កាលពីថ្ងៃសៅរ៍ ទី១៩ ខែមីនា ឆ្នាំ២០២២ លោក Vyacheslav Volodin ប្រធានសភាជាន់ទាបរបស់សហព័ន្ធរុស្ស៊ី (សភាឌូម៉ា) បានមានប្រសាសន៍ថា សហរដ្ឋអាមេរិក និងអង្គការសន្ធិសញ្ញាអាត្លង់ទិក ខាងជើង (NATO) ត្រូវតែបញ្ឈប់ការផ្គត់ផ្គង់អាវុធ និងការបញ្ជូនទាហានស៊ីឈ្នួលទៅប្រទេសអ៊ុយក្រែន ។

លោក Volodin បានបង្ហោះសារនៅលើបណ្តាញសង្គមតេឡេក្រាមថា “អាវុធ និងគ្រាប់រំសេវត្រូវបានផ្គត់ផ្គង់ដោយបណ្តាប្រទេសនៅក្នុងអង្គការណាតូ ។ ទាហានស៊ីឈ្នួលដែលបំពេញជួរនៃកងវរសេនាតូចជាតិនិយម (អ៊ុយក្រែន) ត្រូវបានជ្រើសរើសនៅក្នុងប្រទេសនៃសម្ព័ន្ធមិត្តអាត្លង់ទិកខាងជើង ដោយមានការយល់ព្រមពីថ្នាក់ដឹកនាំរបស់ពួកគេ” ។ លោកប្រធានសភាឌូម៉ាបានសរសេររៀបរាប់ទៀតថា “ដូច្នេះនៅពេលដែល (ប្រធានាធិបតីសហរដ្ឋអាមេរិកលោក Joe Biden និងសហការីរបស់អង្គការណាតូអំពាវនាវឱ្យមានសន្តិភាព នោះពួកគេត្រូវតែចាប់ផ្តើមពីខ្លួនពួកគេជាមុនសិន ។ វាជាកំហុសរបស់ពួកគេដែលការដោះស្រាយស្ថានការណ៍នៅប្រទេសអ៊ុយក្រែន ដោយការដាក់ពង្រាយយោធា និងការបំផ្លិចបំផ្លាញដែលកំពុងត្រូវបានពន្យារពេល” ។

លោក Vyacheslav Volodin បានមានប្រសាសន៍បន្ថែមទៀតថា ប្រសិនបើបណ្តាប្រទេសលោកខាងលិចចង់បានសន្តិភាព ពួកគេគួរតែផ្តល់មូលនិធិមិនមែនសម្រាប់ការផ្គត់ផ្គង់យោធា ប៉ុន្តែជាជំនួយមនុស្សធម៌ដល់ប្រជាជនអ៊ុយក្រែន ៕

http://ព័ត៌មានសភាអន្តរជាតិ ២១-០៣-២២-ផាត់ ត្រដែត ប្រែសម្រួលពី៖ https://english.news.cn/20220319/dea250bbbead4e25903ae3d662ba2449/c.html