កិច្ចប្រជុំរបស់ក្រុមប្រឹក្សាសន្តិសុខនៃប្រទេសសូម៉ាលី នៅទីស្នាក់ការអង្គការសហប្រជាជាតិ ក្នុងទីក្រុងញូវយ៉ក

អង្គការសហប្រជាជាតិ (UN) ​ស្វាគមន៍ចំពោះ​ការ​ស្បថ​ចូល​កាន់​តំណែង​របស់​សមាជិកសភា​ដែល ​ទើប​ជាប់​ឆ្នោត​ថ្មី​នៃសភាទាំងពីររបស់សាធារណរដ្ឋសហព័ន្ធសូម៉ាលី គឺ​សភា​ប្រជាជន​សូម៉ាលី (សភាជាន់ ទាប) និង​សភា​ជាន់​ខ្ពស់ ។

​លោក Stephane Dujarric ដែលជាអ្នក​នាំពាក្យរបស់លោក Antonio Guterres​អគ្គលេខាធិការ​អង្គការ​សហប្រជាជាតិបានមានប្រសាសន៍ប្រាប់សារព័ត៌មានប្រចាំថ្ងៃថា “យើងរួមជាមួយនឹងដៃគូរបស់យើង ថ្កោលទោសយ៉ាងខ្លាំងចំពោះការវាយប្រហារដោយកាំភ្លើងត្បាល់ដែលត្រូវបានអះអាងថាជាសកម្មភាព របស់ក្រុម al-Shabaab នៅមុនថ្ងៃ (ថ្ងៃព្រហស្បតិ៍ ទី១៤ ខែមេសា ឆ្នាំ២០២២ ) នៅជិតទីតាំងនៃការស្បថចូលកាន់តំណែង” ។ លោក Dujarric បានមានប្រសាសន៍ថា អង្គការសហប្រជាជាតិទន្ទឹងរង់ចាំការ បញ្ចប់ យ៉ាងឆាប់រហ័សនៃដំណាក់កាលដែលនៅសល់នៃដំណើរការបោះឆ្នោត ជាពិសេសការបោះឆ្នោតជ្រើសតាំង ថ្នាក់ដឹកនាំសភា និងបន្ទាប់មកប្រមុខរដ្ឋ ។ លោក Adam Abdelmoula អ្នកសម្របសម្រួលក្នុងស្រុក និងកិច្ចការមនុស្សធម៌សម្រាប់ប្រទេសសូម៉ាលីបានមានប្រសាសន៍ថា ប្រទេសនេះប្រឈមនឹង “ហានិភ័យនៃគ្រោះអត់ឃ្លាន” ដោយសារគ្រោះរាំងស្ងួតដែលមិនធ្លាប់មានពីមុនមក ។ លោកបានមានប្រសាសន៍ទៀតថា ជិតពាក់កណ្តាលនៃចំនួនប្រជាជន ៧.៧លាននាក់ ត្រូវការជំនួយមនុស្សធម៌ និងការការពារនៅឆ្នាំនេះ ។ ក្នុង​នោះ​មនុស្ស ​៦​លាន​នាក់ ​ត្រូវ​ការ​ជំនួយ​ស្បៀង​អាហារ​ជា​បន្ទាន់ ។

លោក Abdelmoula បានមានប្រសាសន៍ថា វិបត្តិទាំងបួននៃអំពើភេរវកម្ម ភាពឯកជន ការធ្វើចំណាកស្រុកទ្រង់ទ្រាយធំ និងការអត់ឃ្លាននឹងត្រលប់មកវិញនៅក្នុងប្រទេសនេះប្រសិនបើគ្មានការយកចិត្តទុកដាក់គ្រប់គ្រាន់ ។ លោក​ក៏បាន​ព្រមាន​ថា អ្វីៗ​នឹង​មិន​ប្រសើរ​ឡើង​វិញ​ក្នុង​ពេល​ឆាប់ៗ​នេះ​ទេ ដោយ សារ​កត្តា​ជំរុញ​ចម្បង ​គឺ​ការ​ប្រែប្រួល​អាកាសធាតុ ៕

http://ព័ត៌មានសភាអន្តរជាតិ ១៨-០៤-២២-ផាត់ ត្រដែត ប្រែសម្រួលពី៖ https://english.news.cn/20220415/78877733720b4127967ce3c9611a4b61/c.html