​បំផ្ទុះ​នុយក្លេអ៊ែរ​នៅ​កន្លែង​សាកល្បង​យោធា​អាមេរិក​ក្នុង​រដ្ឋ Nevada ថ្ងៃ​ទី២៤ ខែ​មិថុនា ឆ្នាំ១៩៥៧

សមាជិកសភាគណបក្សប្រជាធិបតេយ្យនៅក្នុងសភាតំណាង និងនៅក្នុងព្រឹទ្ធសភាសហរដ្ឋអាមេរិកបាន ដាក់សេចក្តីស្នើច្បាប់ ដែលនឹងបង្ខំសេតវិមានឱ្យស្វែងរក​ការយល់​ព្រមពីសភា មុននឹងបញ្ជាឱ្យមានការវាយ ប្រហារដោយប្រើប្រាស់អាវុធនុយក្លេអ៊ែរ។ សមាជិកសភាទាំងអស់នោះទទូចថាប្រធានាធិបតីមិនគួរមានសិទ្ធិជាឯកតោភាគី ដើម្បីចាប់ផ្តើមសង្គ្រាមនុយក្លេអ៊ែនោះទេ។

សេចក្តីស្នើច្បាប់ផ្តួចផ្តើមឡើងដោយលោក Ed Markey សមាជិកព្រឹទ្ធសភា និងលោក Ted Lieu សមាជិក សភាតំណាង កាលពីថ្ងៃសុក្រ ទី១៤ ខែមេសា បានឱ្យដឹងថា ច្បាប់ “រឹតបន្តឹងការប្រើប្រាស់អាវុធនុយក្លេអ៊ែរ ជាលើកទីមួយ” នឹងហាមឃាត់ប្រធានាធិបតីអាមេរិកពី “ការចាប់ផ្តើមប្រើប្រាស់នុយក្លេអ៊ែរដោយគ្មានការ​អនុញ្ញាត​ជាមុនពីសភា”។ សេចក្តីព្រាងច្បាប់បញ្ជាក់ឡើងវិញដែរនូវអំណាចសង្រ្គាមរបស់សមាជិកសភា ដែល មានចែងក្នុងរដ្ឋធម្មនុញ្ញរបស់សហរដ្ឋអាមេរិក។ លោក Markey បានមានប្រសាសន៍នៅក្នុងសេចក្តីថ្លែងការណ៍មួយថា “គ្មានប្រធានាធិបតីណាមួយមានសិទ្ធិ ឬសិទ្ធិអំណាចរដ្ឋធម្មនុញ្ញដើម្បីប្រកាសសង្គ្រាមជាឯកតោភាគី ដែលអនុញ្ញាត​ឱ្យមាន​ការវាយប្រហារដោយអាវុធនុយក្លេអ៊ែរជាលើកដំបូងឡើយ”។ លោក Lieu បានបន្ថែមថា “គ្មាននរណាម្នាក់គួរមានសមត្ថភាពក្នុងការចាប់ផ្តើម​សង្រ្គាមដែល​នឹង​បញ្ចប់ជីវិត ដូចដែល យើងដឹងនោះទេ”។ សមាជិកសភាទាំងពីររូបបានបន្តចោទប្រកាន់លោក Vladimir Putin ប្រធានាធិបតីសហ ព័ន្ធរុស្ស៊ីពី “ការគំរាមកំហែង​នុយក្លេអ៊ែរ” ដោយលើកហេតុផលថា ហានិភ័យនៃសង្គ្រាមនុយក្លេអ៊ែរ “គឺមាន សភាពធ្ងន់ធ្ងរមិនអាចប៉ាន់ស្មានបាន” ការលើកឡើងបែបនេះគឺនៅចំពេលជម្លោះដែលកំពុងផ្ទុះឡើងនៅក្នុង ប្រទេសអ៊ុយក្រែន។ ទោះជាយ៉ាងណាក៏ដោយទីក្រុងម៉ូស្គូបានច្រានចោលការចោទប្រកាន់បែបនេះ។ អ្នកនាំ ពាក្យវិមាន Kremlin  លោក Dmitry Peskov កាលពីពេលថ្មីៗនេះ​បាន​ថ្លែងថា សហរដ្ឋអាមេរិក និងសម្ព័ន្ធ មិត្តរបស់ខ្លួន “ងាយនឹងមានប្រតិកម្មខ្លាំង” លើប្រធានបទអាវុធនុយក្លេអ៊ែរ។

សមាជិកសភាគណបក្សប្រជាធិបតេយ្យទាំងពីររូបខាងលើ បានដាក់សេចក្តីស្នើសេចក្តីព្រាងច្បាប់ស្រដៀងគ្នានេះជាច្រើនដងរួចមកហើយក្នុងប៉ុន្មានឆ្នាំថ្មីៗនេះ ដោយម្នាក់ៗ​កំពុង​ស្វែងរកការរឹតត្បិតអំណាចរបស់ប្រធានាធិបតីក្នុងការបើកការវាយប្រហារនុយក្លេអ៊ែរ ប៉ុន្តែពួកគេមិនបានសម្រេចទេ ៕

http://ព័ត៌មានសភាទ្វីបអាមេរិក ១៧-០៤-២៣-ផាត់ ត្រដែត ប្រែសម្រួលពី៖ https://www.rt.com/news/574780-democrats-president-nuclear-powers/