អតីតសមាជិកសភាជាន់ខ្ពស់ជប៉ុនឈ្មោះ “GaaSyy,”

ប្រភពព័ត៌មាននានា បានឱ្យដឹងថា នគរបាលជប៉ុន គ្រោងចាប់ខ្លួនលោក Yoshikazu Higashitani អតីតសមាជិកសភាជាន់ខ្ពស់ជប៉ុន ដែលត្រូវបានគេស្គាល់ថាជាតារា You Tuber ឈ្មោះ GaaSyy ពីបទសង្ស័យថា បានគម្រាមកំហែងតារាល្បីឈ្មោះជាច្រើនរូប បន្ទាប់ពីបានវិលចូលប្រទេសជប៉ុនវិញ កាលពីថ្ងៃទី០៤ ខែមិថុនា ឆ្នាំ២០២៣។ ប្រភពព័ត៌មានដដែលនេះ បានឱ្យដឹងទៀតថា លោក Higashitani ត្រូវបានគេរំពឹងថា នឹងមកដល់អាកាសយានដ្ឋានអន្តរជាតិ Narita ភាគខាងកើតរដ្ឋធានីតូក្យូ នៅរសៀល  ថ្ងៃដដែលនោះ​ ពីទីក្រុង Dubai នៃអេមីរ៉ាតអារ៉ាប់រួម ទីដែលលោក Higashitani បានស្នាក់នៅ។

ប្រភពព័ត៌មានដដែលនោះ បានឱ្យដឹងទៀតថា លោក Higashitani ត្រូវបានគេសង្ស័យថា បាន គម្រាមកំហែងតារាល្បីឈ្មោះ ៣ រូប រួមទាំង លោក Go Ayano តារាភាពយន្តផងដែរ នៅរវាងខែកុម្ភៈ និងសីហា ឆ្នាំ២០២២ ដោយគម្រាមថា ខ្លួននឹងបង្ខូចកេរ្តិ៍ឈ្មោះតារាល្បីឈ្មោះទាំងនោះនៅលើបណ្តាញទំនាក់ទំនងសង្គម YouTube។ លោក Higashitani បានគម្រាមជាច្រើនលើកលើតារាល្បីឈ្មោះ ១ រូប ក្នុងចំណោមតារាទាំងនោះ។ ស្នងការនគរបាលរាជធានីតូក្យូ បានស្នើឱ្យលោក Higashitani ផ្តល់​ចម្លើយ​​ដោយស្ម័គ្រចិត្ត ចាប់តាំងពីចុងឆ្នាំ២០២២ មកម៉្លេះ។ ប៉ុន្តែ អតីតសមាជិកសភារូបនេះ បានច្រានចោល ការចោទប្រកាន់ដែលថា ការដែលលោកស្នាក់នៅបរទេសនេះ ដោយសារហេតុផលផ្សេងៗ។

កាលពីខែមីនា ឆ្នាំ២០២៣ ស្នងការនគរបាលរាជធានីតូក្យូ បានទទួលដីកាចាប់ខ្លួនលោក Higashitani ពីបទសង្ស័យថា បានរំលោភច្បាប់ស្តីពី ទណ្ឌកម្មរំលោភលើ​រាងកាយ រួមនឹងសកម្មភាពផ្សេងៗទៀត។  លោក Higashitani ត្រូវបានជាប់ក្នុងបញ្ជីតាមចាប់ខ្លួនអន្តរជាតិ កាលពីខែមេសា ឆ្នាំ២០២៣ បន្ទាប់ពីការស្នើសុំរបស់ស្នងការ​នគរបាលរាជធានីតូក្យូទៅអង្គការនគរបាលឧក្រិដ្ឋកម្មអន្តរជាតិ តាមរយៈភ្នាក់ងារនគរបាលជាតិ។ តារា YouTuber រូបនេះ បានទទួលអាសនៈសភាលើកដំបូង​របស់ខ្លួនក្នុង​សភាជាន់ខ្ពស់ ក្នុងការបោះឆ្នោតកាលពីខែកក្កដា ឆ្នាំ២០២២ តាមរយៈការបែងចែកតំណាងសមាមាត្រ។

លោក Higashitani បានឈរឈ្មោះក្នុងបញ្ជីឈ្មោះបេក្ខជនគណបក្សប្រឆាំង គឺគណបក្ស NHK​ ចាប់តាំងពីប្តូរឈ្មោះគណបក្ស Seijika Joshi 48 មក។ ទោះបីជាយ៉ាង​ណាក្តី ក៏សមាជិកសភារូបនេះ ត្រូវបានបញ្ចប់មុខតំណែងកាលពីខែមីនា ឆ្នាំ២០២២ ពីព្រោះសមាជិកសភារូបនេះ​ បានបដិសេធមិនព្រមចាកចេញពីអេមីរ៉ាតអារ៉ាប់រួម និងមិនដែលបង្ហាញវត្តមានក្នុងសភាម្តងណាឡើយ…៕

http://ព័ត៌មានសភាទ្វីបអាស៊ី ០៥-០៦-២៣-កែវ ធាវី ប្រែសម្រួលពី៖ https://www.asahi.com/ajw/articles/14924742