ពិធីស្បថចូលកាន់តំណែងរបស់សមាជិកសភា នៅក្នុងសភាក្រិក

សភានៃសាធារណរដ្ឋក្រិកដែលទើបជាប់ឆ្នោតកាលពីថ្ងៃទី២១ ខែឧសភា ឆ្នាំ២០២៣ បានស្បថ ចូលកាន់តំណែងនៅថ្ងៃអាទិត្យ ទី២៨ ខែឧសភា ឆ្នាំ២០២៣ នៅក្នុងពិធីមួយដែលផ្សព្វផ្សាយតាមទូរ ទស្សន៍។ បើតាមក្រឹត្យរបស់ប្រធានាធិបតីក្រិក សម័យប្រជុំសភាដំបូង ដំបូងឡើយគ្រោងធ្វើ​ឡើងនៅថ្ងៃទី០១ ខែមិថុនា ប៉ុន្តែបានប្តូរមកធ្វើនៅថ្ងៃទី២៨ ខែឧសភាវិញ ដើម្បីរៀបចំការបោះឆ្នោតមុនអាណត្តិ ព្រោះតែសភានីតិកាលថ្មី​មិនអាច​បង្កើតរដ្ឋាភិបាលចម្រុះថ្មីមួយបាន។ កិច្ចប្រជុំសភាដឹកនាំដោយលោក Nikitas Kaklamanis អនុប្រធានសភាក្រិក។

ពិធីសម្បថ បានធ្វើឡើងក្រោមវត្តមានរបស់លោកស្រី Katerina Sakellaropoulou ប្រធានាធិបតីក្រិក លោក Ioannis Sarmas នាយករដ្ឋ​មន្រ្តីក្រិក មេគណសង្ឃកាតូលិកទីក្រុងអាថែន និងសមាជិក សង្ឃកាតូលិកដទៃទៀត ប្រទានពរជ័យ និងប្រោះព្រំដល់សមាជិកសភាក្រិកឱ្យបំពេញ​ការងារបានប្រកប ដោយផ្លែផ្កា។ អតីតនាយករដ្ឋមន្ត្រី អតីតប្រធានសភា ថ្នាក់ដឹកនាំកំពូលវិស័យយុត្តិធម៌ និងរដ្ឋាភិបាល ក៏ដូចជា តំណាងព្រះវិហារ​បរទេស និកាយសាសនានានា និងឯកអគ្គរដ្ឋទូតបរទេស ត្រូវបានអញ្ជើញឱ្យចូលរួមក្នុងពិធីសម្បថរបស់សមាជិកសភាក្រិក។

ក្នុងចំណោមសមាជិកសភាក្រិកទាំង ៣០០រូប មាន១០៤រូប ជាសមាជិកសភាជាប់ឆ្នោតថ្មីថ្មោង​។ ១៣រូប មិនមែនជាសមាជិកសភា​នីតិកាលមុន ប៉ុន្តែធ្លាប់ជាសមាជិកសភាកាលពីនីតិកាលមុនៗកន្លងមក។ មានស្រ្តីចំនួន ៧៥រូប ក្នុងសភានីតិកាលថ្មីនេះ គឺជាមានចំនួន ៩នាក់​ច្រើនជាង នីតិកាលឆ្នាំ២០១៩។ នៅព្រឹកថ្ងៃចន្ទ ម៉ោង ១០៖៣០នាទី  សភានឹងប្រជុំដើម្បីបោះឆ្នោតជ្រើសរើសប្រធានសមាជិក  និងលេខាធិការ។ នៅពេលល្ងាចថ្ងៃដដែល លោកស្រីប្រធានាធិបតី Katerina Sakellaropoulou នឹងចេញក្រឹត្យមួយដើម្បីរំលាយសភា និងប្រកាសកាលបរិច្ឆេទ​បោះឆ្នោតជ្រើសតាំងសមាជិកសភា នៅថ្ងៃទី២៥ ខែមិថុនា ឆ្នាំ២០២៣ ព្រមទាំងកំណត់កាលបរិច្ឆេទសម្រាប់ពិធីស្បថចូល​កាន់តំណែងរបស់​សមាជិកសភានីតិកាលថ្មី៕

http://ព័ត៌មានសភាទ្វីបអឺរ៉ុប ២៩-០៥-២៣- ឈាវ សុផាត ប្រែសម្រួលពី៖ https://www.urdupoint.com/en/world/new-greek-parliament-takes-oath-1699131.html