លោក Wan Muhamad Noor Matha ប្រធានសភាតំណាងរាស្ត្រថៃ

រាជធានីបាងកក៖ លោក Wan Muhamad Noor Matha ប្រធានសភាតំណាងរាស្ត្រនៃ​ព្រះរាជាណាចក្រថៃ បានកំណត់យកថ្ងៃទី១៣ ខែកក្កដា ឆ្នាំ២០២៣ ជាថ្ងៃបោះឆ្នោត​ជ្រើសតាំងនាយករដ្ឋមន្ត្រីថៃទី៣០។ ទោះបីជា ប្រធានសភាតំណាងរាស្ត្រថ្មីរូបនេះ បានថ្លែងយ៉ាងដូច្នេះក៏ដោយ ក៏លោកមិនអាចប្រាប់បានថា​​ គេនឹងត្រូវបោះឆ្នោតនេះ ប៉ុន្មាន​ដងឡើយ ប្រសិនបើប្រធានគណបក្សចលនាឆ្ពោះ  ទៅមុខ (Move Forward) និងលោក Pita Limjaroenrat បេក្ខជននាយករដ្ឋមន្ត្រីថ្មីមិនទទួលបានសំឡេងគ្រប់ ៣៧៦ តាមតម្រូវការនៅក្នុងការប៉ុនប៉ងលើកទី១។

លោក Wan Noor ដែលបានជាប់ឆ្នោតជាប្រធានសភាតំណាងរាស្ត្រ កាលពីថ្ងៃអង្គារ ទី០៦​ ខែកក្កដា ឆ្នាំ២០២៣ បានថ្លែងប្រាប់អ្នករាយការណ៍ព័ត៌មានជាបន្តបន្ទាប់ អំពីការត្រៀមរៀបចំបើកសម័យប្រជុំបោះឆ្នោតជ្រើសតាំងនាយករដ្ឋមន្ត្រីថ្មីនេះ។ លោក Wan Noor បានថ្លែងថា លោកបានរាយការណ៍ទៅការិយាល័យសភារួចហើយ កាលពីថ្ងៃពុធ ទី០៥ ខែកក្កដា ឆ្នាំ២០២៣ ដើម្បីបើកកិច្ចប្រជុំពិភាក្សាជាមួយលោក Pornpit Phetcharoen អគ្គលេខាធិការសភាតំណាងរាស្ត្រអំពីភារកិច្ចរបស់​លោកជា​ប្រធានសភាតំណាងរាស្ត្រ និងត្រៀមរៀបចំបើកកិច្ចប្រជុំសភានៅថ្ងៃខាងមុខ។ លោក Wan Noor បានថ្លែងថា លោករំពឹងថា នឹងមានព្រះរាជបញ្ជាតែងតាំងលោកជាផ្លូវការ ជាប្រធានសភាតំណាងរាស្ត្រ រួមទាំងប្រធានព្រឹទ្ធសភាផងដែរ ក្នុងរយៈពេល ២ ឬ៣ ថ្ងៃខាងមុខទៀត។ លោក Wan Noor បានថ្លែងថា នៅថ្ងៃទី១២​ ខែកក្កដា ឆ្នាំ២០២៣ ខាងមុខនេះ លោកនឹងអំពាវនាវឱ្យមានកិច្ចប្រជុំមួយសម្រាប់សមាជិកសភាដើម្បីពិនិត្យពិភាក្សា និងបោះឆ្នោត ថាតើសភាតំណាងរាស្ត្រគួរតែបើកកិច្ចប្រជុំ ២ ឬ៣ លើកក្នុង​មួយសប្តាហ៍ ឬយ៉ាងណា។

លោក Wan Noor បានថ្លែងទៀតថា លោកបានពិភាក្សាជាមួយលោក Pornpetch Wichitcholchai ប្រធានព្រឹទ្ធសភារួចហើយ អំពីការបោះឆ្នោតជ្រើសតាំងនាយករដ្ឋ​មន្ត្រីថ្មីនេះ ហើយថា​ ថ្នាក់ដឹកនាំសភាទាំងពីរ បានព្រមព្រៀងគ្នារួចហើយ ដើម្បីបើកកិច្ចប្រជុំរួមមួយ នៅវេលាព្រឹកម៉ោង ៩.៣០ ថ្ងៃទី១៣ ខែកក្កដា ឆ្នាំ២០២៣ ដើម្បី​ជ្រើស​តាំង​នាយករដ្ឋមន្ត្រីថ្មី។ ទន្ទឹមពេលជាមួយគ្នានេះ ប្រធានសភាតំណាងរាស្ត្ររូបនេះ បានអះអាងថា ខ្លួនអាចប្រាដកជាធ្វើបាន ខណៈដែលលោក Pita មិនទទួលបាន​សំឡេង​គ្រប់ ៣៧៦ ដែលតម្រូវក្នុងសម័យប្រជុំបោះឆ្នោតជ្រើសតាំងនាយករដ្ឋមន្ត្រីនោះ…៕

http://ព័ត៌មានសភាទ្វីបអាស៊ី ០៧-០៧-២៣-កែវ ធាវីប្រែសម្រួលពី៖ https://asianews.network/thai-parliament-to-vote-for-prime-minister-on-july-13/