លោកស្រី Valentina Ivanovna Matviyenko ប្រធានក្រុមប្រឹក្សាសហព័ន្ធ(សភាជាន់ខ្ពស់សហព័ន្ធរុស្ស៊ី)

កាលពីថ្ងៃអាទិត្យ ទី០៥ ខែកុម្ភៈ ឆ្នាំ២០២៣ លោកស្រី Valentina Ivanovna Matviyenko ប្រធានក្រុមប្រឹក្សាសហព័ន្ធ (សភាជាន់ខ្ពស់សហព័ន្ធរុស្ស៊ី) បានអំពាវនាវដល់​សមាជិកសភាអឺរ៉ុបថ្កោលទោសជាសាធារណៈចំពោះការដុតគម្ពីរគូអាន(គម្ពីរសាសនាឥស្លាម)។ នៅក្នុងសារដែលបង្ហោះនៅលើ បណ្តាញទំនាក់ទំនងសង្គមតេឡេក្រាម លោកស្រី  Matviyenko  បានថ្លែងថា សមាជិកសភាសហព័ន្ធរុស្ស៊ី បានសម្តែងនូវការជំទាស់យ៉ាងខ្លាំងក្លា ចំពោះសកម្មភាពបង្ហាញការស្អប់ខ្ពើមសាសនាអ៊ីស្លាមនាពេលថ្មីៗ នេះ នៅក្នុងព្រះរាជាណាចក្រស៊ុយអែត និងព្រះរាជាណាចក្រហូឡង់។

លោកស្រី Matviyenko បានថ្លែងថា “គាំទ្រពេញទំហឹងចំពោះសហសេវិក និងចាត់ទុកការប្រមាថ មាក់ងាយគម្ពីរគូអាន ដែលប្រព្រឹត្តឡើងដោយក្រុមអច្ចន្តិកជន (ជនរ៉ាឌីកាល់) គឺជាសកម្មភាពនៃអនារ្យ ធម៌(អំពើយង់ឃ្នង) និងការស្អប់ខ្ពើមជនបរទេស”។ លោកស្រី Matviyenko បានថ្លែងបន្ថែមថា រុស្ស៊ីគឺជា “ប្រទេសមួយដែលមាន​លក្ខណៈពិសេសប្លែកពីគេដែលប្រជាជនមានសញ្ជាតិ និងជំនឿសាសនាផ្សេងៗគ្នាបានរួមរស់ជាមួយគ្នាដោយសុខសន្តិភាព និងគោរពគ្នាទៅវិញទៅមកជាច្រើន​សតវត្សរ៍​មកហើយ”។

លោកស្រី Matviyenko បានសង្កត់ធ្ងន់ថា “ការរំលោភបំពានលើគម្ពីរគូអាន ធ្វើឱ្យមានភាពតក់ស្លុតមិនត្រឹមតែទៅលើសាសនិកឥស្លាមទេ ប៉ុន្តែក៏ទៅលើតំណាងនៃជំនឿ​សាសនាទាំងអស់នៅក្នុងប្រទេស      រុស្ស៊ីផងដែរ”។ កង្វះខាតនៃប្រតិកម្មតបក្នុងនាមរដ្ឋាភិបាល និងសភាពីបណ្តារដ្ឋអឺរ៉ុបបានបង្កឱ្យមានកំហឹងក្រេវក្រោធ ជាពិសេសភាព​ខ្ចីខ្ជា​របស់ភ្នាក់ងារអនុវត្តន៍ច្បាប់ និងអាជ្ញាធរមូលដ្ឋាន។ “យើងចាត់ទុកអ្វីដែលបានកើតមានឡើងគឺជាការញុះញង់អុចអាលឱ្យមានជម្លោះអន្តរសាសនា។ វាជាការមិនអាច​ទទួល​យកបានឡើយក្នុងការបង្ករឿងដោយការប្រមាថប្រឆាំងនឹងសាសនាឥស្លាម ដោយផ្តល់ហេតុផលដោយឥតអៀនខ្មាស ថាវាជាសេរីភាពនៃការបញ្ចេញមតិ និងសេរីភាពនៃ​ការ​និយាយស្តី”។

សមាជិកសភាជាន់ខ្ពស់រុស្ស៊ី បានអំពាវនាវឱ្យសមាជិកសភាអឺរ៉ុបថ្កោលទោសជាសាធារណៈចំពោះ សកម្មភាពរ៉ាឌីកាល់ជ្រុលនិយម ដើម្បីជាការបង្ហាញនូវភាពមិនអត់​ឱនឱ្យ​បានចំពោះសាសនា និងចាត់វិធានការការពារសិទ្ធិសាសនាឥស្លាម និងតំណាងសាសនាដទៃទៀតចំពោះសេរីភាពនៃជំនឿសាសនា ក៏ដូចជា នាំយកជនបង្ករឿងទាំងនោះទៅ​ទទួល​ខុសត្រូវចំពោះមុខច្បាប់៕

http://ព័ត៌មានសភាទ្វីបអឺរ៉ុប ០៦-០២-២៣- ឈាវ សុផាត ប្រែសម្រួលពី៖ https://www.aa.com.tr/en/world/russian-lawmakers-call-on-european-parliaments-to-publicly-condemn-quran-burning/2806056