និងម៉ិកស៊ិក   គឺជាប្រទេសកំពុងអភិវឌ្ឍន៍ដ៏សំខាន់ ជាមួយនឹងឥទ្ធិពលដ៏សំខាន់ និងសក្តានុពលដ៏អស្ចារ្យសម្រាប់កិច្ចសហប្រតិបត្តិការ ដូច្នឹងភាគីទាំងពីរ គួរតែបន្តស្វែងរកផលប្រយោជន៍ទៅវិញទៅមក និងកិច្ចសហប្រតិបត្តិការជាក់ស្តែងឱ្យកាន់តែស៊ីជម្រៅថែមទៀត។

សម្រាប់ភាគីម៉ិកស៊ិក  លោកស្រីប្រធានព្រឹទ្ធសភា Olga Sanchez Cordero បានថ្លែងថា ម៉ិកស៊ិក ប្រកាន់ខ្ជាប់នូវគោលនយោបាយចិនតែមួយ និងបានថ្លែងអំណរគុណដល់ប្រទេសចិន ចំពោះការគាំទ្រ ដល់ម៉ិកស៊ិក ក្នុងការប្រយុទ្ធប្រឆាំងនឹងជំងឺរាតត្បាតជាសកលកូវីដ-១៩។  លោកស្រី Olga Sanchez  Cordero  បានថ្លែងបន្ថែមថា ព្រឹទ្ធសភាម៉ិកស៊ិក មានឆន្ទៈក្នុងការផ្លាស់ប្តូរមិត្តភាពទៅវិញទៅមកស៊ីជម្រៅជាមួយសភាប្រជាជនចិន(NPC) និងបង្កើតនូវការរួមចំណែកថ្មីមួយ ដើម្បីជំរុញកិច្ចសហប្រតិបត្តិការទ្វេភាគី ក្នុងវិស័យផ្សេងៗ ដូចជា សេដ្ឋកិច្ច ពាណិជ្ជកម្ម ការវិនិយោគ វប្បធម៌ និងការលើកកម្ពស់ការអភិវឌ្ឍភាពជាដៃគូយុទ្ធសាស្រ្តគ្រប់ជ្រុងជ្រោយរវាង ម៉ិកស៊ិក និងចិន៕

http://ព័ត៌មានសភាអន្តរជាតិ ២០-០៤-២២- ឈាវ សុផាត ប្រែសម្រួលពី៖ https://english.news.cn/20220419/1f8a05a73ba74209b9e013ea39e892b0/c.html