លោក Rob Wittman ​សមាជិក​នៃគណៈកម្មាធិការជំនាញ​សភា​តំណាងអាមេរិក

សារព័ត៌មាន Nikkei Asia បានរាយការណ៍កាលពីថ្ងៃចន្ទ ទី១៣ ខែកុម្ភៈ ឆ្នាំ២០២៣ គណៈកម្មាធិការ ពិសេសរបស់សភាតំណាងសហរដ្ឋអាមេរិកទទួល​បន្ទុកកិច្ចការ​ប្រទេសចិន គ្រោងនឹងធ្វើទស្សនកិច្ចនៅកោះតៃវ៉ាន់ ក្នុងរយៈពេលប៉ុន្មានខែខាងមុខនេះ។

របាយការណ៍នេះ បានកើតឡើងចំពេលមានភាពតានតឹងកាន់តែខ្លាំងឡើងរវាងរដ្ឋធានីវ៉ាស៊ីនតោន និងរដ្ឋធានីប៉េកាំង បន្ទាប់ពីបាឡុងហោះឃ្លាំមើលរបស់សាធារណរដ្ឋ​ប្រជា​មានិតចិនត្រូវបានគេប្រទះឃើញ នៅលើទឹកដីសហរដ្ឋអាមេរិក ហើយក្រោយមកត្រូវបានបាញ់ទម្លាក់។ លោក Rob Wittman ​សមាជិក​នៃ ​គណៈកម្មាធិការជំនាញ​សភា​តំណាងអាមេរិក ស្តីពីការប្រកួតប្រជែងជាយុទ្ធសាស្ត្ររវាងសហរដ្ឋអាមេរិក និង បក្សកុម្មុយនិស្តចិន (CCP) បានប្រាប់ទស្សនាវដ្តីព័ត៌មានជប៉ុនថា លោកនឹងសមាជិក​គណៈ​កម្មាធិការផ្សេង ទៀតកំពុងពិភាក្សាគ្នាលើការធ្វើដំណើរដែលអាចធ្វើទៅបាន ដើម្បីធ្វើទស្សនកិច្ចនៅកោះតៃវ៉ាន់។ លោក Wittman បានមានប្រសាសន៍ថា “យើងដឹងថាវា​នឹង​ធ្វើឱ្យជនជាតិចិនខឹងសម្បា ប៉ុន្តែខ្ញុំគិតថាវាមានសារៈ សំខាន់មិនគួរឱ្យជឿសម្រាប់ពួកយើងក្នុងការធ្វើដូច្នេះ (ការធ្វើទស្សនកិច្ចនៅកោះតៃវ៉ាន់) ពីព្រោះអ្នកត្រូវតែ ទទួលដឹងថា​យើងខ្លាំងនៅខាងតៃវ៉ាន់”។ លោក Wittman បានមានប្រសាសន៍បន្តទៀតថា គណៈប្រតិភូដែលត្រូវបានបញ្ជូនដោយគណៈកម្មាធិការអាចនឹងធ្វើសវនាការនៅកោះតៃវ៉ាន់ ប្រសិនបើដំណើរទស្សនកិច្ច ដែលបានគ្រោងទុកនោះត្រូវបានសម្រេច។ កាលពីខែមុន លោក Wittman បានប្រាប់ក្រុមអ្នកជំនាញនៅ វិទ្យាស្ថាន Project 2049 ដែលមាន​មូល​ដ្ឋាននៅរដ្ឋធានីវ៉ាស៊ីនតោនថា លោក Mike Gallagher ប្រធានគណៈកម្មាធិការជំនាញ​នៃសភា​តំណាងអាមេរិក សង្ឃឹមថានឹងធ្វើសវនាការនៅតៃវ៉ាន់ “ព្រោះវានឹងមានអត្ថ ន័យសម្រាប់ពិភពលោកក៏ដូចជាតៃវ៉ាន់”។

សេចក្តីរាយការណ៍បានឱ្យដឹងបន្ថែមថា តាមរយៈការធ្វើសវនាការលើបញ្ហាគោលនយោបាយ និងសេចក្តីព្រាងច្បាប់ដែលបានស្នើឡើង គណៈកម្មាធិការអាចធ្វើអនុសាសន៍​គោលនយោបាយស្តីពីប្រទេសចិនទៅកាន់គណៈកម្មាធិការផ្សេងទៀតនៅក្នុងសភាតំណាងសហរដ្ឋអាមេរិក។ អ្នកនយោបាយអាមេរិកដែល មានកេរ្តិ៍ឈ្មោះល្បីផ្សេងទៀតបាន​រាយការណ៍ឱ្យដឹងថា កំពុងពិចារណាក្នុងដំណើរទស្សនកិច្ចទៅកាន់ កោះ តៃវ៉ាន់រួមមាន លោក Kevin McCarthy ប្រធានសភាតំណាងរាស្រ្តអាមេរិក និងលោក Michael McCaul ប្រធានគណៈកម្មាធិការកិច្ចការបរទេសនៃសភាតំណាងរាស្រ្តអាមេរិក ដែលបានមានប្រសាសន៍ថា លោក គ្រោងនឹងដឹកនាំគណៈប្រតិភូ​ទៅកោះតៃវ៉ាន់នៅនិទាឃ​រដូវនេះ ៕

http://ព័ត៌មានសភាអន្តរជាតិ ១៤-០២-២៣-ផាត់ ត្រដែត ប្រែសម្រួលពី៖ https://www.taipeitimes.com/News/front/archives/2023/02/13/2003794251