គណបក្ស Amanat ទទួលបានអាសនៈ ភាគច្រើនក្នុងការបោះឆ្នោតជ្រើសតាំងសមាជិកសភាកាហ្សាក់ស្ថាន

គណបក្សកាន់អំណាចក្នុងសាធារណរដ្ឋកាហ្សាក់ស្ថាន ទទួលបានសំឡេងឆ្នោតជាងពាក់កណ្តាលនៅ ក្នុងការបោះឆ្នោតជ្រើសតាំសមាជិកសភាជាន់ទាប។ នេះបើយោងតាម​លទ្ធផលបឋមដែលប្រកាសចេញកាលពីថ្ងៃចន្ទ ទី២០ ខែមីនា ឆ្នាំ២០២៣ ប៉ុន្តែអាសនៈសរុបចុងក្រោយនៅមិនទាន់ច្បាស់លាស់នៅឡើយ។ ជាផ្នែកមួយនៃ​កំណែទម្រង់​នយោបាយនៅក្នុងប្រជាជាតិអាស៊ីកណ្តាលមួយនេះ អាសនៈសភា មួយភាគបី នៅក្នុងការបោះឆ្នោត​មុនកាលកំណត់នេះត្រូវបានប្រកួត​ប្រជែងដោយបេក្ខជនឯកត្តបុគ្គល​ដែលពីមុនមក អាសនៈ​សភាទាំងអស់ត្រូវបានជ្រើសរើសតាមបញ្ជីឈ្មោះរបស់គណបក្ស។

គណៈកម្មការជាតិរៀបចំការបោះឆ្នោតកាហ្សាក់ស្ថានបានថ្លែងថា គណបក្ស Amanat របស់លោក ប្រធានាធិបតី Kassym-Jomart Tokayev ទទួលបាន ៥៣.៩% នៃការបោះឆ្នោតកាលពីថ្ងៃអាទិត្យ គណបក្សចំនួន ៥ ផ្សេងទៀត បានឆ្លងផុតរបាំងចាំបាច់ ៥% ដើម្បីទទួលបានអាសនៈ ក្នុងនោះរួមទាំង គណបក្សដែលស្មោះស្ម័គ្រនឹង​លោកប្រធានាធិបតី Tokayev ផងដែរ។ ការបោះឆ្នោតមុនកាលកំណត់បានធ្វើឡើងនៅចំខួប ៤ឆ្នាំ នៃការលាលែងពីតំណែងរបស់ប្រធានាធិបតី Nursultan Nazarbayev ដែលបាន ដឹកនាំប្រទេសចាប់តាំងពីទទួលបានឯករាជ្យ បន្ទាប់ពីការដួលរលំអតីតសហភាពសូវៀតក្នុងឆ្នាំ១៩៩១ និងជាអ្នកដែលបានបង្កើតនូវឥទ្ធិពលដ៏ខ្លាំងក្លាមួយ។

លោក Tokayev ដែលជាអ្នកបន្តវេនពីលោក Nazarbayev ត្រូវបានគេរំពឹងជាទូទៅថានឹងបន្តភាព    ផ្តាច់ការពីលោក Nazarbayev ហើយលោកថែមទាំងបានប្តូរ​ឈ្មោះ​រដ្ឋធានីជា Nur-sultan ដើម្បីជាកិត្តិយសដល់លោកលោកប្រធានាធិបតីមុន។ ប៉ុន្តែទិដ្ឋភាពនយោបាយជាតិបានប្រែប្រួល​ បន្ទាប់ពីរលកនៃអំពើហិង្សានៅក្នុងខែមករា ឆ្នាំ២០២២ ដែលនៅពេលនោះ បាតុកម្មតវ៉ាដែលដំបូងឡើយធ្វើឡើងនៅតាមខេត្តដែលបង្កឡើងដោយសារតែប្រេងឡើងថ្លៃ បានឡោមព័ទ្ធទីក្រុងផ្សេងៗទៀត ជាពិសេស ទីក្រុងពាណិជ្ជកម្ម Almaty និងបានក្លាយទៅជាបាតុកម្មនយោបាយជាចំហ ដូចដែលបាតុករបានស្រែកថា “តាចាស់ចាកចេញទៅ” ដោយ ពួកគេសំដៅដល់លោក Nursultan Nazarbayev ដែលនៅពេលនេះ លោកមានវ័យ៨២ឆ្នាំ។

បាតុករជាង ២០០នាក់បានស្លាប់ ក្នុងពេលដែលនគរបាលប​ង្រាបយ៉ាងឃោរឃៅ។ នៅចំពេលនៃអំពើហិង្សាលោក Tokayev បានដកលោក Nazarbayev ពីតំណែងជា​ប្រធាន​ក្រុមប្រឹក្សាសន្តិសុខជាតិដ៏មានឥទ្ធិពល។ លោកបានប្តូរឈ្មោះរដ្ឋធានីទៅឈ្មោះ Astana ដូចដើមវិញ ហើយសភាបានលុបចោលច្បាប់អភ័យ​ឯកសិទ្ធិរួចផុតពីការ​កាត់ទោសលោក Nazarbayev និងក្រុមគ្រួសារ។ លោក Tokayev បានផ្តួចផ្តើមគំនិតកំណែទម្រង់សភា កាត់បន្ថយអំណាចប្រធានាធិបតី និងកំណត់អាណត្តិប្រធានា​ធិបតី​បានតែ១អាណត្តិប៉ុណ្ណោះ (៧ឆ្នាំ)៕

http://ព័ត៌មានសភាទ្វីបអឺរ៉ុប ២១-០៣-២៣- ឈាវ សុផាត ប្រែសម្រួលពី៖ https://abcnews.go.com/International/wireStory/dominant-party-wins-votes-kazakh-parliament-election-97989456