សមាជិកសភាឌូម៉ាសហព័ន្ធរុស្ស៊ីអនុម័តផ្អាកសន្ធិសញ្ញានុយក្លេអ៊ែរ New START ជាមួយសហរដ្ឋអាម៉េរិក

រដ្ឋធានីមូស្គូ៖ កាលពីថ្ងៃពុធ ទី២២ ខែកុម្ភៈ ឆ្នាំ២០២៣ សភាឌូម៉ា ឬសភាជាន់ទាបនៃសហព័ន្ធរុស្ស៊ីបានអនុម័តយ៉ាងប្រញាប់ប្រញាល់​នូវចំណាត់ការរបស់​លោកប្រធានា​ធិបតី Vladimir Vladimirovich Putin  ឱ្យផ្អាកសន្ធិសញ្ញាអាវុធនុយក្លេអ៊ែរដែលនៅសេសសល់ចុងក្រោយជាមួយសហរដ្ឋអាម៉េរិក។ ទាំងមន្រ្តី និងសមាជិកសភារុស្ស៊ីបាន​ចាត់​ទុកការអនុម័តនេះ ប្រៀបដូចជាការព្រមាននៅនាទីចុងក្រោយមួយ ទៅកាន់រដ្ឋាភិបាលទីក្រុងវ៉ាស៊ីនតោន នៅចំពេលដែលមានភាពតានតឹងពាក់ព័ន្ធនឹងបញ្ហា​ប្រទេស​អ៊ុយក្រែន។

លោកប្រធានាធិបតី Putin បានប្រកាសថា រដ្ឋាភិបាលទីក្រុងមូស្គូបានផ្អាកការចូលរួមរបស់ខ្លួនក្នុងសន្ធិសញ្ញាអាវុធនុយក្លេអ៊ែរ New START ឆ្នាំ២០១០ នៅក្នុង​សុន្ទរកថា​ថ្នាក់ជាតិកាលពីថ្ងៃអង្គារ ទី២១     ខែកុម្ភៈលោកថា រុស្ស៊ីមិនអាចទទួលយកបាននូវការត្រួតពិនិត្យទីតាំងអាវុធប្រល័យលោករបស់ខ្លួនពីសហរដ្ឋអាម៉េរិកអនុលោម​តាម​​សន្ធិសញ្ញានោះឡើយ ខណៈដែលទីក្រុង​វ៉ាស៊ីនតោន និងទ័ពសម្ព័ន្ធមិត្តអង្គការណាតូ បានប្រកាសជាចំហរពីគោលបំណងរបស់ពួកគេធ្វើឱ្យរុស្ស៊ីចាញ់សង្រ្គាម​នៅអ៊ុយក្រែន។

លោកប្រធានាធិបតីរុស្ស៊ីរូបនេះ បានសង្កត់ធ្ងន់ថា ទីក្រុងមូស្គូមិនដកខ្លួនចេញពីសន្ធិសញ្ញាទាំងស្រុង នោះទេ។ ខណៈដែលក្រសួងការបរទេសបានថ្លែងថា ប្រទេសរុស្ស៊ី​នឹង​គោរពចំពោះការកំណត់ក្បាលគ្រាប់អាវុធនុយក្លេអ៊ែរដែលមានចែងក្នុងសន្ធិសញ្ញា និងជូនដំណឹងដល់សហរដ្ឋអាម៉េរិកពីការធ្វើតេស្តបាញ់មីស៊ីលបាលីស្ទីក។ លោក Dmitry Medvedev​ អតីតប្រធានាធិបតី-នាយករដ្ឋមន្រ្តីរុស្ស៊ី បច្ចុប្បន្នជាអនុប្រធានក្រុមប្រឹក្សាសន្តិសុខជាតិរុស្ស៊ី ដែលក្រុមប្រឹក្សានេះដឹកនាំដោយលោក Putin បានសង្កត់​ធ្ងន់ថា  ការផ្អាកការចូលរួមរបស់រុស្ស៊ីក្នុងសន្ធិសញ្ញាគឺជាបញ្ជូនសញ្ញាមួយទៅកាន់សហរដ្ឋអាម៉េរិកថា រដ្ឋាភិបាលទីក្រុងមូស្គូបានត្រៀមរួចរាល់សម្រាប់ការប្រើប្រាស់​អាវុធ​នុយក្លេអ៊ែរដើម្បីការពារខ្លួនតែប៉ុណ្ណោះ។

លោក Medvedev បានថ្លែងបន្តថា ប្រសិនបើសហរដ្ឋអាម៉េរិកចង់ឱ្យរុស្ស៊ីចាញ់សង្រ្គាម នោះយើងមានសិទ្ធិក្នុងការការពារខ្លួនយើងជាមួយនឹងអាវុធប្រភេទណាមួយក៏ដោយ រួមទាំង អាវុធនុយក្លេអ៊ែផងដែរ។ “ប្រសិនបើសហរដ្ឋអាម៉េរិកចង់ឱ្យរុស្ស៊ីចាញ់សង្រ្គាមនៅអ៊ុយក្រែន នោះយើងកំពុងតែឈរនៅលើមាត់ ជ្រោះនៃសង្រ្គាមសកល​មួយ​ហើយ”៕

http://ព័ត៌មានសភាទ្វីបអឺរ៉ុប ២៣-០២-២៣- ឈាវ សុផាត ប្រែសម្រួលពី៖ https://www.usnews.com/news/world/articles/2023-02-22/russian-lawmakers-endorse-suspension-of-nuclear-pact-with-us