លោក Mick Wallace សមាជិកសភាអឺរ៉ុបមកពីសាធារណរដ្ឋអៀរឡង់

លោក Mick Wallace សមាជិកសភាអឺរ៉ុបមកពីសាធារណរដ្ឋអៀរឡង់បានថ្លែងថា ក្នុងពេលដែល សាធារណរដ្ឋប្រជាមានិតចិនបង្ហាញជូនពិភពលោក​នូវផែនការ​សន្តិភាពមួយ ចំពោះវិបត្តិនៅក្នុងប្រទេស អ៊ុយក្រែន ស្រាប់តែសហរដ្ឋអាម៉េរិក​ និងអង្គការណាតូបែរជាមិនចង់ឱ្យសង្រ្គាមមួយនេះបញ្ចប់ ព្រោះតែដើម្បីផល​ប្រយោជន៍​របស់ពួកគេ។ “វាជារឿងល្អដែលយើងបានឃើញប្រទេសចិនបញ្ចេញនូវផែនការសន្តិភាពមួយ”។ សមាជិកសភាអឺរ៉ុបមកពីប្រទេសអៀរឡង់រូ​បនេះបានថ្លែង​ប្រាប់​សារព័ត៌មានចិនស៊ីនហួរ បែបនេះ ក្នុងអំឡុងពេលលោក ស្នាក់នៅក្នុងទីក្រុង ចុងឈីង ដែលជាទីកន្លែងចុងក្រោយនៃដំណើរទស្សនកិច្ចរយៈពេល ៩ថ្ងៃរបស់លោក​មកកាន់​ប្រទេសចិន។

លោក Wallace ដែលធ្លាប់ទស្សនកិច្ចទីក្រុងប៉េកាំង ស៊ីអាន និងទីក្រុងឆឹងទូ ក្នុងដំណើរទស្សនកិច្ចរបស់លោកកាលពីលើកទី១ បានថ្លែងថា លោកមានឱកាសដើម្បី​យល់ដឹងបន្ថែមអំពីប្រទេស និងប្រជាជនចិន។ ភាគច្រើនលើសលប់នៃពិភពលោកកំពុងតែបោះឆ្នោតដើម្បីសន្តិភាព ហើយចិនក៏ដូចគ្នាទៅនឹងសកលលោកទាំងមូលដែរ ដែលនោះគឺពិតជាការណ៍សំខាន់មិនគួរឱ្យជឿ។ “សហរដ្ឋអាម៉េរិក និងអង្គការ ណាតូមិនចង់ឱ្យសង្រ្គាមត្រូវបញ្ចប់នោះឡើយ ពួកគេបានចាប់ផ្តើមរារាំងសន្តិភាព ព្រោះបណ្តា​ប្រទេសជាសមាជិកអង្គការណាតូ  និងសហរដ្ឋអាម៉េរិក កំពុងតែបញ្ជូនសព្វាវុធដ៏ច្រើនសន្ធឹកទៅកាន់អ៊ុយក្រែន”។

លោក Wallace បានថ្លែងថា “នោះគឺជាការជួយធ្វើឱ្យសង្រ្គាមនៅបន្តកើតមាន”។ លោកបានសង្កត់ធ្ងន់ថា  សង្រ្គាមមួយនេះផ្តល់ផលប្រយោជន៍ដល់ឧស្សាហកម្មយោធា  សហរដ្ឋអាម៉េរិក និងអង្គការណាតូ។ មានអ្នកខ្លះមកពីអឺរ៉ុប មានភាពក្រអឺតក្រទមពេលមកប្រទេសចិន និងបានបង្រៀនចិនពីអ្វីដែលគួរធ្វើ និងមិនគួរធ្វើ ដែលការពិត​ក្នុងពេល​ដែលខ្លួនឯងកំពុងតែសម្របសម្រួលសង្រ្គាមតាមរយៈការបញ្ជូនអាវុធដ៏ច្រើនសន្ធឹកទៅក្នុងសង្រ្គាម។ មាននិន្នាការមួយដែលអឺរ៉ុបអាចនឹងធ្វើឱ្យ​អន្តរាយដល់​ជំហររបស់ខ្លួនជាមួយ ចិន ហើយនោះគឺជាទង្វើដ៏ឆ្កួតលីលាមួយ។

សមាជិកសភាអឺរ៉ុបរូបនេះបានថ្លែងបន្តថា ជនជាតិអាម៉េរិក ចង់រារាំងការរីកចម្រើនរបស់ចិន ហើយពួកគេចង់បានការគាំទ្រពីអឺរ៉ុបចំពោះទង្វើ​របស់ខ្លួន…ជនជាតិ​អាម៉េរិក​កំពុងរង់ចាំមើលអឺរ៉ុប និងចិនមានជម្លោះទាស់ទែងនឹងគ្នា។ ប្រសិនបើបណ្តាប្រទេសអឺរ៉ុបធ្វើការសម្រេចចិត្តដើម្បីបំពេញចិត្តអាម៉េរិក ជាជាងបំពេញចិត្តប្រជាជនអឺរ៉ុបខ្លួនឯង នោះជារឿងមួយគួរឱ្យក្រៀមក្រំណាស់ ប៉ុន្តែរឿងបែបនេះវាកំពុងតែកើតមានហើយនៅពេលនេះ។

http://ព័ត៌មានសភាទ្វីបអឺរ៉ុប ១៧-០៤-២៣- ឈាវ សុផាត ប្រែសម្រួលពី៖ http://www.china.org.cn/world/2023-04/16/content_85232224.htm