លោក Mafred Weber ស្នើឱ្យលោកស្រី Roberta Metsola បង្កើនល្បឿនបោះឆ្នោតលើផលិតកម្មអាវុធនៅអឺរ៉ុប

លោក Mafred Weber ប្រធានគណបក្សប្រជាជនអឺរ៉ុប (EPP) ចង់ឱ្យសភាអឺរ៉ុបប្រើប្រាស់នីតិវិធី លឿនបំផុតមួយដើម្បីបោះឆ្នោតលើផែនការបង្កើនសព្វាវុធ និងផលិត​គ្រាប់កាំភ្លើងដើម្បីជួយដល់ប្រទេស អ៊ុយក្រែនឱ្យបានឆាប់បំផុតនៅក្នុងខែនេះ។ លោក Weber បានថ្លែងបែបនេះនៅក្នុងលិខិតមួយផ្ញើទៅ កាន់លោកស្រី Roberta Metsola ប្រធានសភាអឺរ៉ុប។

លោក Weber បានសេរសេរក្នុងលិខិតរបស់លោកថា “ដោយសារតែមានតម្រូវការបន្ទាន់ ដើម្បី  ជួយដល់អ៊ុយក្រែនបំពេញស្តុកគ្រាប់កាំភ្លើងរបស់ខ្លួន ក្រុមសមាជិក​សភា EPP សូមស្នើឱ្យមាននីតិវិធីបន្ទាន់មួយ អនុលោមតាមវិធានលេខ ១៦៣ នៃបទបញ្ជាផ្ទៃក្នុងរបស់សភាអឺរ៉ុប”។ ពេលវេលានៅសល់មិនច្រើនទេ ដែលសហភាព​អឺរ៉ុបបានសន្យាផ្គត់ផ្គង់ដល់អ៊ុយក្រែននូវ គ្រាប់ផ្លោង ១លានគ្រាប់ នៅឆ្នាំ២០២៤ ប៉ុន្តែមានការបារម្ភថា សហភាពអឺរ៉ុបមិនអាចធ្វើតាមការ​សន្យារបស់ខ្លួនបាន​ដើម្បី​ផលិត​តាមបរិមាណដែលត្រូវការ។ រដ្ឋមន្រ្តីនៃសហភាពអឺរ៉ុប កាលពីខែមីនា ឆ្នាំ២០២៣ បានស្នើឱ្យទីក្រុងព្រុចស៊ែលរិះរកវិធីធ្វើច្បាប់មួយដោយប្រើប្រាស់ថវិកា​របស់សហភាព​អឺរ៉ុប ដើម្បីបង្កើនសមត្ថភាពផលិតកម្មវិស័យការពារជាតិនៅក្នុងអឺរ៉ុប ឱ្យសម្រេចបានតាមគោលដៅ។

កាលពីសប្តាហ៍មុន គណៈកម្មការអឺរ៉ុបបានអនុម័តផែនការបង្កើនសមត្ថភាពផលិតគ្រាប់កាំភ្លើង ដោយចាក់បញ្ចូលថវិកា ៥០០លានអឺរ៉ូពីថវិកាសហភាពអឺរ៉ុប ទៅក្នុង​រោងចក្រ​​​​​ផលិតគ្រាប់ផ្លោងដើម្បីបង្កើនការផលិតសព្វាវុធ និងថវិកាប្រមាណជា ៥០០លានអឺរ៉ូផ្សេងទៀត បានម​កពីប្រទេសជាសមាជិក សហភាពអឺរ៉ុប និងពីប្រភព​ផ្សេងៗទៀត។ សេចក្តីព្រាងច្បាប់ដែលគេឱ្យឈ្មោះថាជា “ច្បាប់គាំទ្រការផលិតគ្រាប់កាំភ្លើង” (ជាការប្រញាប់) ដើម្បីផលិតគ្រាប់កាំភ្លើង១លានគ្រាប់ ក្នុងរយៈពេល ១ឆ្នាំ។ សមាជិកសភាអឺរ៉ុបនឹងពិភាក្សាលើសំណើរបស់គណៈកម្មការអឺរ៉ុប នៅក្នុងសម័យប្រជុំពេញអង្គសភាអឺរ៉ុប ប៉ុន្តែវាគ្រាន់តែជាការផ្លាស់ប្តូរទស្សនៈ​គ្នាទៅវិញទៅមក​លើកដំបូងប៉ុណ្ណោះ​ តើវាអាចប្រែក្លាយទៅជាការពិភាក្សាដេញដោលពីការបង្កើនល្បឿនលើសេចក្តីព្រាងច្បាប់ឬយ៉ាងណា ក្នុងពេលដែលលោក Weber ចង់ឱ្យសមាជិកសភា​បោះឆ្នោតឱ្យបានឆាប់បំផុត​ថាតើត្រូវប្រើប្រាស់នីតិវិធីលឿនបំផុតមួយ ឬយ៉ាងណា។

មេដឹកនាំក្រុមនយោបាយ គ្រោងពិភាក្សាលើសំណើខាងលើនៅថ្ងៃព្រហស្បតិ៍ ទី១១ ខែឧសភា ឆ្នាំ២០២៣ ខាងមុខនេះ ហើយការបោះឆ្នោតចុងក្រោយ ដើម្បីអនុម័តលើ​សេចក្តីព្រាងច្បាប់ខាងលើនេះ អាចនឹងធ្វើឡើងនៅចុងខែឧសភានេះ៕

http://ព័ត៌មានសភាទ្វីបអឺរ៉ុប ០៩-០៥-២៣- ឈាវ សុផាត ប្រែសម្រួលពី៖ https://www.politico.eu/article/eu-parliament-speed-up-ammo-deal-manfred-weber-european-people-party-president-roberta-metsola/