លោក Ibrahim Bouderbala ប្រធានសភានៃសាធារណរដ្ឋទុយនីស៊ី និងអនុប្រធានសភាទាំងពីរ

រដ្ឋធានីទុយនីស៖ សភាតំណាងប្រជាជននៃសាធារណរដ្ឋទុយនីស៊ីបានបើកសម័យប្រជុំដំបូងនៃសភានីតិកាលថ្មីរបស់ខ្លួន ក្រោយពីត្រូវបានលោកប្រធានាធិបតី Kais Saied បង្កកសភានីតិកាលមុន កាលពីថ្ងៃទី២៥ ខែកក្កដា ឆ្នាំ ២០២១ និងក្រោយមករំលាយសភាចោល នៅថ្ងៃទី៣០ ខែមីនា ឆ្នាំ២០២២ កន្លងមក។

នៅចំពេលដែលមានវិធានការសន្តិសុខយ៉ាងតឹងរ៉ឹង​ សមាជិកសភាតំណាងប្រជាជនសរុប ១៥៤រូប នៃសមាជិកសភា១៦១រូប បានធ្វើពិធីសច្ចាប្រណិធានស្បថ​ចូលកាន់​តំណែងនៅឯសម័យប្រជុំសភា កាលពីថ្ងៃចន្ទ ទី១៣ ខែមីនា ឆ្នាំ២០២៣។ នេះបើតាមទីភ្នាក់ងារសារព័ត៌មានចិន ស៊ីហួរ បានធ្វើសេចក្តីរាយការណ៍។ ៧អាសនៈដែល​នៅ​ទំនេរ ទុកសម្រាប់សមាជិកសភាមកពីបរទេស នឹងត្រូវបោះឆ្នោតបំពេញអាសនៈនាពេលក្រោយ នៅក្នុងមណ្ឌលបោះឆ្នោតពាក់ព័ន្ធ។ សភានីតិកាលថ្មី ក៏បានបោះឆ្នោតជ្រើស​តាំងលោក Ibrahim Bouderbala ជាប្រធានសភាផងដែរ។

លោក Bouderbala អតីតប្រធានសមាគមវិជ្ជាជីវៈមេធាវីទុយនីស៊ី ទទួលបានសំឡេងគាំទ្រ ៨៣សំឡេង នៅក្នុងការបោះឆ្នោតជុំទី២ ខណៈដែលគូប្រជែងរបស់លោក គឺលោក Abdessalem Dahmani  ទទួលបានការគាំទ្រ ៦៧សំឡេង។ លោកប្រធានសភាវ័យ ៧១ឆ្នាំរូបនេះនឹងត្រូវបានលោកស្រី Saou ssen Mabrouk និងលោក Anouer Marzouki ជួយការងារក្នុងនាមជាអនុប្រធានសភាដែលបានជាប់ឆ្នោត នៅក្នុងសម័យប្រជុំតែមួយ។

លោក Bouderbala បានថ្លែងបន្ទាប់ពីត្រូវបានបោះឆ្នោតជ្រើសតាំងជាប្រធានសភាថា “ចាប់ពីថ្ងៃនេះ នៅក្នុងប្រវត្តិសាស្រ្តទុយនីស៊ី យើងបានរួបរួមយ៉ាងរឹងមាំ ពួតដៃគ្នាក្នុង​ការ​ទទួលយកបញ្ហាប្រឈម  សំខាន់ៗ ពោលគឺដើម្បីសេចក្តីពេញចិត្ត ដែលជាបំណងប្រាថ្នារបស់ប្រជាជនទុយនីស៊ី”។ គួរបញ្ជាក់ផងដែរថា សភាទុយនីស៊ីនីតិកាលថ្មី បានជាប់ឆ្នោត​កាលពីខែធ្នូ ឆ្នាំ២០២២ និងខែមករា ឆ្នាំ២០២៣ នៅក្នុងការបោះឆ្នោតមួយដែលមានចំនួនអ្នកចេញទៅបោះឆ្នោតតែប្រមាណជា ១១% ប៉ុណ្ណោះ៕

http://ព័ត៌មានសភាទ្វីបអាហ្រ្វិក ១៥-០៣-២៣- ឈាវ សុផាត ប្រែសម្រួលពី៖ https://menafn.com/1105771112/Tunisia-Holds-1St-Session-Of-New-Parliament-After-19-Months