ស្ថានទូតចិនប្រចាំទីក្រុងឡុងដ៏

រដ្ឋធានីតៃប៉ិ៖ កាលពីថ្ងៃអាទិត្យ ទី១៩ ខែមីនា ឆ្នាំ២០២៣ ស្ថានទូតចិនប្រចាំចក្រភពអង់គ្លេស បានប្រកាសអំពីដំណើរទស្សនកិច្ចរបស់គណៈប្រតិភូសមាជិកសភាអង់គ្លេស ទៅកាន់កោះតៃវ៉ាន់ក្នុងសប្តាហ៍នេះ។ សមាជិកសភា ១ ក្រុម មានសមាជិក ៦ រូប ដឹកនាំដោយលោក Bob Stewart ប្រធានក្រុមមិត្តភាពសភាជាមួយ​គណបក្សនយោបាយ​តៃវ៉ាន់​ទាំងអស់ បានអញ្ជើញមកដល់កោះតៃវ៉ាន់ កាលពី   ថ្ងៃអាទិត្យ ទី១៩ ខែមីនា ឆ្នាំ២០២៣ សម្រាប់ដំណើរទស្សនកិច្ចរយៈពេល ៦ ថ្ងៃ នេះបើយោងតាមការឱ្យដឹងពី​សារ​ព័ត៌មាន CNA។ គណៈប្រតិភូសភាអង់គ្លេសនេះ គ្រោងជួបពិភាក្សាការងារជាមួយ​លោកស្រី Tsai Ing-wen ប្រធានាធិបតីកោះតៃវ៉ាន់ នារសៀលថ្ងៃចន្ទ ទី២០ ខែមីនា ឆ្នាំ២០២៣ នេះ នេះបើយោងតាមការឱ្យដឹងពីខុទ្ទកាល័យប្រធានាធិបតីចិន។

សារព័ត៌មាន Reuters បានឱ្យដឹងថា ស្ថានទូតចិនប្រចាំទីក្រុងឡុងដ៏ បានចេញសេចក្តីថ្លែងការណ៍ របស់ខ្លួនថា ក្រុមសមាជិកសភាអង់គ្លេសនេះ ចង់ធ្វើទស្សនកិច្ចនៅតំបន់​កោះតៃវ៉ាន់ចិន ទោះបីមានការប្រឆាំងដាច់ខាតពីប្រទេសចិន យ៉ាងណាក៏ដោយ។ ស្ថានទូតចិនដដែលនេះ ក៏បានឱ្យដឹងទៀតថា នេះគឺជាការជ្រៀតជ្រែកមួយយ៉ាងធំ​ចូលកិច្ចការ​ផ្ទៃក្នុងរបស់ចិន និងជាសញ្ញាខុសឆ្គងធ្ងន់ធ្ងរមួយរបស់កងកម្លាំងផ្តាច់ខ្លួនឯករាជ្យតៃវ៉ាន់។

ក្រៅពីលោក Stewart ក៏មានគណៈប្រតិភូសមាជិកសភាជាន់ទាបអង់គ្លេស (House of Commons) ផងដែរ ដែលក្នុងនោះរួមមាន លោក Rob Butler សមាជិកសភា, លោកស្រី Sarah Atherton សមាជិកាសភា, លោក Tanmanjeet Singh Dhesi សមាជិកសភា, លោក Afzal Khan សមាជិកសភា, លោកស្រី Marie Rimmer សមាជិកា​សភា នេះបើយោងតាមការឱ្យដឹងពីក្រសួងការបរទេសចិន។​ គណៈប្រតិភូសភាអង់គ្លេសនេះ ក៏គ្រោងជួបពិភាក្សាការងារផងដែរ ជាមួយលោក Chen Chien-jen នាយក​រដ្ឋមន្ត្រី​កោះតៃវ៉ាន់, លោក Wellington Koo អគ្គលេខាធិការក្រុមប្រឹក្សាសន្តិសុខជាតិ, លោក You Si-kun ប្រធានសភានីតិប្បញ្ញត្តិ​ និងលោក Joseph Wu រដ្ឋមន្ត្រីក្រសួង​ការបរទេស។

គណៈប្រតិភូសភាចក្រភពអង់គ្លេសនេះ ក៏គ្រោងធ្វើទស្សនកិច្ចនៅក្រសួងសេដ្ឋកិច្ច និងក្រុមប្រឹក្សាចិនដីគោកផងដែរ មុនបញ្ចប់ដំណើរទស្សនកិច្ចរបស់ខ្លួននៅថ្ងៃទី២៤ ខែមីនា ឆ្នាំ២០២៣ ខាងមុខ៕

http://ព័ត៌មានសភាទ្វីបអាស៊ី ២១-០៣-២៣-កែវ ធាវី ប្រែសម្រួលពី៖ https://www.taiwannews.com.tw/en/news/4841067