រូបភាពសភានៃសាធារណរដ្ឋតួកគី

រដ្ឋធានីអង់ការ៉ា៖ កាលពីថ្ងៃអាទិត្យទី០៤ ខែមិថុនា ឆ្នាំ២០២៣ ប្រព័ន្ធផ្សព្វផ្សាយព័ត៌មានក្នុងប្រទេសតួកគីបានរាយការណ៍ថា សភានៃសាធារណរដ្ឋតួកគីនឹងធ្វើការ​បោះឆ្នោត​​​ជ្រើសតាំងប្រធានសភាថ្មី តាម  រយៈការបោះឆ្នោតជាសំងាត់ នៅថ្ងៃពុធ ទី០៧ ខែមិថុនា ឆ្នាំ២០២៣ ខាងមុខនេះ។

ប្រព័ន្ធផ្សព្វផ្សាយព័ត៌មានតួកគី The TRT Haber បានរាយការណ៍ថា ការបោះឆ្នោតបីជុំនឹងត្រូវ   បានធ្វើឡើងដើម្បីធ្វើការបោះឆ្នោតជ្រើសតាំងប្រធានសភាថ្មី ប៉ុន្តែប្រសិន​បើសំឡេងភាគច្រើនដាច់ខាត នៅតែមិនអាចទទួលបាននៅជុំទី៣ នោះជុំទី៤ នឹងត្រូវបានធ្វើឡើងសម្រាប់បេក្ខជន២រូប ដែលទទួល បានសំឡេងឆ្នោតខ្ពស់ជាងគេ។

ប្រព័ន្ធផ្សព្វផ្សាយព័ត៌មានដដែលខាងលើបានឱ្យដឹងបន្ថែមទៀតថា លើសពីនេះទៀត លោក Cev det Yilmaz អនុប្រធានាធិបតីតួកគី និងសមាជិកគណៈរដ្ឋមន្រ្តីចំនួន ១៧រូបនឹងត្រូវធ្វើសច្ចាប្រណិធាន ស្បថចូលកាន់តំណែងនៅថ្ងៃពុធដដែលនោះផងដែរ។

កាលពីដើមសប្តាហ៍មុន ប្រព័ន្ធផ្សព្វផ្សាយព័ត៌មានក្នុងប្រទេសតួកគីបានរាយការណ៍ថា លោក Numan Kurtulmus អនុប្រធានគណបក្សកាន់អំណាច គឺគណបក្សយុត្តិធម៌ និងការអភិវឌ្ឍ (AKP) ទំនងបំផុតថានឹងក្លាយជាបេក្ខជនសម្រាប់តំណែងប្រធានសភាតួកគី។  គួរបញ្ជាក់ផងដែរថា លោកRecep Tayyip Erdoğan ប្រធានគណបក្សយុត្តិធម៌ និងការអភិវឌ្ឍ (AKP)  ទទួលបានជ័យជម្នះ នៅក្នុងការបោះឆ្នោតជ្រើសតាំងប្រធានាធិបតីជុំទី២ កាលពីថ្ងៃទី ២៨ ខែឧសភា ឆ្នាំ២០២៣ ដោយទទួលបានសំឡេងឆ្នោត ៥២.១៨% ដោយបានផ្តួលគូប្រជែងដ៏សំខាន់ របស់លោក គឺលោក Kemal Kilicdaroglu ប្រធានគណបក្សប្រជាជនសាធារណរដ្ឋ(CHP) ដែលទទួលបានសំឡេងឆ្នោត ៤៧.៨២%។

លោក Recep Tayyip Erdoğan ​ប្រធានាធិបតីជាប់ឆ្នោតជាថ្មីរបស់ប្រទេសតួកគី បានប្រកាស ចេញនូវសមាសភាពគណៈរដ្ឋមន្រ្តីថ្មីរបស់លោក  កាលពីល្ងាចថ្ងៃសៅរ៍  ទី០៣   ខែមិថុនា ឆ្នាំ២០២៣៕

http://ព័ត៌មានសភាទ្វីបអឺរ៉ុប ០៥-០៦-២៣- ឈាវ សុផាត ប្រែសម្រួលពី៖ https://www.urdupoint.com/en/world/turkish-parliament-speaker-to-be-elected-on-j-1702683.html