សម្ព័ន្ធភាពបុគ្គលិកពេទ្យ រួមទាំង សមាគមគ្រូពេទ្យកូរ៉េ ធ្វើសន្និសីទសារព័ត៌មានមួយ នៅមុខរដ្ឋសភាក្នុងរដ្ឋធានីសេអ៊ូលនៅថ្ងៃចន្ទ ទី១៣ ខែកុម្ភៈ ឆ្នាំ២០២៣ អំពាវនាវឱ្យសមាជិកសភា ដកសេចក្តីព្រាងច្បាប់ស្តីពី គិលានុបដ្ឋាយិកា. Yonhap

ក្រុមវេជ្ជបណ្ឌិតនៃសាធារណរដ្ឋកូរ៉េ (កូរ៉េខាងត្បូង) បានព្រមានថា​ ពួកគេ នឹងធ្វើកូដកម្មជំទាស់នឹងសេចក្តីព្រាងច្បាប់ស្តីពី គិលានុបដ្ឋាយិកា ដែលចែងអំពីតួនាទី និងភារកិច្ច​គិលានុបដ្ឋាយិកាដែលទទួលបានអាជ្ញាប័ណ្ណ។ ក្រុមវេជ្ជបណ្ឌិតទាំងនេះ យល់ឃើញថា សេចក្តីព្រាងច្បាប់នេះ អាចបង្កឱ្យមានភាពមិនច្បាស់លាស់ក្នុង​ប្រព័ន្ធ​ថែទាំ​សុខភាព​​​សាធារណៈ ប្រសិនបើសេចក្តីព្រាងច្បាប់ខាងលើនេះ ត្រូវបានអនុម័ត។

សមាគមគ្រូពេទ្យកូរ៉េខាងត្បូង (The Korea Medical Association, KMA) បានធ្វើសន្និសីទសារព័ត៌មានមួយ នៅមុខរដ្ឋសភា កាលពីថ្ងៃចន្ទ ទី១៣ ខែកុម្ភៈ ឆ្នាំ២០២៣ ​ថ្កោលទោសការសម្រេចភ្លាមៗ របស់សមាជិករដ្ឋសភា នាពេលថ្មីៗនេះ លើសេចក្តីព្រាងច្បាប់ស្តីពី គិលានុបដ្ឋានយិកា។

កាលពីថ្ងៃទី០៩ ខែកុម្ភៈ ឆ្នាំ២០២៣ គណៈកម្មាធិការសុខាភិបាល និងសុខុមាលភាពនៃ​រដ្ឋសភា បានបោះឆ្នោតអនុម័តយល់ព្រមលើសេចក្តីព្រាងច្បាប់ស្តីពី គិលានុបដ្ឋាន​យិកានេះ ដែលត្រូវបានព្យួរនៅគណៈកម្មាធិការនីតិកម្ម និងតុលាការនៃរដ្ឋសភា អស់រយៈពេលជាង ៨ ខែ មិនបានពិនិត្យពិភាក្សាក្នុងសម័យប្រជុំពញអង្គ។

សេចក្តីព្រាងច្បាប់ស្តីពី គិលានុបដ្ឋានយិការនេះ បានទទួលការគាំទ្រពីសមាជិករដ្ឋសភាគណបក្សប្រឆាំងដ៏ធំជាងគេ គឺគណបក្សប្រជាធិបតេយ្យកូរ៉េ ដែលគ្រប់គ្រង​អាសនៈ​​​​​​ជាងពាក់កណ្តាល ក្នុងចំណោមអាសនៈរដ្ឋសភាសរុប ៣០០ អាសនៈ សេចក្តីព្រាងច្បាប់នេះ ទំនងជាត្រូវបានអនុម័តនៅក្នុងសម័យប្រជុំពេញអង្គ នាខែមីនា ឆ្នាំ២០២៣ ខាងមុខ។

ការចាប់ផ្តើមជួបជុំគ្នាធ្វើកូដកម្មទូទាំងប្រទេស ត្រូវបានកំណត់ធ្វើនៅថ្ងៃទី២៦ ខែកុម្ភៈ ឆ្នាំ២០២៣ ខាងមុខ។ សមាជិករបស់យើងចំនួន ១០០.០០០ នាក់ នឹងចាត់នូវ​រាល់វិធានការនានា តាមដែលអាចធ្វើបាន ដើម្បីប្រយុទ្ធប្រឆាំងនឹងច្បាប់ដ៏អយុត្តិធម៌ទាំងនេះ។ យើងគ្រោងបើកកិច្ចប្រជុំប្រចាំសប្តាហ៍ដើម្បី ដាក់ចេញនូវផែនទីបង្ហាញ​ផ្លូវមួយ​ជាក់លាក់ សម្រាប់សកម្មភាពរួមនេះ៕

http://ព័ត៌មានសភាទ្វីបអាស៊ី ១៤-០២-២៣-កែវ ធាវី ប្រែសម្រួលពី៖ https://www.koreatimes.co.kr/www/nation/2023/02/113_345348.html