លោក  You Si-kun ប្រធានសភាតៃវ៉ាន់(កណ្តាលស្តាំ) ទទួលស្វាគមន៍គណៈប្រតិភូសភាកាណាដា

ការិយាល័យ​ពាណិជ្ជកម្ម​កាណាដា​នៅទីក្រុង​តៃប៉ិបានឱ្យដឹងថា កាលពីថ្ងៃចន្ទ ទី១០ ខែមេសា ឆ្នាំ២០២៣ គណៈប្រតិភូសភាកាណាដាមួយក្រុមដែលមានសមាជិកចំនួន ១០នាក់ បានមកដល់កោះតៃវ៉ាន់ សម្រាប់ដំណើរទស្សនកិច្ចរយៈពេលមួយសប្តាហ៍ ដែលនឹងរួមបញ្ចូលទាំងកិច្ចប្រជុំជាមួយលោកស្រីប្រធា-នាធិបតី Tsai Ing-wen (蔡英文) និងមន្ត្រី​រដ្ឋាភិបាលជាន់ខ្ពស់តៃវ៉ាន់ដទៃទៀត។

លោក John McKay ប្រធានគណៈកម្មាធិការការពារជាតិរបស់សភាកាណាដាបានប្រាប់សារព័ត៌មាន CNA ក្នុងបទសម្ភាសន៍មួយកាលពីថ្ងៃទី០៧ ខែមេសា ថា គណៈប្រតិភូ​ពហុបក្សដែលធ្វើទស្សនកិច្ចរួមមាន សមាជិកសភាជាន់ខ្ពស់ជាច្រើនរូបក្នុងគណៈកម្មាធិការការពារជាតិ និងទំនាក់ទំនងការបរទេស រួមមាន លោក Stéphane Bergeron អនុប្រធាន​គណៈ កម្មាធិការ​កិច្ចការ​បរទេស និង​ការ​អភិវឌ្ឍ​អន្តរជាតិ និង​លោក Ken Hardie ប្រធាន​គណៈកម្មាធិការ​ពិសេស​ស្តីពី​ទំនាក់ទំនង​រវាង​កាណាដា និង​សាធារណរដ្ឋ​ប្រជាមានិត​ចិន។ ការិយាល័យពាណិជ្ជកម្មកាណាដានៅទីក្រុងតៃប៉ិ បាននិយាយនៅក្នុងគេហទំព័រហ្វេសប៊ុកថា ក្នុងអំឡុងពេលដំណើរទស្សនកិច្ចនេះ ក្រុមសមាជិកសភានឹង​ជួបពិភាក្សា​​ការងារ​ជាមួយលោកស្រី ប្រធានាធិបតី Tsai និងលោកអនុប្រធានាធិបតី Lai Ching-te (賴清德) ក៏ដូចជាជាមួយអ្នកតំណាងសហគមន៍ធុរកិច្ច និងអង្គការក្រៅ​រដ្ឋាភិបាលក្នុងស្រុក។ ក្រុមសមាជិកសភាក៏គ្រោងនឹងអញ្ជើញទៅទស្សនា សារមន្ទីរព្រះបរមរាជវាំងជាតិ និងការតាំងពិព័រណ៍សិល្ប: ជនជាតិដើមភាគតិចកាណាដា នៅ​សារមន្ទីរ Shung Ye នៃជនជាតិដើមភាគតិច Formosan ទីក្រុងតៃប៉ិ។

នេះគឺជាដំណើរទស្សនកិច្ចជាលើកទីពីររបស់ក្រុមសមាជិកសភាកាណាដា ចាប់តាំងពីការចាប់ផ្តើមនៃជំងឺរាតត្បាតកូវីដ-១៩ បន្ទាប់ពីដំណើរទស្សនកិច្ចរបស់គណៈប្រតិភូ​ដែលដឹកនាំដោយសមាជិកសភាលោក Judy Sgro មកពីគណបក្សសេរីនិយម កាលពីខែតុលា ឆ្នាំមុន ៕

http://ព័ត៌មានសភាទ្វីបអាមេរិក ១១-០៤-២៣-ផាត់ ត្រដែត ប្រែសម្រួលពី៖ https://focustaiwan.tw/politics/202304100015