លោកស្រី Natalya Kochanova ប្រធានសភាជាន់ខ្ពស់នៃសាធារណរដ្ឋបេឡារុស

រដ្ឋធានីមីនស្ក៍៖ ក្នុងអំឡុងពេលនៃជំនួបពិភាក្សាការងារជាមួយលោក Ermek Ibraimov ឯកអគ្គរដ្ឋ ទូតវិសាមញ្ញ និងពេញសមត្ថភាពនៃសាធារណរដ្ឋកៀហ្ស៊ីស៊ីស្ថាន​ប្រចាំសាធារណរដ្ឋបេឡារុស លោកស្រី Natalya Kochanova ប្រធានក្រុមប្រឹក្សានៃសាធារណរដ្ឋ(សភាជាន់ខ្ពស់បេឡារុស)បានថ្លែងថា កិច្ចសហប្រតិបត្តិការអន្តរសភា​រវាងបេឡារុស  និងកៀហ្ស៊ីស៊ីស្ថាន​​កំពុងឈានទៅជាព្រឹត្តិការណ៍ដ៏សំខាន់ថ្មីមួយ។

លោកស្រី Kochanova បានថ្លែងថា “កិច្ចសហប្រតិបត្តិការអន្តរសភារបស់យើង កំពុងឈានទៅដល់កម្រិតថ្មីមួយ។ នេះគឺជាក្តីសោមនស្សរីករាយបំផុតយើងកំពុងតែ​ទន្ទឹង​រង់ចាំដំណើរទស្សនកិច្ចរបស់សហសេវិករបស់យើងនៅដើមខែតុលាខាងមុខនេះ”។ យើងទទួលបានការបញ្ជាក់រួចហើយថា ដំណើរ ទស្សនកិច្ចផ្លូវការរបស់​គណៈប្រតិភូ​សភាកៀហ្ស៊ីស៊ីស្ថាននឹងដឹកនាំដោយលោកប្រធានសភា។ យើងគ្រោងចូលរួមក្នុងកិច្ចប្រជុំរបស់ក្រុមប្រឹក្សាសន្និបាតអន្តរសភាអង្គការបណ្តារដ្ឋឯករាជ្យខំមិនវែល(CIS-IPA) ដែលនឹងធ្វើឡើងនៅក្នុងរដ្ឋធានីប៊ីស្កេក នៃសាធារណរដ្ឋកៀហ្ស៊ីស៊ីស្ថាន ថ្ងៃទី១៦-១៧ខែវិច្ឆិកា ឆ្នាំ២០២៣។

លោកស្រីប្រធានសភាជាន់ខ្ពស់បេឡារុសរូបនេះបានសង្កត់ធ្ងន់ថា ក្នុងកាលៈទេសៈបច្ចុប្បន្ននេះ បេឡារុស និងកៀហ្ស៊ីស្ថានចាំបាច់ត្រូវរួមគ្នាជាធ្លុងមួយជាងពេល​ណាៗ​ទាំងអស់។ “នេះគឺពិតជាមានសារៈសំខាន់ខ្លាំងណាស់សម្រាប់យើង ហើយលោកប្រធានាធិបតីនៃប្រទេសយើងបានថ្លែងបែបនេះលើសពីម្តង ពាក់ព័ន្ធទៅនឹងស្ថានភាព​វិវត្តន៍​នៅក្នុងប្រទេសអ៊ុយក្រែន និងនៅជុំវិញប្រទេសរបស់យើង”។ ភាពវក់វីក្នុងពេលដែលប្លុកអង្គការណាតូកំពុងតែពង្រីកកម្លាំងយោធារបស់ខ្លួន វាពិតជាសំខាន់ខ្លាំងណាស់​សម្រាប់ យើងដែលត្រូវតែរួបរួមគ្នាដើម្បីការពារផលប្រយោជន៍របស់យើង ផលប្រយោជន៍ប្រទេសរបស់យើង ព្រោះ ការជ្រៀតជ្រែកចូលក្នុងកិច្ចការផ្ទៃក្នុង​របស់ប្រទេស​ដទៃគឺមិនអាចទទួលយកបានឡើយ។ យើងប្រកាន់ខ្ជាប់នូវគោលនយោបាយសន្តិវិធី។

លោកស្រី Kochanova បានថ្លែងបន្ថែមថា “អន្តរកម្មរបស់យើង នៅក្នុងសមាហរណកម្មរចនាសម្ព័ន្ធ ដូចជា សន្និបាតអន្តរសភាអង្គការបណ្តារដ្ឋឯករាជ្យខំមិនវែល  CIS-IPA  និងសន្និបាតសភាអង្គការសន្ធិសញ្ញាសន្តិសុខសមូហភាព CSTO-PA គឺសំខាន់ខ្លាំងណាស់”។ យើងសូមវាយតម្លៃខ្ពស់ចំពោះការគាំទ្ររបស់កៀហ្ស៊ីស៊ីស្ថាន យើងចង់ក្លាយជា​សមាជិកពេញសិទ្ធិអង្គការកិច្ចសហប្រតិបត្តិការសៀងហៃ SCO ហើយក៏សង្ឃឹមថារឿងនេះនឹងកើតមានឡើងក្នុងពេលអនាគតឆាប់ៗនេះ៕

http://ព័ត៌មានសភាទ្វីបអឺរ៉ុប ១៣-០៧-២៣- ឈាវ សុផាត ប្រែសម្រួលពី៖ https://eng.belta.by/politics/view/kochanova-belarus-kyrgyzstan-inter-parliamentary-contacts-are-reaching-a-new-level-160219-2023/