រោងចក្រថាមពលនុយក្លេអ៊ែរនៅក្នុងប្រទេសបារាំង

សភានៃសាធារណរដ្ឋបារាំងបានបោះឆ្នោតដោយសំឡេងភាគច្រើនលើសលប់គាំទ្រផែនការរបស់ រដ្ឋាភិបាលសម្រាប់ការវិនិយោគនុយក្លេអ៊ែរ។ ការបោះឆ្នោតនេះបាន​ធ្វើឡើង​តែ​ប៉ុន្មានថ្ងៃប៉ុណ្ណោះ បន្ទាប់ពីរដ្ឋាភិបាលបារាំងបានរួចផុតពីការបោះឆ្នោតដកសេចក្តីទុកចិត្តយ៉ាងប្រផិតប្រផើយពីសភា ពាក់ព័ន្ធនឹងផែនការកំណែទម្រង់សោធននិវត្ត។

ជាមួយនឹងសំឡេងគាំទ្រ ៤០២ ទល់នឹង១៣០សំឡេង ផែនការបន្តនុយក្លេអ៊ែជាថ្មីត្រូវបានសភាអនុម័តគាំទ្រ ធាតុផ្សំដ៏សំខាន់ នោះគឺការសាងសង់រេអាក់ទ័របន្ថែមចំនួន ៦ទៀត។ សមាជិកសភាចំនួន ២៧៨រូប បានគាំទ្រញត្តិមួយដែលស្នើឡើងដោយគណបក្សប្រឆាំងស្តីពីការដកសេចក្តីទុកចិត្តពីរដ្ឋា     ភិបាលកាលពីថ្ងៃចន្ទដើមសប្តាហ៍ គឺខ្វះតែ ៩សំឡេងប៉ុណ្ណោះ ដែលសំឡេងចាំបាច់គឺ ២៨៧សំឡេង ដើម្បីអាចទម្លាក់រដ្ឋាភិបាលចេញពីតំណែងបាន។ លោកស្រី Elisabeth Borne នាយករដ្ឋមន្រ្តីបារាំងបានបង្ហោះសារ​ក្នុងបណ្តាញសង្គម Twitter ថា “បន្ទាប់ពីព្រឹទ្ធសភាកាលពីខែមុន យប់នេះសភាជាន់ទាបបានបោះឆ្នោតក្នុងសំឡេងភាគច្រើនលើសលប់គាំទ្រ​ផែនការថាមពល​នុយក្លេអ៊ែរ​…គោលបំណងនៃការសាងសង់ គឺដើម្បី ប្រយុទ្ធប្រឆាំងនឹងបម្រែបម្រួលអាកាសធាតុ និងធានាអធិបតេយ្យភាពថាមពលរបស់យើង”។

បន្ទាប់ពីរដ្ឋាភិបាលរបស់លោកស្ទើរតែដួលរលំ និងបង្ខំឱ្យលាលែងពីតំណែងពាក់ព័ន្ធនឹងផែនការ កំណែទម្រង់សោធននិវត្តនោះ លោកប្រធានាធិបតី Emmanuel Marcron ចង់ទទួលបានការគាំទ្រមកវិញ តាមរយៈគំនិតផ្តួចផ្តើមកំណែទម្រង់ថ្មីមួយនេះ នៅក្នុងប៉ុន្មានសបា្តហ៍បន្ទាប់។ ថាមពលនុយក្លេអ៊ែរ ក៏ជា ផែនការមួយដែលគណបក្ស​និយមកណ្តាលរបស់លោក Marcron បានព្រមព្រៀងគ្នាជាមួយគណបក្ស អភិរក្សទាំងពីរ គឺគណបក្ស Les Republicains និងគណបក្សស្តាំនិយមជ្រុល Rassemblement National។

លោកស្រី Agnes Pannier Runacher រដ្ឋមន្រ្តីក្រសួងថាមពលបានថ្លែងថា “គោលដៅរបស់យើង” គឺធ្វើយ៉ាងណាឱ្យបារាំងក្លាយជាប្រទេសមួយដែលគ្មានកាបូន និងអធិប​តេយ្យ​ភាពដ៏ចម្បងមួយ លោក-ស្រីថា  នេះគឺជាគម្រោងដ៏មហិមាមុនគេ នៅក្នុងការចាប់ផ្តើមឡើងវិញក្នុងឧស្សាហកម្មនុយក្លេអ៊ែរ។ លោក Macron មានផែនការចាប់ផ្តើម​សាងសង់​រេអាក់ទ័រនុយក្លេអ៊ែជំនាន់ថ្មី EPR2 ក្នុងអាណត្តិទី២របស់លោក ខែឧសភា ឆ្នាំ២០២៧។ នេះគឺជាផ្នែកមួយនៃផែនការថវិកា៥២ពាន់លានអឺរូ ត្រូវជា ៥៦​ពាន់លាន​​​​​ដុល្លារ សម្រាប់សាងសង់រេអាក់ទ័រថ្មីបន្ថែម ចំនួន៦៕

http://ព័ត៌មានសភាទ្វីបអឺរ៉ុប ២៤-០៣-២៣- ឈាវ សុផាត ប្រែសម្រួលពី៖ https://www.eureporter.co/world/france-world/2023/03/23/french-parliament-votes-nuclear-plan-with-large-majority/