វិធីប្រព័ន្ធផ្សព្វផ្សាយសង្គម TikTok របស់ប្រទេសចិន

កាលពីថ្ងៃអាទិត្យ ទី០៥ ខែមីនា ឆ្នាំ២០២៣ លោក Mark Warner សមាជិកព្រឹទ្ធសភាបានមាន ប្រសាសន៍ថា សមាជិកព្រឹទ្ធសភាសហរដ្ឋអាមេរិក២រូបគ្រោងនឹង​បង្ហាញ​ជូននូវសេចក្តីស្នើច្បាប់នៅសប្តាហ៍ នេះក្នុងគោលបំណងអនុញ្ញាតឱ្យរដ្ឋាភិបាល “ហាមឃាត់ ឬហាមប្រាម” ផលិតផលបច្ចេកវិទ្យាបរទេសដូច ជាកម្មវិធី TikTok ដែលជា​កម្មសិទ្ធិរបស់សាធារណរដ្ឋប្រជាមានិតចិន។

លោក Warner ជាប្រធានគណៈកម្មាធិការស៊ើបការណ៍សម្ងាត់ព្រឹទ្ធសភាបានមានប្រសាសន៍ថា កម្ម វិធី TikTok នឹងក្លាយជា “សក្តានុពលមួយក្នុងចំណោមសក្តានុពលនានា” សម្រាប់ការត្រួតពិនិត្យនៅក្រោម ច្បាប់នេះ។ សេចក្តីព្រាងច្បាប់នេះកើតឡើងនៅពេលដែលកម្មវិធី TikTok ស្ថិតនៅក្រោមសម្ពាធកាន់តែខ្លាំង ជុំវិញការព្រួយបារម្ភថា ទិន្នន័យអំពីអ្នកប្រើប្រាស់នៅសហរដ្ឋអាមេរិកអាចបញ្ចប់នៅក្នុងដៃរបស់រដ្ឋាភិបាល ចិន។ កាលពីថ្ងៃពុធ ទី០១ ខែមីនា គណៈកម្មាធិការកិច្ចការបរទេសរបស់សភាតំណាង​អាមេរិក​បានបោះឆ្នោតដើម្បីផ្តល់ឱ្យលោកប្រធានាធិបតី Joe Biden នូវអំណាចក្នុងការហាមឃាត់ កម្មវិធី TikTok នៅក្នុងអ្វី ដែលជាការរឹតត្បិតរបស់សហរដ្ឋ​អាមេរិកលើ​កម្មវិធីប្រព័ន្ធផ្សព្វផ្សាយសង្គមណាមួយ។ សេតវិមានកាលពីសប្តាហ៍មុន បានផ្តល់រយៈពេលដល់ភ្នាក់ងាររដ្ឋាភិបាលចំនួន៣០ថ្ងៃ ដើម្បីធានាថា កម្មវិធី TikTok មិនមាននៅ​លើឧបករណ៍ និងប្រព័ន្ធសហព័ន្ធណាមួយឡើយ។ រដ្ឋជាង ៣០ របស់សហរដ្ឋអាមេរិក ប្រទេស កាណាដា និងស្ថាប័នគោលនយោបាយសហភាពអឺរ៉ុបក៏បានហាមឃាត់កម្មវីធី TikTok ពីការបញ្ចូលទៅក្នុងឧបករណ៍របស់រដ្ឋផងដែរ។

លោក Warner បានមានប្រសាសន៍ថា លោកមានការព្រួយបារម្ភថា TikTok “អាចជាឧបករណ៍ឃោសនា” ដោយផ្អែកលើប្រភេទវីដេអូដែលវាផ្ញើទៅអ្នកប្រើប្រាស់។ លោក Warner បានបន្តទៀតថា សេចក្តី ស្នើច្បាប់ដែលលោកគ្រោងនឹងបង្ហាញជូន “អាចនិយាយបានថា បើនិយាយពីបច្ចេកវិទ្យាបរទេសដែលចូល មកក្នុងអាមេរិក យើងត្រូវមាន​វិធីសាស្រ្តជាប្រព័ន្ធ ដើម្បីប្រាកដថាយើងអាចហាមឃាត់ ឬហាមប្រាមវាបាន នៅពេលចាំបាច់” ៕

http://ព័ត៌មានសភាទ្វីបអាមេរិក ០៦-០៣-២៣-ផាត់ ត្រដែត ប្រែសម្រួលពី៖ https://www.ctvnews.ca/sci-tech/tiktok-a-potential-target-in-upcoming-u-s-bill-to-ban-some-foreign-tech-senator-1.6299905