លោកស្រី Sanna Mirella Marin នាយករដ្ឋមន្រ្តីផុតអាណត្តិនៃសាធារណរដ្ឋហ្វាំងឡង់នឹងចុះចេញពីតំណែងប្រមុខគណបក្សសង្គមប្រជាធិបតេយ្យ (SDP) របស់លោកស្រី និងបោះបង់តួនាទីជាមេដឹកនាំផ្សេងៗទៀត បន្ទាប់ពីបរាជ័យក្នុងការបោះឆ្នោតជ្រើសតាំងសមាជិកសភា កាលពីថ្ងៃអាទិត្យ ទី០២ ខែ  មេសា ឆ្នាំ២០២៣។ ថ្លែងទៅកាន់​អ្នកសារព័ត៌មាននៅក្នុងរដ្ឋធានីហែលស៊ិនគី លោកស្រី Marin បានថ្លែងថា លោកស្រីបានសម្រេចចិត្តមិនបន្តធ្វើជាមេដឹកនាំគណបក្សនៅក្នុងខែកញ្ញា ឆ្នាំ២០២៣ និងទាត់ចោលបេក្ខភាពជាប្រធាន ក្រោយពីទទួលស្គាល់ការចាញ់ឆ្នោត និងមានផែនការវិលត្រឡប់ទៅធ្វើជាសមាជិកសភាហ្វាំងឡង់វិញ។

លោកស្រី Marin បានថ្លែងថា “នេះជាពេលវេលាដ៏លំបាកមួយ ដោយលោកស្រីបានច្រានចោលតួនាទីជារដ្ឋមន្រ្តី ប្រសិនបើគណបក្សសង្គមប្រជាធិបតេយ្យ (SDP) ចូលរួមក្នុងរដ្ឋាភិបាលចម្រុះថ្មីមួយ”។ លោកស្រីទទួលស្គាល់ដោយស្មោះត្រង់ថា ភាពស៊ូទ្រាំ និងភាពអំណត់អត់ធន់របស់លោកស្រីត្រូវបានស្ថិត ក្នុងការធ្វើតេស្ត ក្នុងអំឡុង​ពេលប៉ុន្មានឆ្នាំមកនេះ។

លោកស្រី Marin  វ័យ៣៧ឆ្នាំ បានក្លាយជានាយករដ្ឋមន្រ្តីវ័យក្មេងជាងគេប្រចាំសហសវត្សរ៍ បន្ទាប់ពីការចូលកាន់តំណែងកាលពីឆ្នាំ២០១៩ បានចាញ់ឆ្នោតកាលពីថ្ងៃអាទិត្យ​ពីក្រុមគណបក្សប្រឆាំងក្រុមចម្រុះជាតិ។ ជាមួយនឹងគណបក្សប្រឆាំងនឹងជនអន្តោប្រវេសន៍​ ក៏ទទួលបានការគាំទ្រដ៏ខ្លាំងក្លាជាងគណបក្សសង្គមប្រជាធិបតេយ្យ (SDP)របស់លោកស្រីផងដែរ ការបោះឆ្នោតលើកនេះសង្កត់ធ្ងន់លើក្តីបារម្ភពាក់ព័ន្ធនឹងឱនភាពថវិកា និងបញ្ហាផ្សេងៗនៅក្នុងប្រទេស។ លោកស្រី Marin គឺជាស្រ្តីប្រមុខ​រដ្ឋាភិបាល​ទី៣ហើយ ដែលចុះចេញពីតំណែង នៅក្នុងរយៈពេលដ៏ខ្លីនេះ បន្ទាប់ពីការលាលែងពីតំណែងរបស់លោកស្រី Jacinda Ardern នៅនូវែលសេឡង់ និងលោកស្រី Nicola Sturgeon នៅស្កុតលែន។

លោក Petteri Orpo មេដឹកនាំគណបក្សចម្រុះជាតិ ដែលនឹងឡើងជានាយករដ្ឋមន្រ្តីជំនួសតំណែងលោកស្រី Marin បានថ្លែងថា ការចាប់ផ្តើមការចរចាទំនងជានឹងធ្វើឡើង​នៅថ្ងៃទី១៤ ខែមេសា ឆ្នាំ២០២៣ បន្ទាប់ពីសភាកោះប្រជុំ ដោយសង្ឃឹមថានឹងបង្កើតបានរដ្ឋាភិបាលចម្រុះនៅត្រឹមថ្ងៃទី២៣ ខែមិថុនា ចំរដូវ កាលសម្រាកពាក់កណ្តាល​រដូវក្តៅ។ លោក Orpo បានថ្លែងបន្តថា លោកមានផែនការស្នើដល់គណបក្សដែលជាប់ឆ្នោតនៅក្នុងសភាទាំងអស់ចូលរួមក្នុងការចរចាដំណាក់កាលទី១ ​ស្តីពីការបង្កើត​រដ្ឋាភិបាលថ្មី៕

http://ព័ត៌មានសភាទ្វីបអឺរ៉ុប ០៦-០៤-២៣- ឈាវ សុផាត ប្រែសម្រួលពី៖ https://thepeninsulaqatar.com/article/05/04/2023/finlands-premier-marin-to-step-down-after-election-loss