ទិដ្ឋភាពទូទៅក្នុងសម័យប្រជុំសភានៃប្រទេសហុងគ្រី

រដ្ឋធានីប៊ុយដាប៉ែស៖ កាលពីថ្ងៃចន្ទ ទី២៧ ខែមីនា ឆ្នាំ២០២៣ សភាប្រទេសហុងគ្រី ដែលគ្រប់  គ្រងដោយគណបក្សស្តាំនិយម គឺគណបក្ស Fidesz  របស់លោក Viktor Orban នាយករដ្ឋមន្រ្តីហុងគ្រី បានផ្តល់សច្ចាប័នលើលើសមាជិកភាពអង្គការណាតូ របស់សាធារណរដ្ឋហ្វាំងឡង់ ក្រោយពីបានពន្យារ ពេលអស់ជាច្រើនខែ ដោយសារតែ​បញ្ហាការទូត។ សមាជិកសភាសំឡេងភាគច្រើន ១៨២សំឡេងទល់ នឹង ៦សំឡេង បានផ្តល់សច្ចាប័នលើការស្នើរបស់ប្រទេសក្នុងតំបន់ Nordic មួយនេះសុំចូលក្នុង​អង្គការ​សម្ព័ន្ធមិត្តយោធាណាតូ។

ការបោះឆ្នោតខាងលើនេះ មានន័យថា ២៩ នៃ៣០ សភានៃប្រទេសជាសមាជិកអង្គការណាតូបានផ្តល់សច្ចាប័នលើការស្នើសុំចូលជាសមាជិករបស់ហ្វាំងឡង់ ហើយចុង​ក្រោយគេ គឺសភាតួកគីត្រូវបានគេរំពឹងថាក៏នឹងផ្តល់ការយល់ព្រមនៅខែមេសា ឆ្នាំ២០២៣ផងដែរ។ លោកស្រី Sanna Marin នាយករដ្ឋមន្រ្តីហ្វាំងឡង់បានបង្ហោះសារលើ​បណ្តាញសង្គម Twitter របស់លោកស្រី បន្ទាប់ពីការបោះឆ្នោតថា “អរគុណចំពោះការសម្រេចចិត្តរបស់អ្នកក្នុងសំឡេងដ៏ច្រើនលើសលប់”។ ការពង្រីកអង្គការណាតូចូលក្នុង​ប្រទេស ហ្វាំងឡង់ដែលជាប្រទេសមួយមានព្រំដែនជាប់ជាមួយរុស្ស៊ីប្រវែង ១,៣៤០គម (៨៣០ម៉ាយ) នឹងបង្កើន ទំហំ២ដង នៃព្រំដែនបច្ចុប្បន្នរបស់ប្លុកណាតូជាមួយ​នឹងបច្ចាមិត្តក្នុងសម័យសង្រ្គាមត្រជាក់របស់ពួកគេ។

ប្រទេសហ្វាំងឡង់បានផ្តួចផ្តើមគំនិតចូលក្នុងអង្គការណាតូរួមគ្នាជាមួយនឹងសហសេវិកស៊ុយអែត។ លោកស្រី Marin បានថ្លែងថា “សមាជិកភាពរបស់ហ្វាំងឡង់ និង​ស៊ុយអែតចូលក្នុងអង្គការណាតូនឹងពង្រឹងសន្តិសុខរបស់អង្គការនេះទាំងមូល”។ គ្រប់គ្នាចាប់អារម្មណ៍ថា ស៊ុយអែតក៏នឹងក្លាយជាសមាជិកអង្គការណាតូផងដែរ នៅមុនកិច្ច​ប្រជុំកំពូលអង្គការណាតូ នាទីក្រុងវីលីញូស។ រដ្ឋាភិបាលទីក្រុងហែលស៊ិនគី និងរាជរដ្ឋាភិបាលទីក្រុងស្តុកខុល បានបញ្ចប់ការមិនចូលទ័ពបក្សសម្ព័ន្ធមិត្តជាច្រើនទសវត្សរ៍មក ហើយរបស់ខ្លួន ហើយបានសម្រេចចិត្តចូលក្នុងទ័ពសម្ព័ន្ធមិត្តដ៏មានឥទ្ធិពលបំផុតក្នុងពិភពលោកមួយនេះ បន្ទាប់ពីសហព័ន្ធរុស្ស៊ីបានចូលឈ្លានពានក្នុងប្រទេសអ៊ុយក្រែន។ការដាក់ពាក្យស្នើសុំចូលជាសមាជិកអង្គការណាតូរបស់សាធារណរដ្ឋហ្វាំងឡង់ និងព្រះរាជាណាចក្រស៊ុយអែតត្រូវបានកិច្ចប្រជុំកំពូលអង្គការណាតូ ខែមិថុនា ឆ្នាំ២០២២ សម្រេចទទួលយក ប៉ុន្តែចាំបាច់ត្រូវតែទទួលបានការផ្តល់សច្ចាប័នពីសភានៃប្រទេសដែលជាសមាជិកអង្គការទ័ពសម្ព័ន្ធមិត្តណាតូទាំងអស់៕

http://ព័ត៌មានសភាទ្វីបអឺរ៉ុប ២៩-០៣-២៣- ឈាវ សុផាត ប្រែសម្រួលពី៖ https://www.urdupoint.com/en/miscellaneous/hungarian-parliament-ratifies-finland-nato-ac-1666639.html