លោក Oleksii Reznikovរដ្ឋមន្ត្រីក្រសួងការពារជាតិអ៊ុយក្រែន

គណៈកម្មាធិការសន្តិសុខ ការពារជាតិ និងស៊ើបការណ៍នៃរដ្ឋសភាអ៊ុយក្រែន បានច្រានចោលលទ្ធភាពនៃការបញ្ចប់មុខតំណែងលោក Oleksii Reznikov រដ្ឋមន្ត្រីក្រសួងការពារ​ជាតិអ៊ុយក្រែន។ សមាជិកគណៈកម្មាធិការនេះ រួមមាន លោកស្រី Solomiya Bobrovska សមាជិការដ្ឋសភា និងលោក Yehor Cherniev សមាជិករដ្ឋសភា បានថ្លែងប្រាប់ទី​ភ្នាក់ងារសារព័ត៌មានរដ្ឋអ៊ុយក្រែន Ukrainian News Agency អំពីព័ត៌មាននេះ។

លោកស្រី Bobrovska បានរាយការណ៍ថា បញ្ហានេះ មិនទាន់បានលើកយកមកពិនិត្យពិភាក្សាក្នុង​គណៈកម្មាធិការនៅឡើយ ហើយក៏គ្មានផងដែរបញ្ហាបែបនេះក្នុង​របៀប​វារៈនៃកិច្ចប្រជុំខាងមុខ។ នៅពេលថ្មីៗនេះ ប្រព័ន្ធផ្សព្វផ្សាយព័ត៌មានដ៏ធំមួយនេះ បានរាយការណ៍ថា លោក Reznikov អាចនឹងផ្លាស់ពីរដ្ឋមន្ត្រីក្រសួងការពារជាតិ ទៅរដ្ឋមន្ត្រី​ក្រសួងយុត្តិធម៌។

លើសពីនេះទៀត លោក Oleksii Honcharenko សមាជិកសភាមកពីគណបក្សសាមគ្គីអឺរ៉ុប បានបញ្ជាក់នៅលើបណ្តាញទំនាក់ទំនងសង្គមតេឡេក្រាមរបស់លោកថា មានការប្រជុំពិភាក្សាយ៉ាងសកម្មថា លោក Reznikov អាចនឹងដឹកនាំក្រសួងយុត្តិធម៌ ជំនួសក្រសួងការពារជាតិ។

ទីភ្នាក់ងារសារព័ត៌មានរដ្ឋអ៊ុយក្រែន Ukrainian News Agency បានរាយការណ៍នៅពេលថ្មីៗនេះថា   គណៈកម្មាធិការជាតិទប់ស្កាត់អំពើពុករលួយ (National Agency on Corruption Prevention, NACP) បានស្នើឱ្យតុលាការទទួលខុសត្រូវផ្នែករដ្ឋបាលលើលោក Bohdan Khmelnytskyi អតីតប្រធាននាយកដ្ឋានគ្រប់គ្រងគ្រឿង​បរិក្ខារ​សឹករដ្ឋ និងការផ្គត់ផ្គង់ធនធានសម្ភារៈ នៃក្រសួងការពារជាតិ។ ខុទ្ទកាល័យរដ្ឋមន្ត្រីក្រសួងការពារជាតិ បានបញ្ចប់មុខតំណែងលោក Viyacheslav Shapovalov អនុរដ្ឋមន្ត្រី​ក្រសួងការពារជាតិ ដែលទទួលបន្ទុកលើការផ្គត់ផ្គង់កងទ័ពអ៊ុយក្រែននៅសមរភូមិក្រោយ៕

http://ព័ត៌មានសភាទ្វីបអាស៊ី ០៣-០២-២៣-កែវ ធាវី ប្រែសម្រួលពី៖ https://ukranews.com/en/news/912336-rada-relevant-committee-denies-rumors-about-reznikov-s-dismissal