កងទ័ពជើងទឹកតៃវ៉ាន់ ចុះត្រួតពិនិត្យដែនសមុទ្រ

កាលពីថ្ងៃសៅរ៍ ទី០៨ ខែមេសា​ ឆ្នាំ២០២៣ សាធារណរដ្ឋប្រជាមានិតចិនបានចាប់ផ្តើមសមយុទ្ធយោធា នៅជុំវិញកោះតៃវ៉ាន់ នៅក្នុងអ្វីដែលខ្លួនហៅថា “ជាការព្រមាន​យ៉ាងតឹងរ៉ឹង” ដល់រដ្ឋាភិបាលរបស់កោះតៃវ៉ាន់ ដែលគ្រប់គ្រងដោយខ្លួនឯង បន្ទាប់ពីកិច្ចប្រជុំរវាងប្រធានាធិបតីរបស់ខ្លួន និងប្រធានសភាតំណាងសហរដ្ឋ អាមេរិក។

ទង្វើនេះបានជំរុញឱ្យមានការថ្កោលទោសពីទីក្រុងតៃប៉ិ និងអំពាវនាវឱ្យមានការអត់ធ្មត់ពីទីក្រុងវ៉ាស៊ីន តោន ដោយបាននិយាយថា ខ្លួនកំពុង “ឃ្លាំមើលសកម្មភាព​របស់​ទីក្រុងប៉េកាំងយ៉ាងជិតស្និទ្ធ”។ កងកម្លាំង រំដោះប្រជាជនចិន (PLA) បាននិយាយនៅក្នុងសេចក្តីថ្លែងការណ៍មួយថា ប្រតិបត្តិការ United Sharp Sword រយៈពេលបីថ្ងៃ ដែល​ប្រព័ន្ធផ្សព្វផ្សាយរដ្ឋបាននិយាយថា រួមបញ្ចូលទាំងការហាត់សមការឡោមព័ទ្ធកោះតៃ វ៉ាន់នឹងប្រព្រឹត្តទៅរហូតដល់ថ្ងៃចន្ទ ទី១០ ខែមេសា។ លោក Shi Yin អ្នកនាំពាក្យ PLA បានមាន​​​ប្រសាសន៍ថា ប្រទេសចិននឹងបញ្ជូនយន្តហោះ នាវា និងកងទាហានរបស់ខ្លួនចូលទៅក្នុងដែនសមុទ្រ និងដែនអាកាស នៃច្រកសមុទ្រតៃវ៉ាន់ ដោយចេញពីឆ្នេរសមុទ្រ​ភាគខាងជើង និងភាគខាងត្បូងនៃកោះ និងបន្តទៅកាន់ភាគ ខាងកើតរបស់កោះតៃវ៉ាន់។ របាយការណ៍ពីទូរទស្សន៍រដ្ឋ CCTV បានឱ្យដឹងថា “កងកម្លាំងប្រដាប់អាវុធដែល រៀបចំសម្រាប់​ប្រតិបត្តិការពិសេស និងឈានទៅមុខជុំវិញកោះតៃវ៉ាន់ ដោយបង្កើតការឡោមព័ទ្ធគ្រប់ជ្រុង ជ្រោយ និងក្នុងស្ថានភាពមិនញញើត”។ របាយការណ៍នេះ​បានរៀបរាប់លម្អិតអំពីប្រភេទសព្វាវុធដែលចិន នឹងប្រើប្រាស់រួមមាន កាំភ្លើងធំគ្រាប់រ៉ុក្កែតរយៈចម្ងាយឆ្ងាយ នាវាពិឃាតកងទ័ពជើងទឹក នាវាផ្ទុកកាំជ្រួច យន្តហោះចម្បាំង យន្តហោះទម្លាក់គ្រាប់។

លោកស្រី Tsai Ing-wen ប្រធានាធិបតីតៃវ៉ាន់បានប្រកាសថ្កោលទោសចំពេលសមយុទ្ធយោធា កើតឡើង បន្ទាប់ពីលោកស្រីបានជួបជាមួយប្រធានសភាអាមេរិក លោក Kevin McCarthy នៅរដ្ឋកាលីហ្វ័រញ៉ា។ លោក ស្រី Tsai បានសន្យាថានឹងធ្វើការជាមួយសហរដ្ឋអាមេរិក និងប្រទេសដែលមានគំនិតដូចគ្នា ដើម្បីប្រឈមមុខ នឹង “ការពង្រីកអំណាចផ្តាច់ការបន្តរបស់ចិន”។ សហរដ្ឋ​អាមេរិក​មាន​ភាព​ស្រពេចស្រពិល​លើ​ថា​តើ​ខ្លួន​នឹង ​ការពារ​តៃវ៉ាន់​ដោយ​យោធា​ឬ​យ៉ាង​ណា បើ​ទោះ​ជា​អស់​រយៈពេល​ជាច្រើន​ទសវត្សរ៍​ដែល​ខ្លួន​បាន​លក់​សព្វាវុធ ​ទៅ​ឱ្យ​តៃប៉ិ​ដើម្បី​ជួយ​ការពារ​ខ្លួន។ ក្រសួងការពារជាតិរបស់តៃវ៉ាន់បានឱ្យដឹងថា គិតត្រឹមម៉ោង ៤រសៀល (ម៉ោងក្នុងតំបន់) នៅថ្ងៃសៅរ៍ ទី០៨ ខែមេសា នាវាចម្បាំងចិនចំនួន ៩គ្រឿង និងយន្តហោះយោធាចំនួន ៧១គ្រឿង ត្រូវបានរកឃើញនៅជុំវិញកោះតៃវ៉ាន់….៕

http://ព័ត៌មានសភាទ្វីបអាមេរិក ១០-០៤-២៣