កាលពីថ្ងៃព្រហស្បតិ៍ទី១៦ ខែកុម្ភៈ ឆ្នាំ២០២៣ សភាអឺរ៉ុបបានអនុម័តសេចក្តីសម្រេចចំនួន២ ស្តីអំពី បញ្ហាតម្លាភាព និងសុច្ចរិតភាពក្នុងការធ្វើការសម្រេចចិត្តរបស់​សហភាពអឺរ៉ុប។

កំណែទម្រង់ដ៏រឹងមាំ និងជាបន្ទាន់ គឺជារឿងចាំបាច់

អនុវត្តតាមវិធានការដែលស្នើឡើងដោយសភាអឺរ៉ុបក្នុង ខែធ្នូ ឆ្នាំ២០២២ ស្វាគមន៍ចំពោះការសម្រេច នាពេលថ្មីៗនេះរបស់ប្រធានសភាអឺរ៉ុប និងស្វាគមន៍ចំពោះការ​សម្រេចចិត្តនាពេលថ្មីៗនេះរបស់មេដឹកនាំក្រុមនយោបាយនៅក្នុងសភាអឺរ៉ុប សមាជិកសភាអឺរ៉ុបបានគូសបញ្ជាក់សាជាថ្មីថា ពួកគេនឹងមិនអត់ឱនឱ្យ ឡើយ(Zero tolerance)ចំពោះអំពីពុករលួយគ្រប់រូបភាព នៅគ្រប់ជាន់ថ្នាក់។ សមាជិកសភាអឺរ៉ុបបានទទូចឱ្យសភាអឺរ៉ុបបង្ហាញនូវសាមគ្គីភាពដ៏ច្បាស់លាស់ និងការប្តេជ្ញាចិត្តដ៏រឹងមាំ លើបញ្ហានេះ។ សមាជិកសភាបានចងក្រងបញ្ជីនៃសកម្មភាពដែលចាំបាច់ត្រូវធ្វើការពង្រឹងបន្ថែម ដូចជា៖

• អនុវត្តឱ្យបានប្រសើរជាងមុននូវការគោរពក្រមសីលធម៌(Code of Conduct) ដែលក្នុងនោះ រួមមាន (១)ការពិនិត្យមើលការដាក់ទណ្ឌកម្មចំពោះអ្នកបំពានក្រមនេះ (២)កំណត់បង្កើនចំនួនសកម្មភាពដែលចាត់ទុកជាការបំពានក្រមសីលធម៌និងទណ្ឌកម្ម និង(៣)ដាក់ចេញនូវបម្រាម ទទួលប្រាក់តបស្នងពីសកម្មភាពណា ដែលអាច​បង្កឱ្យមានជម្លោះផលប្រយោជន៍ជាមួយនឹងអា ណត្តិជាសមាជិកសភាអឺរ៉ុប
• បង្កើនការយកចិត្តទុកដាក់លើដំណើរការនៃពិនិត្យនិងសម្រេច លើការធ្វើដំណើររបស់សមាជិក អឺរ៉ុប​ដែលឧបត្ថម្ភដោយប្រទេសជាភាគីទីបី និងបង្កើនការត្រួតពិនិត្យ​លើមន្រ្តីជំនួយការសមាជិកសភា និងមន្រ្តីបម្រើការក្នុងសភាអឺរ៉ុប ដែលបំពេញការងារក្នុងវិស័យសំខាន់ៗជាចំណុចរសើប ជាពិសេសវិស័យការបរទេស សន្តិសុខ និងការពារ
• ធ្វើកំណែទម្រង់គណៈកម្មាធិការពិគ្រោះយោបល់ក្រមសីលធម៌សមាជិកសភា ដើម្បីធ្វើឱ្យគណៈ កម្មាធិការនេះកាន់តែមានឯករាជ្យភាព
• យកចិត្តទុកដាក់ត្រួតពិនិត្យ លើការប្រកាសទ្រព្យសម្បត្តិរបស់សមាជិកសភាអឺរ៉ុបនៅដើម និងចុងអាណត្តិ(Mandate)
• ផ្តល់ធនធានគ្រប់គ្រាន់សម្រាប់ការចុះបញ្ជីតម្លាភាព(Transparency Register) និងកាតព្វ កិច្ចរបស់សមាជិកសភាអឺរ៉ុប។ លើសពីនេះទៅទៀត​ មន្រ្តីជំនួយការ​សមាជិក​សភា និងមន្រ្តីសភា អឺរ៉ុប ក៏ត្រូវតែជូនដំណឹងផងដែរ អំពីកិច្ចប្រជុំរបស់ខ្លួនជាមួយមន្រ្តីកាទូតនៃប្រទេសទីបី ក្នុងករណីដែលកិច្ចប្រជុំនេះពាក់ព័ន្ធនឹងតួនាទី​សកម្មរបស់​ពួកគេ (មន្រ្តីសភាជំនួយការនិងមន្រ្តីសភាខាងលើ) និងឥទ្ធិពលនៃតួនាទីរបស់ពួកគេ។ ការជូនដំណឹងជាសាធារណៈ​អំពីកិច្ចប្រជុំនេះ អាចត្រូវបានលើកលែង ប្រសិន​ប៉ះពាល់ដល់អត្ថប្រយោជន៍ ឬបង្កគ្រោះមហន្តរាយសាធារណៈ។
• ធ្វើកំណែទម្រង់បទបញ្ជីផ្ទៃក្នុង(Internal Rule)​ ដើម្បីឱ្យស្របទៅនឹងការណែនាំនានា
• វិធានការដែលអនុវត្តចំពោះអ្នកតំណាងរបស់រដ្ឋកាតា គួតែត្រូវពង្រីកដល់អ្នកតំណាងរបស់ព្រះរាជាណាចក្រម៉ារ៉ុក រឹតបន្តឹងការត្រួតពិនិត្យ លើការទទួលហិរញ្ញវត្ថុ របស់​​អង្គការក្រៅរដ្ឋាភិបាល

សមាជិកសភាអឺរ៉ុបបានកត់សម្គាល់ថា អង្គការក្រៅរដ្ឋាភិបាលមួយចំនួន បានរងការប្រកាន់ថាត្រូវបានបរទេស ប្រើប្រាស់ជាវ៉ិចទ័រដើម្បីជ្រៀតជ្រែក​ចូលការងារផ្ទៃក្នុង​របស់សភាអឺរ៉ុប និងសហភាពអឺរ៉ុប ដូច្នេះសមាជិកសភាអឺរ៉ុបស្នើឱ្យពិនិត្យឡើងវិញនូវបញ្ញត្តិពាក់ព័ន្ធនានា ដើម្បីឈានទៅលើកកម្ពស់តម្លាភាពផ្នែកអភិបាលកិច្ចថវិកា ឥទ្ធិពលបរទេស និងអ្នកគ្រប់គ្រងធំៗរបស់អង្គការក្រៅរដ្ឋាភិបាលទាំងនោះ។ សមាជិកសភាអឺរ៉ុបបានកត់សម្គាល់ថា អង្គការក្រៅរដ្ឋាភិបាលតែត្រូវប្រកាស​ព័ត៌មានពេញ​លេញ ​តាមច្បាប់កំណត់អំពីឈ្មោះរបស់ភាគីដែលផ្តល់មូលនិធិ។ ប្រសិនបើមិនអនុវត្តតាមការកំណត់នេះទេ អង្គការក្រៅរដ្ឋាភិបាលទាំងនោះ មិនគួរបន្តទទួលបាន​ថវិកា​សាធារណៈ (EU Public money)ពីសហភាពអឺរ៉ុបឡើយ។ សមាជិកសភាអឺរ៉ុបក៏ស្នើសុំផងដែរ ឱ្យមានការត្រួតពិនិត្យគ្រប់ជ្រុងជ្រោយ មុននឹងចាត់ទុកថាអង្គការ​ក្រៅ​រដ្ឋាភិបាល​​ណាមួយ ពិតជាមានតម្លាភាពតាមស្តង់ដារអឺរ៉ុប ហើយត្រូវកំណត់និយមន័យឱ្យបាន ច្បាស់លាស់ថា តើអង្គការក្រៅរដ្ឋាភិបាលបែបណា ដែលសមទទួលបាន​មូលនិធិ​សាធារណៈរបស់អឺរ៉ុប។ ទោះបីជាយ៉ាងនេះក្តី សមាជិកសភាអឺរ៉ុបបានសម្តែងការមិនពេញចិត្តចំពោះមជ្ឈដ្ឋានមួយចំនួន ដែលប្រើ​ប្រាស់រឿងអាស្រូវពុករលួយ​ក្នុងស្ថាប័ន​សភា​អឺរ៉ុបកន្លងមក យកមកធ្វើជាយុទ្ធនាការបង្ខូចកិត្តិយសដល់អង្គការក្រៅរដ្ឋាភិបាលផ្សេងៗ និងចែកចាយព័ត៌មានដោយខ្វះតម្លាភាពអំពីការទទួលបានហិរញ្ញវត្ថុរបស់​អង្គការ​ទាំងនោះ ដែលការធ្វើដូច្នេះបានប៉ះពាល់ដល់អង្គការសង្គមស៊ីវិល ដែលគោរពច្បាប់ត្រឹមត្រូវ ជាពិ សេសអង្គការសង្គមស៊ីវិលដែលគាំទ្រការសិទ្ធិមនុស្ស និងការពារ​បរិស្ថាន។

សមាជិកសភាអឺរ៉ុបចង់ឱ្យគណៈកម្មាធិការING2 (គណៈកម្មាធិការពិសេសត្រួតពិនិត្យអន្តរាគមន៍បរទេស ដើម្បីដោះស្រាយការចោទប្រកាន់ចំពោះអំពើពុករលួយ) និងក្រុមការ​ងារពាក់ព័ន្ធផ្សេងទៀតពិនិត្យលើក្រមសីលធម៌របស់សមាជិកសភាអឺរ៉ុប នៅមុនរដូវក្តៅឆ្នាំនេះ…៕

http://ព័ត៌មានពីអង្គការសភា ១៩-០២-២៣- តូនី ប្រែសម្រួលពី៖https://www.europarl.europa.eu/news/en/press-room/20230214IPR75103/corruption-allegations-meps-push-for-