សភាថៃបើកសម័យប្រជុំដំបូង បន្ទាប់ពីការបោះឆ្នោតជ្រើសតាំងតំណាងរាស្ត្រ

ដើម្បីចាប់ផ្តើមដំណើរការនីតិវិធីជ្រើសតាំងនាយករដ្ឋមន្ត្រីថ្មី

Bloomberg News៖ សភានៃព្រះរាជាណាចក្រថៃ បានបើកសម័យប្រជុំដំបូងរបស់ខ្លួន បន្ទាប់ពីការបោះឆ្នោតជ្រើសតាំងតំណាងរាស្ត្រ កាលពី​ខែឧសភា ឆ្នាំ២០២៣ ដើម្បីចាប់ផ្តើមដំណើរការនីតិវិធីបង្កើតរាជរដ្ឋាភិបាលថ្មី​មួយ ដោយសម្ព័ន្ធភាពគណបក្សនយោបាយគាំទ្រលទ្ធិប្រជា​ធិប​តេយ្យ ដែលកំពុងស្វែងរកការបញ្ចប់ស្ទើរតែមួយទស្សវត្សន៍នៃរបបដឹកនាំគាំទ្រដោយក្រុមយោធា និងរាជានិយម។

កាលពីថ្ងៃចន្ទ ទី០៣ ខែកក្កដា ឆ្នាំ២០២៣ សមាជិកសភាតំណាងរាស្ត្រថៃថ្មី ៥០០​ រូប បានបើកសម័យប្រជុំក្នុងសភា នៅវេលាម៉ោង ៥៖០០ រសៀល ក្នុងរាជធានីបាងកក។ សម្តេចព្រះបាទ Maha Vajiralongkorn  ព្រះមហាក្សត្រថៃ បានថ្លែងព្រះរាជសុន្ទរកថានៅក្នុងសម័យប្រជុំនោះ ដែលមានការចូលរួមពីសមាជិកព្រឹទ្ធសភាតែងតាំងដោយក្រុមយោធា និងឥស្សរជនសំខាន់ៗជាច្រើនរូបទៀត។ នេះបើយោងតាមការឱ្យដឹងពីមន្ត្រីរាជរដ្ឋាភិបាលមួយចំនួន។

សភាតំណាងរាស្ត្រថៃ បានបោះឆ្នោតជ្រើសរើសប្រធាន និងអនុប្រធាន ២ រូប របស់ខ្លួន នៅថ្ងៃទី០៤ ខែកក្កដា ឆ្នាំ២០២៣ នេះ ជាមួយនឹង​លោក Pita Limjaroenrat ប្រធានគណបក្សចលនាឆ្ពោះទៅមុខ (Move Forward) ដែលបាននិយាយ កាលពីថ្ងៃអាទិត្យ ទី០២ ខែកក្កដា ឆ្នាំ២០២៣ ថា     គណបក្សរបស់លោក នឹងឈានដល់កិច្ចព្រមព្រៀងមួយស្តីពី ថ្នាក់ដឹកនាំសភានេះ ជាមួយគណបក្ស Pheu Thai នៅមុនការ​បោះឆ្នោត។ គណបក្ស Pheu Thai ដែលជាគណបក្សពាក់ព័ន្ធនឹងលោក Thaksin Shinawatra បានបង្ហាញជាសាធារណៈពីបំណងរបស់ខ្លួនចំពោះ​តំណែងប្រធានសភានេះ។

នៅថ្ងៃអង្គារ​ ទី០៤ ខែកក្កដា ឆ្នាំ២០២៣ នេះ លោក Wan Muhamad Noor Matha​ ប្រធាគណបក្ស Prachachat ត្រូវបានជ្រើសតាំងជា​ប្រធាន​សភាតំណាងរាស្ត្រថ្មី ខណៈលោកជាបេក្ខជនតែ ១ រូបគត់ សម្រាប់តំណែងនេះ។ នេះបើយោងតាមការចេញផ្សាយរបស់សារព័ត៌មាន Bangkok Post នៅថ្ងៃអង្គារ ទី៤ ខែកក្កដា ឆ្នាំ២០២៣ នេះ។

ការជ្រើសតាំងលោក Wan Muhamad នេះ ធ្វើឡើង បន្ទាប់ពីគណបក្សចលនាឆ្ពោះទៅមុខ និងគណបក្ស Pheu Thai បានប្រកាសពីការឈានដល់​កិច្ចព្រមព្រៀងមួយស្តីពី ការជ្រើសតាំងអ្នកនយោបាយ ជើងចាស់រូបនេះឱ្យចូលកាន់តំណែងជាប្រធានសភាតំណាងរាស្ត្រកាលពីយប់ថ្ងៃចន្ទ ទី៣ ខែកក្កដា  ឆ្នាំ២០២៣។ លោក Wan Muhamad ដែលមានវ័យ ៧៩ ឆ្នាំ រូបនេះ បានថ្លែងសារភា្លមៗ ក្រោយពីការប្រកាសតែងតាំងរបស់លោក អំពីចក្ខុវិស័យរបស់លោក ដែលប្រកាន់យកភាពអព្យាក្រឹត ដង្ហែតាមព្រះរាជតម្រិះរបស់ព្រះមហាក្សត្រ ដែលព្រះអង្គបានថ្លែង​ក្នុងពិធីបើកសម័យ​ប្រជុំដំបូង កាលពីថ្ងៃចន្ទ ទី០៣ ខែកក្កដា ឆ្នាំ២០២៣។

គួរបញ្ជាក់ផងដែរថា នៅថ្ងៃអង្គារ ទី០៤ ខែកក្កដា ឆ្នាំ២០២៣ នេះ សភាតំណាងរាស្ត្រថៃ បាន បោះឆ្នោតជាសម្ងាត់ ដើម្បីជ្រើសរើសអនុប្រធាន​របស់ខ្លួន ២ រូប ដោយអនុប្រធានទី១ គឺជាសមាជិកសភាមកពីគណបក្សចលនាឆ្ពោះទៅមុខ និងអនុប្រធានទី ២ មកពីគណបក្ស Pheu Thai ដោយអនុលោមតាមកិច្ចព្រមព្រៀងរបស់គណបក្សនយោបាយទាំង ២។ លោក Wan Muhamad ត្រូវបានតែងតាំងជាប្រធានសភាតំណាង​រាស្ត្រ​ដោយស្វ័យប្រវត្តិ ដោយសារលោកជាបេក្ខជនតែ ១ រូបគត់…៕

http://ព័ត៌មានសភាទ្វីបអាស៊ី ០៤-០៧-២៣-កែវ ធាវី ប្រែសម្រួលពី៖ https://ca.movies.yahoo.com/thai-parliament-convenes-election-kick-015158069.html