លោកSteve Scalise ប្រធានក្រុមសមាជិកសភាសំឡេងភាគច្រើន របស់សភាតំណាងសហរដ្ឋអាមេរិក បានឱ្យដឹងកាលពីថ្ងៃសុក្រ ទី៣ ខែកុម្ភៈ ឆ្នាំ២០២៣ ថា សភាតំណាង​សហរដ្ឋអាមេរិក គ្រោងនឹងបោះឆ្នោតនៅសប្តាហ៍ក្រោយលើសេចក្តីស្នើច្បាប់មួយ ដើម្បីលុបចោលបញ្ញត្តិដែលតម្រូវឱ្យជនបរទេសភាគ ច្រើនត្រូវមានភស្តុតាងបញ្ជាក់ថា​បាន​ចាក់វ៉ាក់សាំងបង្ការជំងឺកូវីដ-១៩ នៅពេលធ្វើដំណើរតាមផ្លូវអាកាសចូលសហរដ្ឋអាមេរិក។

គូសបញ្ជាក់ថា កាលពីខែមិថុនា ឆ្នាំ២០២២ រដ្ឋបាលលោកប្រធានាធិបតីBiden បានទម្លាក់ចោលការតម្រូវឱ្យអ្នកដំណើរតាមផ្លូវអាកាសមកដល់សហរដ្ឋអាមេរិក នូវ​លទ្ធផលតេស្តអវិជ្ជមានកូវីដ-១៩ ប៉ុន្តែមិនទាន់បានទម្លាក់ចូលឡើយ នូវតម្រូវការឱ្យចាក់វ៉ាក់សាំងបង្ការជំងឺកូវីដ-១៩ មុនមកដល់សហរដ្ឋអាមេរិក ពីព្រោះនេះ ជាការ​អនុលោម​តាមអនុសាសន៍របស់មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក(CDC)។

យោងតាមច្បាប់បច្ចុប្បន្ន អ្នកដំណើរពេញវ័យដែលមិនមែនជាជនជាតិអាមេរិក ឬមិនមែនអ្នករស់ នៅអចិន្រ្តៃយ៍ក្នុងសហរដ្ឋអាមេរិក ត្រូវតែបង្ហាញភស្តុតាងថា ខ្លួនពិត​ជាបានចាក់វ៉ាក់សាំងបង្ការជំងឺកូវីដ-១៩ នៅមុនពេលឡើងយន្តហោះធ្វើដំណើរមកកាន់សហរដ្ឋអាមេរិក លើកលែងតែករណីមួយចំនួន។

លោកThomas Massie សមាជិកសភាតំណាងសហរដ្ឋអាមេរិក មកពីគណបក្សសាធារណរដ្ឋ ដែល ជាម្ចាស់សេចក្តីស្នើច្បាប់ខាងលើ បានថ្លែងតាមTwitter ថា៖ ”អនុសាសន៍​របស់CDC ខាងលើនេះ មិនមានលក្ខណៈវិទ្យាសាស្រ្ត និងបានធ្វើឱ្យមនុស្សជាច្រើនឃ្លាតឆ្ងាយពីក្រុមគ្រួសាររបស់ពួកគេ អស់រយៈពេលយូរ យូរហួសហេតុ។”

CDC មិនទាន់បានបញ្ចេញយោបល់អ្វីឡើយ ពាក់ព័ន្ធនឹងសេចក្តីស្នើច្បាប់នេះ នៅថ្ងៃសុក្រ ទី៣ ខែកុម្ភៈ ឆ្នាំ២០២៣។ ប៉ុន្តែ សមាគមអ្នកដឹកជញ្ជូនអ្នកដំណើរ​សហរដ្ឋ​អាមេរិក បានថ្លែងនៅថ្ងៃព្រហស្បតិ៍ ទី២ ខែកុម្ភៈ ថា ៖ ខ្លួនបានគាំទ្រខ្លឹមសារសេចក្តីស្នើច្បាប់ខាងលើជាយូរមកហើយ ហើយក៏មើលមិនឃើញឡើយ នូវហេតុផលដែល​ត្រូវរង់ចាំរហូតដល់ខែឧសភា ឆ្នាំ២០២៣​ ដើម្បីឱ្យការតម្រូវខាងលើត្រូវអស់សុពលភាពតាមដំណើររបស់វា ជាពិសេសនៅពេលដែលចំនួនអ្នក​មកទស្សនាសហរដ្ឋ​អាមេរិក នឹងកើនឡើងយ៉ាងខ្លាំង នានិទាឃរដូវ និងរដូវក្តៅខាងមុខ…៕

http://ព័ត៌មានសភាទ្វីបអាមេរិក ០៥-០២-២៣- តូនីប្រែសម្រួលពី៖https://newsinfo.inquirer.net/1725274/us-house-plans-vote-to-end-foreign-air-traveler-covid-vaccine-mandate/amp