លោក Tran Thanh Man អនុប្រធានអចិន្ត្រៃយ៍រដ្ឋសភាវៀតណាមចូលរួមពិធីបើកសន្និបាតសហភាពអន្តរសភា​ លើកទី ១៤៦ (the 146th Inter-Parliamentary Union, IPU) នៅប្រទេសបារ៉ែន

រដ្ឋធានីម៉ាណាម៉ា៖ គណៈប្រតិភូរដ្ឋសភានៃសាធារណរដ្ឋសង្គមនិយមវៀតណាម ដឹកនាំដោយលោក Tran Thanh Man អនុប្រធានរដ្ឋសភាវៀតណាម បានចូលរួមក្នុងពិធី​បើកសន្និបាតសហភាពអន្តរសភាលើកទី ១៤៦ (the 146th Inter-Parliamentary Union, IPU) ក្នុងព្រះរាជាណាចក្របារ៉ែន កាលពីថ្ងៃអាទិត្យ ទី១១ ខែមីនា ឆ្នាំ២០២៣ (ម៉ោងក្នុងស្រុក) ដែលមានការចូលរួមពីប្រតិភូសភាជិត ២.០០០ នាក់ មកពីជិត ១៤០ ប្រទេស នៅទូទាំងពិភពលោក។

កាលពីលើកមុន គណៈប្រតិភូសភាវៀតណាមនេះ បានចូលរួមក្នុងកិច្ចប្រជុំកំពូលអាស៊ានបូក ៣ ជប៉ុន ចិន សាធារណរដ្ឋកូរ៉េ (កូរ៉េខាងត្បូង), កិច្ចប្រជុំក្រុមភូមិ​សាស្ត្រ​នយោបាយអាស៊ី-ប៉ាស៊ីហ្វិច និងវេទិកាសមាជិកាសភា។  គណៈប្រតិភូនេះ នឹងចូលរួមសម័យប្រជុំពេញអង្គនៃសន្និបាតសហភាពអន្តរសភា, កិច្ចប្រជុំក្រុមប្រឹក្សាត្រួតពិនិត្យ និងគណៈកម្មាធិការអចិន្ត្រៃយ៍នៃមហាសន្និបាត, វេទិកាសមាជិកសភា​វ័យក្មេង​ និងកិច្ចប្រជុំក្រៅផ្លូវការជាច្រើនទៀត។

ថ្លែងក្នុងមហាសន្និបាតនោះ ព្រះអង្គម្ចាស់ Shaikh Shaikh Khalid bin Abdullah Al Khalifa ឧបនាយករដ្ឋមន្ត្រីបារ៉ែន បានអំពាវនាវឱ្យគណៈប្រតិភូសភាដែល​បាន​អញ្ជើញមកចូលរួមទាំងអស់ ឈានដល់កុងសង់ស៊ីសមួយ ដើម្បីសម្រេចគោលដៅលើកកម្ពស់ការយោគយល់គ្នា និងការរួមរស់ជាមួយគ្នាប្រកបដោយសន្តិភាព រួមទាំង​ភាព​ជាដៃគូអន្តរជាតិស៊ីជម្រៅ ដើម្បីសម្រេចបាននូវសន្តិភាព និងសន្តិសុខ ផងដែរ។

ព្រះអង្គម្ចាស់ Al Khalifa បានមានបន្ធូលថា សន្និបាតសហភាពអន្តរសភាលើកទី១៤៦ នេះ មានគោលបំណេងស្វែងរកកិច្ចខិតខំប្រឹងប្រែង ដើម្បីបញ្ចប់សង្គ្រាម និង​វិបត្តិនានា, គាំទ្រគោលដៅអភិវឌ្ឍន៍ប្រកបដោយចីរភាព (SDGs) តាមរយៈដំណោះស្រាយប្រកបដោយសមធម៌, ការលើកកម្ពស់កិច្ចសហប្រតិបត្តិការសេដ្ឋកិច្ច និងការ​សម្រួល​ពាណិជ្ជកម្ម និងកិច្ចសហប្រតិបត្តិការវិនិយោគលើគម្រោងថាមពលកែច្នៃ។ ព្រះអង្គម្ចាស់ Al Khalifa បានអះអាងជាថ្មីទៀតថា ប្រទេសបារ៉ែនប្តេជ្ញាថា នឹងជំរុញ​កិច្ចខិតខំប្រឹងប្រឹង ដើម្បីលើកកម្ពស់ស្ថិរភាព សន្តិសុខ និងសន្តិភាពសកល៕

http://ព័ត៌មានសភាទ្វីបអាស៊ី ១៣-០៣-២៣-កែវ ធាវី ប្រែសម្រួលពី៖ https://en.vietnamplus.vn/vietnam-attends-146th-interparliamentary-union-assembly/249722.vnp