សភាជាន់ទាបនៃសាធារណរដ្ឋឆែក បានផ្តល់សច្ចាប័នលើកិច្ចព្រមព្រៀងវិស័យការពារជាតិរវាងសាធារណរដ្ឋឆែក និងសហរដ្ឋអាម៉េរិក។ កិច្ចព្រមព្រៀងមួយនេះដែលទទួលបានការផ្តល់សច្ចាប័នពីព្រឹទ្ធ សភារួចកាលពីសប្តាហ៍មុននោះ ពេលនេះនៅសល់តែការរង់ចាំការចុះហត្ថលេខាពីលោក President Petr Pavel ប្រធានាធិបតីឆែក ដើម្បីផ្តល់សច្ចាប័នជាផ្លូវការ។
ការពិភាក្សាដេញដោលសភាជុំវិញកិច្ចព្រមព្រៀងបានធ្វើឡើងរយៈពេល ៤ម៉ោង និង៣០នាទី។ សមាជិកសភាស្តាំនិយម មកពីគណបក្សសេរីភាពនិងប្រជាធិបតេយ្យដោយផ្ទាល់ (SPD) បានរិះគន់កិច្ចព្រមព្រៀង និងលើកឡើងពីក្តីបារម្ភពីផលប៉ះពាល់ធ្ងន់ធ្ងរដល់អធិបតេយ្យភាពជាតិ។ បើទោះបីជាមានការជំទាស់ក៏ដោយ ក៏កិច្ចព្រមព្រៀងខាងលើទទួលបានការគាំទ្រក្នុងសំឡេងភាគច្រើន ១១៥សំឡេង នៃ១៤៤សំឡេង ដែលមានវត្តមាន សមាជិកសភាបានបោះឆ្នោតគាំទ្រលើការផ្តល់សច្ចាប័ន។ កិច្ចព្រមព្រៀងនេះទទួលបានការគាំទ្រពីតំណាងគណបក្សចំនួន ៥ ដែលគាំទ្ររដ្ឋាភិបាល និងសមាជិកសភាភាគច្រើនមកពីគណបក្សប្រឆាំង គឺគណបក្ស ANO ប៉ុន្តែយ៉ាងណាក៏ដោយសមាជិកសភាគណបក្ស SPD ១៤រូប និង៤រូប មកពីគណបក្ស ANO បានបោះឆ្នោតជំទាស់នឹងកិច្ចព្រមព្រៀង។
លោកស្រី Jana Černochová រដ្ឋមន្រ្តីក្រសួងការពារជាតិឆែកបានសង្កត់ធ្ងន់ថា សារៈសំខាន់នៃកិច្ចព្រមព្រៀងបានចែងថា សហរដ្ឋអាម៉េរិកនឹងផ្តល់ដល់សាធារណរដ្ឋឆែក នូវការធានាសន្តិសុខបន្ថែម ជាពិសេស ស្ថានភាពសន្តិសុខបច្ចុប្បន្ននៅចំពេលដែលយោធាសហព័ន្ធរុស្ស៊ីបានចូលឈ្លានពានអ៊ុយក្រែន។ លោកស្រី Jana បានគូសបញ្ជាក់ពីភាពចាំបាច់នៃសម្ព័ន្ធភាពដ៏ខ្លាំងក្លាមួយជាមួយបណ្តាប្រទេសប្រជាធិបតេយ្យនៅក្នុងកាលៈទេសៈដ៏វឹកវរទាំងនេះ។ ឯកសារប្រមាណ ៤០ទំព័រ គ្របដណ្តប់លើទិដ្ឋភាពផ្សេងៗពាក់ព័ន្ធនឹងសក្តានុពលនៃវត្តមានកងទ័ពសហរដ្ឋអាម៉េរិកនៅក្នុងប្រទេសឆែក និងកិច្ចសហប្រតិបត្តិការរវាងកងទ័ពអាម៉េរិក និងកងទ័ពឆែកនៅលើទឹកដីឆែក។
