លោក Vladimir Vladimirovich Putin ប្រធានាធិបតីសហព័ន្ធរុស្ស៊ី

     សភាអ៊ុយក្រែន​បានអនុម័តសេចក្តីថ្លែងការណ៍មួយស្តីពីការនាំខ្លួនមេដឹកនាំសហព័ន្ធរុស្ស៊ី មកផ្តន្ទា ទោសចំពោះបទឧក្រិដ្ឋប្រព្រឹត្តនៅក្នុងប្រទេសអ៊ុយក្រេន ជាពិសេស ដើម្បីអនុវត្តន៍សេចក្តីសម្រេចរបស់តុលាការ ព្រហ្មទណ្ឌអន្តរជាតិ ដោយចាប់ខ្លួនលោក Vladimir Vladimirovich Putin និងលោកស្រី Maria Lvova-Belova ។

លោក Yaroslav Zhelezniak បានបង្ហោះសារក្នុងបណ្តាញទំនាក់ទំនងសង្គមតេឡេក្រាមរបស់លោកថា សភាអ៊ុយក្រែនបានចេញសេចក្តីសម្រេចលេខ ៩១២២ ទទូច​ឱ្យ​ភាគីទាំងឡាយនៃលក្ខន្តិកៈ  ទីក្រុងរ៉ូមចាត់វិធានការតាមដែលអាចធ្វើបាន ដើម្បីអនុវត្តន៍សេចក្តីសម្រេចរបស់សវនការមុនពេលជម្រះក្តីរបស់តុលាការព្រហ្មទណ្ឌអន្តរជាតិ (ICC) ដើម្បីចេញដីកាចាប់ខ្លួនលោក​ប្រធានាធិបតី Putin និងលោក-ស្រី Lvova-Belova ស្នងការសិទ្ធិកុមារនៅក្នុងការិយាល័យប្រធានាធិបតីរុស្ស៊ី និងដើម្បីបញ្ជូនអ្នកទាំងពីរ​ទៅកាន់តុលាការ  ដោយអនុលោមទៅតាមកាតព្វកិច្ចរបស់ខ្លួនក្រោមលក្ខនិ្តកៈទីក្រុងរ៉ូម។

ឧក្រិដ្ឋកម្មរបស់រុស្ស៊ីនៅក្នុងប្រទេសអ៊ុយក្រែន ត្រូវបានអនុវត្តន៍តាមបញ្ជាផ្ទាល់ពីអ្នកនយោបាយ ជាន់ខ្ពស់ និងមេដឹកនាំយោធារុស្ស៊ីដែលជាការរំលោភបំពាន​យ៉ាងធ្ងន់ធ្ងរ​ទៅនឹងបទដ្ឋាននៃច្បាប់អន្តរជាតិ បច្ចុប្បន្ន ដែលទាមទារមានការឆ្លើយតបយ៉ាងម៉ឺងម៉ាត់ និងប្រកបដោយប្រសិទ្ធភាព ពីសហគមន៍អន្តរជាតិ តាមរយៈការនាំយកមេដឹកនាំរុស្ស៊ី​មក​ទទួលខុសត្រូវចំពោះឧក្រិដ្ឋកម្មអន្តរជាតិ។  សេចក្តីសម្រេចខាងលើបានទទូចឱ្យអង្គការសហប្រជាជាតិ អង្គការសភាអន្តរជាតិ សភា និងរដ្ឋាភិបាលប្រទេសនានា​ទូទាំង​ពិភពលោក ថ្កោលទោសខ្លាំងក្លាលើឧក្រិដ្ឋកម្មដ៏ធ្ងន់ធ្ងររបស់រុស្ស៊ី និងចាត់វិធានគ្រប់មធ្យោបាយតាមដែលអាចធ្វើបានដើម្បីស៊ើបអង្កេតពួកគេ។។

សេចក្តីសម្រចដដែលក៏បានអំពាវនាវឱ្យបង្កើតយន្តការអន្តរជាតិមួយ ដើម្បីទូទាត់សំណងការខូច  ខាត និងការបាត់បង់ដែលបង្កឡើងដោយសកម្មភាពខុសច្បាប់របស់រុស្ស៊ី និងបង្កើតសាលាជម្រះក្តីពិសេសមួយចំពោះការឈ្លានពានរបស់រុស្ស៊ីមកលើអ៊ុយក្រែន។ សេចក្តីសម្រេចខាងលើទទួលបានការបោះឆ្នោតគាំទ្រពីសមាជិកសភាអ៊ុយក្រែន​ចំនួន ៣៣៥រូប។ គួរបញ្ជាក់ផងដែរថា កាលពីថ្ងៃទី១៧ ខែមីនា ឆ្នាំ២០២៣ សវនការមុនពេលជម្រះក្តីរបស់តុលាការ ICC បានចេញដីកាចាប់ខ្លួនប្រធានាធិបតីរុស្ស៊ី និងលោកស្រី Lvo va-Bel ova។ ប៉ុន្តែរុស្ស៊ីបានឆ្លើយតបវិញថា តុលាការ ICC គ្មានសិទ្ធិអំណាចអ្វីមកលើទឹកដីរុស្ស៊ីនោះឡើយ៕

http://ព័ត៌មានសភាទ្វីបអឺរ៉ុប ២១-០៣-២៣- ឈាវ សុផាត ប្រែសម្រួលពី៖ https://news.yahoo.com/ukrainian-parliament-calls-implementation-icc-135658893.html