សភាអ៊ីរ៉ង់អនុម័តយល់ព្រមលើសេចក្តីព្រាងច្បាប់ស្តីពី ការបង្កើតក្រសួងពាណិជ្ជកម្ម
រដ្ឋធានីតេហេរ៉ង់៖ កាលពីថ្ងៃអាទិត្យ ទី១៦ ខែកក្កដា ឆ្នាំ២០២៣ សភានៃសាធារណរដ្ឋឥស្លាមអ៊ីរ៉ង់ បានអនុម័តយល់ព្រមលើសេចក្តីព្រាងច្បាប់ស្តីពី ការបង្កើតក្រសួងពាណិជ្ជកម្មដាច់ដោយឡែកជាងមួយទសវត្សរ៍ បន្ទាប់ពីប្រទេសនេះ បានសម្រេចធ្វើសមាហរណកម្មលើសកម្មភាពឧស្សាហកម្ម និងពាណិជ្ជកម្មរបស់ខ្លួនក្នុងក្រសួងតែមួយរបស់រដ្ឋ។
ក្នុងអំឡុងពេលបើកសម័យប្រជុំ កាលពីថ្ងៃអាទិត្យ ទី១៦ ខែកក្កដា ឆ្នាំ២០២៣ សមាជិកសភាអ៊ីរ៉ង់ បានអនុម័តយល់ព្រមលើសេចក្តីព្រាងច្បាប់មួយ ដែលត្រូវបានដាក់ស្នើភ្ជាប់ជាមួយក្រឹត្យបន្ទាន់ ២ ស្តីពី ការបង្កើតក្រសួងពាណិជ្ជកម្មនេះ។ ក្នុងចំណោមសមាជិកសភា ២៣៨ រូប ដែលមានវត្តមានក្នុងសម័យប្រជុំបោះឆ្នោតនោះ សមាជិកសភាប្រហែល ១២៩ រូប បានបោះឆ្នោតគាំទ្រសេចក្តីព្រាងច្បាប់នេះ និង ១០១ រូប បោះឆ្នោតជំទាស់ និង ៤ រូប ទៀត អនុបវាទ។
ក្រសួងឧស្សាហកម្ម រ៉ែ និងពាណិជ្ជកម្ម មានភារកិច្ចទទួលខុសត្រូវលើទំនាក់ទំនងពាណិជ្ជកម្មរបស់អ៊ីរ៉ង់ ជាមួយប្រទេសនានា នៅលើពិភពលោក ចាប់តាំងពីឆ្នាំ២០១១ ពេលដែលប្រទេសនេះ បានរំលាយអតីតក្រសួងពាណិជ្ជកម្មរបស់ខ្លួនមក។ ទូរទស្សន៍ Press TV បានរាយការណ៍ថា ទោះបីជាយ៉ាងនេះក្តី ក្រុមអ្នករិះគន់ការបំបែកក្រសួងនេះ បានជជែកគ្នាអស់រយៈពេលជាច្រើនឆ្នាំ ដែលថាការសម្រេចនេះ បាននាំឱ្យមានបញ្ហាជាច្រើនក្នុងសកម្មភាពពាណិជ្ជកម្មរបស់អ៊ីរ៉ង់ ជាពិសេស ពាក់ព័ន្ធនឹងទំនិញចាំបាច់មួយចំនួន។
សមាជិកសភា ១ រូប ដែលគាំទ្រសេចក្តីព្រាងច្បាប់ស្តីពី ការបង្កើតក្រសួងពាណិជ្ជកម្មនេះ បានថ្លែងថា អ៊ីរ៉ង់ បានកំពុងចំណាយថវិកាមិនប្រក្រតីលើការនាំចូលជាក់ស្តែង ដោយសារខ្វះការសម្របស្រួល រវាងក្រសួងឧស្សាហកម្ម និងក្រសួងកសិកម្ម ដែលមានភារកិច្ចទទួលខុសត្រូវលើការនាំចូលគ្រាប់ធញ្ញជាតិ និងចំណីសត្វ។
«ការពិតដែលថា យើងចំណាយថវិកា ៦.៩ ពាន់លានដុល្លារសហរដ្ឋអាមេរិកសម្រាប់ការនាំចូលទំនិញពីប្រទេសតួកគីនោះ គឺដោយសារយើងគ្មានក្រសួងពាណិជ្ជកម្ម» ការថ្លែងរបស់លោក Fathollah Tavassoli នេះ បានធ្វើឡើង ខណៈពេលដែលលោកបានលើកឡើងអំពីការនាំចូលទំនិញរបស់អ៊ីរ៉ង់ពីប្រទេសតួកគី រយៈពេលពេញ ១ ឆ្នាំ រហូតដល់ចុងខែមីនា ឆ្នាំ២០២៣។
ទោះបីជាយ៉ាងនេះក្តី ក្រុមអ្នករិះគន់សេចក្តីព្រាងច្បាប់នេះ បានអះអាងក្នុងកិច្ចប្រជុំពិភាក្សាក្នុងសភា កាលពីពីថ្ងៃសៅរិ៍ ទី១៥ ខែកក្កដា ឆ្នាំ២០២៣ ថា ការបង្កើតក្រសួងពាណិជ្ជកម្មដាច់ដោយឡែកនេះ គ្រាន់តែជាការដឹកនាំឆ្ពោះទៅរកការបង្កើនការនាំចូលកាន់តែច្រើនរបស់អ៊ីរ៉ង់ និងជួយដល់ផែនការជំរុញការនាំចេញទំនិញពីប្រទេសតួកគី តែប៉ុណ្ណោះ…៕
http://ព័ត៌មានសភាទ្វីបអាស៊ី ១៨-០៧-២៣-កែវ ធាវី ប្រែសម្រួលពី៖ https://www.tasnimnews.com/en/news/2023/07/17/2926856/iran-s-parliament-approves-bill-to-set-up-commerce-ministry
