ទិដ្ឋភាពទូទៅ ក្នុងសម័យប្រជុំសភានៃសាធារណរដ្ឋប៊ុលហ្គារី

សភានៃសាធារណរដ្ឋប៊ុលហ្គារីនីតិកាលទី៤៨ បានបើកកិច្ចប្រជុំលើកចុងក្រោយរបស់ខ្លួនកាលពីថ្ងៃព្រហស្បតិ៍ ទី០២ ខែកុម្ភៈ ឆ្នាំ២០២៣។ ក្នុងពេលដែលលោក​ប្រធានា​ធិបតី Roumen Radev បាន ចេញក្រឹត្យមួយរំលាយសភា នៅមុនការបោះឆ្នោតជ្រើសតាំងសមាជិកសភាមុនកាលកំណត់ថ្ងៃទី០២ ខែមេសា ឆ្នាំ២០២៣។ សភា​ប៊ុលហ្គារី​នីតិកាលមួយនេះ មានអាយុកាលខ្លី នៅចំពេលនៃការបោះឆ្នោតមុន កាលកំណត់។ សភាមួយនេះបានអនុម័តសេចក្តីព្រាងច្បាប់បានចំនួន ៥៣។

ជាការកត់សម្គាល់ក្នុងនោះក៏រួមមាន ការធ្វើវិសោធនកម្មលើក្រមបោះឆ្នោតដែលទទួលបានការគាំទ្រពីគណបក្សជនសង្គមនិយមប៊ុលហ្គារី (BSP) គណបក្ស GERB-UDF និងគណបក្សចលនាដើម្បីសិទ្ធិ និងសេរីភាព (MRF) ដែលស្នើឱ្យមានការបោះឆ្នោតដោយប្រើសន្លឹកឆ្នោតឡើងវិញ។ សភានីតិកាលទី៤៨ ក៏បានបោះឆ្នោតតម្រូវឱ្យរដ្ឋាភិបាល​ចាំផ្ទះត្រូវផ្តល់អាវុធដល់អ៊ុយក្រែន ប៉ុន្តែគណបក្សគាំទ្ររុស្ស៊ី គឺគណ បក្ស  Vuzrazhdane  និងគណបក្ស BSP  បានប្តឹងទាស់ទៅតុលាធម្មនុញ្ញ។ បន្ទាប់ពីមានក្រឹត្យរំលាយ​សភា និងកំណត់កាលបរិច្ឆេទបោះឆ្នោតថ្មីរបស់លោកប្រធានាធិបតីមក គណៈកម្មការកណ្តាលរៀបចំការបោះឆ្នោតប៊ុលហ្គារីបានប្រកាសកែប្រែចំនួន​សមាជិកសភាមកពីមណ្ឌល​បោះឆ្នោតនានា។

ការកែប្រែទាំងនេះ បានធ្វើឡើងក្រោយពីលទ្ធផលនៃការធ្វើជំរឿនថ្នាក់ជាតិដែលធ្វើឡើងកាលពី ខែកញ្ញា ឆ្នាំ២០២១។ រដ្ឋធានីសូហ្វ៊ីយ៉ា នឹងត្រូវបោះឆ្នោតបន្ថែមសមាជិក​សភា ៤រូបទៀត។ ទីក្រុង Plovdiv និងទីក្រុង Varna នឹងបន្ថែមសមាជិកសភា ១រូបដូចគ្នា។ ផ្ទុយទៅវិញ​ទីក្រុង Dobrich Lovech Montana Pazardzhik Pleven និងទីក្រុង Rousse នឹងត្រូវបោះឆ្នោតសមាជិកសភាតិចជាងមុន ១រូប។ លោក​ប្រធានាធិបតី Radev ក៏បានប្រកាសរដ្ឋាភិបាលចាំផ្ទះមួយផងដែរ បើទោះបីជាលោកបានកែប្រែសមាជិក រដ្ឋាភិបាលដែលចូលកាន់តំណែងកាលពីថ្ងៃទី០២ ខែសីហា ឆ្នាំ២០២២ តែ ១រូបប៉ុណ្ណោះ គឺលោក Naiden Todorov ដែលជាអ្នកដឹកនាំការប្រគំភ្លេង ជារដ្ឋមន្រ្តីក្រសួង​វប្បធម៌​ក៏ដោយ។ គួរបញ្ជាក់ផងដែរថា នេះគឺជាលើកទី៥ហើយ ដែលលោក Roumen Radev ប្រធានាធិបតីប៊ុលហ្គារីបានតែងតាំងរដ្ឋាភិបាលចាំផ្ទះមួយ ចាប់តាំងពីលោក​បាន​ជាប់ឆ្នោតក្លាយជាប្រមុខរដ្ឋប៊ុលហ្គារី កាលពីខែមករា​ ឆ្នាំ២០១៧មក៕

http://ព័ត៌មានសភាអន្តរជាតិ ០៣-០២-២៣- ឈាវ សុផាត ប្រែសម្រួលពី៖ https://sofiaglobe.com/2023/02/02/bulgarias-parliament-holds-final-sitting-ahead-of-april-early-elections/