ពលរដ្ឋម៉ុងតេណេហ្គ្រោបោះឆ្នោតជ្រើសតាំងសមាជិកសភា នាថ្ងៃអាទិត្យ ទី១១ ខែមិថុនា ឆ្នាំ២០២៣

ពលរដ្ឋម៉ុងតេណេហ្រ្គោបានឆ្ពោះទៅកាន់ស្ថានីយបោះឆ្នោតកាលពីថ្ងៃអាទិត្យ ទី១១ ខែមិថុនា ឆ្នាំ២០២៣ ដើម្បីជ្រើសតាំងសមាជិកសភានីតិកាលថ្មីមុនកាលកំណត់។ អ្នកចុះឈ្មោះបោះឆ្នោតជាង ៥៤២, ០០០នាក់ បានធ្វើការសម្រេចចិត្តលើសមាជិកសភា ៨១រូប នៅក្នុងការបោះឆ្នោតសកលលើកទី៦ ចាប់តាំងពីប្រទេសមួយនេះ​បានផ្លាស់ប្តូរមកប្រើប្រព័ន្ធពហុបក្ស ក្នុងឆ្នាំ១៩៩០។

ក្រុមចម្រុះ និងគណបក្សចំនួន ១៥ កំពុងតែប្រកួតប្រជែងគ្នា ក្នុងពេលដែលការបោះឆ្នោតបើកនៅ ម៉ោង ៧៖០០នាទីព្រឹក និងបិទនៅម៉ោង ៨៖០០នាទីយប់។ តាមទិន្នន័យ​ចេញពីគណៈកម្មការរៀបចំការបោះឆ្នោត មានអ្នកចុះឈ្មោះបោះឆ្នោតជាង ៥៤២,០០០នាក់មានសិទ្ធិបោះឆ្នោតនៅឯស្ថានីយបោះឆ្នោត ១,០៣៨ នៅទូទាំង​ប្រទេស។ ការបោះឆ្នោតសកលមុនកាលកំណត់ ត្រូវបានស្នើឡើងដោយលោក Milo Djukanovic អតីតប្រធានាធិបតីម៉ុងតេណេហ្រ្គោ នៅចំពោះមុខនៃ​ការបោះឆ្នោតដក​សេចក្តីទុកចិត្តពីរដ្ឋាភិបាលដឹកនាំដោយលោកនាយករដ្ឋមន្រ្តី Dritan Abazovic។ នេះគឺជាលើកដំបូងហើយ ដែលគណបក្សគាំទ្រលោកខាងលិច DPS ដែលកាន់អំណាច​ជាច្រើនទសវត្សរ៍នឹងប្រកួតប្រជែងនៅក្នុងការបោះឆ្នោតដោយគ្មានលោក Abazovic ដែលជាមេដឹកនាំគណបក្សមួយនេះជាច្រើនឆ្នាំមកហើយ  ប៉ុន្តែបានលាលែងតំណែង​ពីប្រធានគណបក្ស កាលពីថ្ងៃទី០៦ ខែមេសា ឆ្នាំ២០២៣។

គណបក្ស DPS គឺជាផ្នែកមួយនៃសម្ព័ន្ធភាព Together bloc រួមជាមួយនឹងដៃគូជាប្រពៃណីរបស់ ខ្លួន គឺគណបក្សសេរីនិយម LP  ក្រុមចម្រុះអាល់បានី  និងគណបក្ស​សង្គម​​ប្រជាធិបតេយ្យ។ នេះក៏ជាលើក ទី១ ផងដែរដែលគណបក្សនិយមកណ្តាលគឺគណបក្ស  Europe Now ដឹកនាំដោយលោក Jakov Milatovic ដែលទទួលបាន​ជ័យជម្នះក្នុងការបោះឆ្នោតប្រធានាធិបតីជុំទី២ កាលពីថ្ងៃទី០២ ខែមេសា បានចូលរួមក្នុងការបោះឆ្នោតសកល។ គណបក្ស Europe Now បាននាំមុខនៅក្នុងការបោះឆ្នោត ចាប់តាំងពីលោក Milatovic បានទទួលជ័យជម្នះក្នុងការបោះឆ្នោតប្រធានាធិបតីមក បើទោះបីជាគេមិនរំពឹងថា គណបក្សនេះនឹងទទួលបានអាសនៈគ្រប់គ្រាន់នៅក្នុងសភា  ដើម្បីបង្កើតរដ្ឋាភិបាលថ្មីមួយតែឯងបានក៏ដោយចុះ។

គួរបញ្ជាក់ផងដែរថា មានក្រុមចម្រុះ និងគណបក្សចុះបញ្ជីចំនួន ១៥ កំពុងតែប្រកួតប្រជែងគ្នាដែល ប្រមាណជាពាក់កណ្តាលគឺជាគណបក្សដែលបានឆ្លងផុតកម្រិត​កំណត់​អប្បបរមា ៣% នៃការបោះឆ្នោតដើម្បីអាចទទួលបានអាសនៈនៅក្នុងការបោះឆ្នោតជ្រើសតាំងសមាជិកសភាកាលពីខែសីហា ឆ្នាំ២០២០៕

http://ព័ត៌មានសភាទ្វីបអឺរ៉ុប ១២-០៦-២៣- ឈាវ សុផាត ប្រែសម្រួលពី៖ https://www.aa.com.tr/en/europe/montenegro-holds-snap-parliamentary-elections/2919551