ថ្ងៃសុក្រ ទី១៩ ខែឧសភា ជាថ្ងៃចាប់ផ្តើសម័យប្រជុំនិទាឃរដូវ របស់សន្និបាតសភាអង្គការណាតូ ដោយមានកិច្ចប្រជុំវិសាមញ្ញរវាង​គណៈកម្មាធិការ​អចិន្រ្តៃយ៍របស់អង្គការនេះ ជាមួយក្រុមប្រឹក្សាអន្តរសភា អ៊ុយក្រែន-ណាតូ។ គណៈកម្មាធិការអចិន្រ្តៃយ៍សន្និបាតសភាអង្គការណាតូ ជាក្រុម​អភិបាល​​របស់សន្និបាតនេះ ចំណែកក្រុមប្រឹក្សាអន្តរសភាអ៊ុយក្រែន-ណាតូ ជាក្រុមការងារទ្វេភាគី សម្រាប់កិច្ចទំនាក់ទំនាក់រវាង   សន្និបាតអ​ង្គការ​ណាតូ និងរដ្ឋសភាប្រទេសអ៊ុយក្រែន(សភាមួយថ្នាក់)។ កិច្ចប្រជុំនេះមានការចូលរួមពី សមាជិកសភាចំនួន៥១រូប មកពីប្រទេសជាសមាជិក​អង្គការណាតូ និងព្រះរាជាណាចក្រស៊ុយអ៊ែត និងសមាជិកសភា១០រូប របស់ប្រទេសអ៊ុយក្រែន។ ការពិភាក្សានេះ ផ្តោតលើការបង្កើនការ​គាំទ្រ​ចំពោះប្រទេសអ៊ុយក្រែន និងលើលទ្ធផលរំពឹងទុកសម្រាប់កិច្ចប្រជុំកំពូលអង្គការណាតូ នៅរដ្ឋធានីវីលនីញូស នៃសាធារណរដ្ឋលីទុយអានី ថ្ងៃទី១១-១២ ខែកក្កដា ខាងមុខ។

លោកស្រីJoelle Garriaud Maylam សមាជិកសភាសាធារណរដ្ឋបារាំង និងជាប្រធានសន្និបាតសភាអង្គការណាតូ បានថ្លែងសុន្ទរកថាបើកកិច្ច​ប្រជុំថា៖ ”កិច្ចប្រជុំរបស់យើងក្នុងប្រទេសលុចសំបួរថ្ងៃនេះ ប្រព្រឹ- ត្តិចំពេលវេលាសំខាន់មួយ ជាពេលដែលស្មារតីប្រយុទ្ធតស៊ូរបស់ប្រទេស​អ៊ុយក្រែន ឡើងខ្ពស់ជាងពេលណាណាទាំងអស់។ ការគាំទ្ររបស់យើងចំពោះប្រទេសអ៊ុយក្រែន និងការប្រយុទ្ធរបស់អ៊ុយក្រែនដើម្បីសេរីភាព នឹងគ្មានថ្ងៃថមថយឡើយ។ កិច្ចខិតខំរបស់យើងនឹងបន្តជានិរន្តរ ហើយយើងនឹងបន្តឈរជាមួយប្រទេសអ៊ុយក្រែន ដោយសាមគ្គីភាព និងទឹក​ចិត្ត​មុះមុត រហូតដល់សង្គ្រាមនេះត្រូវបានបញ្ចប់។”

លោកAudronius Azubalis សមាជិករដ្ឋសភា(សភាមួយថ្នាក់)ប្រទេសលីទុយអានី និងជាសហប្រធានក្រុមប្រឹក្សាអន្តរសភាអ៊ុយក្រែន​-​ណាតូ បានលើកឡើងថា៖ ”ការរួបរួមគ្នាជាធ្លុងមួយរបស់សមាជិកអង្គការណាតូ កាន់តែច្រើន គឺកាន់តែមានសារៈសំខាន់ ក្នុងការបង្កើនការ​គាំទ្រ​ចំពោះប្រទេសអ៊ុយក្រែន នៅគ្រប់កម្រិត ទាំងកម្រិតនយោបាយ យោធា ជំនួយមនុស្សធម៌ ហិរញ្ញវត្ថុ និងច្បាប់។” ជាពិសេស លោកAudr onius បានទទូចឱ្យសម្ព័ន្ធមិត្ត បង្កើនល្បឿនដឹកជញ្ជូនសម្ភារៈយោធា ដែលប្រទេសអ៊ុយក្រែនកំពុងត្រូវការជាចាំបាច់ ដើម្បីប្រយុទ្ធរំដោះទឹក​ដីដែលមាន​ព្រំដែនទទួលស្គាល់ដោយអន្តរជាតិ ក្នុងនោះរួមមានការផ្តល់កាំភ្លើងធំរយៈឆ្ងាយ រថក្រោះ និងយន្តហោះចម្បាំង។”

លោកOleksanr Korniyenko អនុប្រធានរដ្ឋសភាប្រទេសអ៊ុយក្រែន និងជាសហប្រធានក្រុមប្រឹក្សាអន្តរសភាអ៊ុយក្រែន-ណាតូ បានសង្កត់​ធ្ងន់ថា ស្ថានភាពនៅសមរភូមិនាពេលនេះ មានសភាពតានតឹង​ (diffiicult) និងស្រួចស្រាល់(dynamic) ប៉ុន្តែអ៊ុយក្រែន នៅតែបន្តប្រយុទ្ធយ៉ាង​មុះមុត ដើម្បីសេរីភាពរបស់ខ្លួន។ លោកOleksanr បានថ្លែងថា៖ ”គោលដៅរួមរបស់យើងទាំងអស់គ្នានៅទីនេះ គឺជ័យជម្នះរបស់អ៊ុយក្រែន ក្នុងសង្រ្គាមជាមួយរុស្ស៊ី។ ដើម្បីឈ្នះសង្រ្គាមនេះ អ៊ុយក្រែនត្រូវការការជួយគាំទ្រពីអ្នកទាំងអស់គ្នា។ អ៊ុយក្រែនត្រូវការបន្ថែម​ទៀតនូវជំនួយ​ជាហិរញ្ញវត្ថុ អាវុធ គ្រាប់រំសេវ និងទណ្ឌកម្មធ្ងន់ធ្ងរជាងមុនលើរុស្ស៊ី។ ពេលប្រទេសអ៊ុយក្រែនបានទទួលជ័យជោគជ័យ អ៊ុយក្រែននឹងពឹង​អាស្រ័យលើការចូលរួមពីប្រទេសនានា ដើម្បីកសាងប្រទេសខ្លួនឡើងវិញ។ សង្រ្គាមដែលអ៊ុយក្រែនកំពុងប្រយុទ្ធនៅពេលនេះ មិនមែនតែក្នុង​បុព្វហេតុការពារទឹកដីខ្លួនឡើយ ប៉ុន្តែក៏ក្នុងបុព្វហេតុការពារអឺរ៉ុបទាំងមូលដែរ ហើយទីបញ្ចប់នៃសង្គ្រាមនេះ គឺជាការកំណត់នូវជោគវាសនា​របស់​អ៊ុយក្រែន និងប្រទេសជាច្រើនទៀត។

លោកស្រីJoelle Garriaud Maylam បានថ្លែងបន្តទៀតថា៖ ”ការដាក់សម្ពាធរបស់យើងលើទីក្រុងមូស្គូ នឹងបន្តកើនថែមទៀត។ ការដាក់​សម្ពាធនេះ ក៏រួមមានផងដែរ នូវការមិនឱ្យប្រទេសរុស្ស៊ីរួចខ្លួនឡើយ ពីឧក្រិដ្ឋកម្មដ៏សាហាវយង់ឃ្នងដែលរុស្ស៊ីបាន​និងកំពុងប្រព្រឹត្តិក្នុងប្រទេស​អ៊ុយក្រែន។ វាគឺជាឧក្រិដ្ឋកម្ម សង្គ្រាម ឧក្រិដ្ឋកម្មប្រឆាំងមនុស្សជាតិ ហើយក៏អាចជាទង្វើប្រល័យពូជសាសន៍ ដែរ។”

ពាក់ព័ន្ធនឹងកិច្ចប្រជុំកំពូលអង្គការណាតូ ក្នុងខែកក្កដា ខាងមុខ លោកស្រី Joelle Garriaud Maylam បានថ្លែងថា៖”កិច្ចប្រជុំកំពូលនេះ គួរប្រើពាក្យពេចន៍ច្បាស់ៗថា ប្រទេសអ៊ុយក្រែន គឺស្ថិតក្នុងក្រុមគ្រួសារអឺរ៉ុប និងក្រុមគ្រួសារអឺរ៉ុប-អាត្លង់ទិក ហើយប្រទេសនេះនឹងក្លាយជា​សមាជិកអង្គការណាតូ។ យើងនឹងឈរនៅខាងអ៊ុយក្រែន ដើម្បីជួយត្រួសត្រាយផ្លូវឱ្យអ៊ុយក្រែនក្លាយជាសមាជិកអង្គការណាតូ។” សូមបញ្ជាក់ផង​ដែរថា កាលពីឆ្នាំ២០២២ សន្និបាតសភាអង្គការណាតូ បានផ្តល់អនុសាសន៍ឱ្យប្រទេសសម្ព័ន្ធមិត្តអង្គការណាតូ យល់ព្រមលើជំហានបន្ទាប់​របស់​អ៊ុយក្រែន ក្នុងដំណើរនៃការក្លាយទៅជាសមាជិកអង្គការណាតូ។

កិច្ចប្រជុំរបស់សន្និបាតសភាអង្គការណាតូខាងលើនេះ ក៏បានពិភាក្សាផងដែរអំពីជំហានជាក់ស្តែង បន្ថែមទៀត ក្នុងការលើកកម្ពស់កម្រិតនៃ​ទំនាក់ទំនង​​​ណាតូ-អ៊ុយក្រែន។ ឧទាហរណ៍ លោកAudronius Azubalis បានស្នើថា ប្រទេសអ៊ុយក្រែនគួរទទួលបានសិទ្ធិចូលក្នុងក្រុមយោធា និងនយោបាយរបស់អង្គការ ណាតូ។ លោកAudronius Azubalis ក៏បានស្នើដែរ ឱ្យសមាជិកសភាទាំងអស់ប្រើប្រាស់ក្រុមប្រឹក្សា​អន្តរសភា​អ៊ុយក្រែន-ណាតូ ឱ្យអស់ពីប្រសិទ្ធភាព។

នៅថ្ងៃចន្ទ ទី២២ ខែឧសភា ខាងមុខនេះ កិច្ចប្រជុំពេញអង្គរបស់សន្និបាតសភាអង្គការណាតូ គ្រោងអនុម័តសេចក្តីប្រកាសពិសេស (special declaration) មួយដែលព្រាងដោយលោកMichal Szczerba សមាជិកសភាសាធារណរដ្ឋប៉ូឡូញ និងជាអនុប្រធានសន្និបាតសភាអង្គការណាតូ ដែលនឹងលើកអនុសាស ន៍ឱ្យរដ្ឋាភិបាល និងសភានៃប្រទេសជាសមាជិកអង្គការណាតូ បង្កើនការគាំទ្រចំពោះប្រទេសអ៊ុយក្រែន។

លោក Oleksii Reznikov រដ្ឋមន្រ្តីក្រសួងការបរទេសប្រទេសអ៊ុយក្រែន នឹងថ្លែងសុន្ទរកថា នៅក្នុងកិច្ចប្រជុំពេញអង្គរបស់សន្និបាតសភា​អង្គការ​ណាតូនៅថ្ងៃចន្ទ ទី២២ ខែឧសភា ហើយនៅចុងសប្តាហ៍នេះ លោកស្រីOleksandra Matvii chuk នាយកមជ្ឈមណ្ឌលអ៊ុយក្រែនសម្រាប់សេរីភាព​ជន​​​ស៊ីវិល និងជាម្ចាស់ពានរង្វាន់ណូបែលសន្តិសភាព ឆ្នាំ២០២២ នឹងពិភាក្សាការងារមួយចំនួនជាមួយសមាជិកសន្និបាតសភាអង្គការណាតូ…៕

http://ព័ត៌មានពីសហភាពអន្តរសភា ២១-០៥-២៣- តូនី ប្រែសម្រួលពី៖https://www.nato-pa.int/news/strong-message-solidarity-ukraine-first-day-nato-pa-spring-session