លោក Vyacheslav Volodin ប្រធានសភាឌូម៉ា (សភាជាន់ទាបសហព័ន្ធរុស្ស៊ី)

ទីភ្នាក់ងារសារព័ត៌មាន Trend បានរាយការណ៍ដោយយោងតាមប្រភពពីប្រព័ន្ធផ្សព្វផ្សាយរបស់  តួកម៉េនីស្ថានថា លោក Vyacheslav Volodin ប្រធានសភាឌូម៉ានៃ​សហព័ន្ធ​រុស្ស៊ីបានថ្លែងនៅក្នុងសភាប្រទេសតួកម៉េនីស្ថានក្នុងអំឡុងពេលលោកបំពេញទស្សនកិច្ចនៅក្នុងរដ្ឋធានីអាហ្គាបាតកាលពីថ្ងៃអាទិត្យ ទី២៩ ដល់ថ្ងៃចន្ទ ទី៣០ ខែមករា ឆ្នាំ២០២៣ថា ចំណងទាក់ទងរវាងតួកម៉េនីស្ថាន និងសហព័ន្ធរុស្ស៊ីគឺជាលក្ខណៈជាយុទ្ធសាស្រ្តមួយផ្អែកលើគោលការណ៍សមធម៌។

លោក Volodin បា​នកត់សម្គាល់ថា នៅពេលបច្ចុប្បន្ននេះចំណងទាក់ទងរវាងសហព័ន្ធរុស្ស៊ី និងប្រទេសតួកម៉េនីស្ថានគឺជាលក្ខណៈជាយុទ្ធសាស្រ្តមួយផ្អែកលើ​គោលការណ៍​ធម៌ ភាពជាអ្នកជិតខាងល្អ និងគោរពគ្នា។ លោក Volodin ក៏បានថ្លែងបន្ថែមផងដែរថា ប្រទេសទាំងពីរបានឆ្លងកាត់ស្ថានភាពលំបាកលំបិនជាមួយគ្នារាប់មិនអស់។ បើតាមលោកប្រធានសភាឌូម៉ារូបនេះ​បានឱ្យដឹងថា ការអភិវឌ្ឍកិច្ចសហ ប្រតិបត្តិការជាផលប្រយោជន៍ទៅវិញទៅមកជាមួយតួកម៉េនីស្ថាន  គឺជាអាទិភាពមួយរបស់រុស្ស៊ី។

គណៈប្រតិភូសភាឌូម៉ា ដឹកនាំដោយលោក Vyacheslav Volodin បានអញ្ជើញទៅបំពេញទស្សនកិច្ចជាផ្លូវការនៅក្នុងរដ្ឋធានីអាហ្គាបាត ប្រទេសតួកម៉េនីស្ថាន។ នេះគឺជា​ដំណើរទស្សនកិច្ចជាលើកទី១របស់គណៈប្រតិភូសភាឌូម៉ាដែលដឹកនាំដោយប្រធានសភាទៅកាន់ប្រទេសតួកម៉េនីស្ថាន ក្នុងរយៈពេល ១១ឆ្នាំកន្លងមកនេះ។ ជាផ្នែកមួយនៃ​ដំណើរទស្សនកិច្ច គណៈប្រតិភូសភាឌូម៉ាសហព័ន្ធរុស្ស៊ី បានជួប ពិភាក្សាការងារនៅក្នុងសភាតួកម៉េនីស្ថាន។ សមាជិកសភានៃប្រទេសទាំងពីរបានពិភាក្សាគ្នាពីទម្រង់ថ្មី នៃ​កិច្ចសហប្រតិបត្តិការអន្តរសភា ដើម្បីអភិវឌ្ឍន៍ចំណងទាក់ទងទ្វេភាគី។ ទន្ទឹមក្នុងពេលជាមួយគ្នា គណៈប្រតិភូសហព័ន្ធរុស្ស៊ីដឹកនាំដោយលោកនាយករដ្ឋមន្រ្តី Mikhail Mishustin ក៏បានទស្សនកិច្ចក្នុងប្រទេសតួកម៉េនីស្ថានកាលពីសប្តាហ៍មុនផងដែរ ជាពិសេស បន្ទាប់ពីទស្សនកិច្ចនោះមក មានឯកសារមួយចំនួន ធំត្រូវបានចុះហត្ថលេខា។

ប្រទេសតួកម៉េនីស្ថាន និងសហព័ន្ធរុស្ស៊ីបានបង្កើតចំណងទាក់ទងនឹងគ្នានៅក្នុងឆ្នាំ១៩៩២ បច្ចុប្បន្ននេះប្រទេសទាំងពីរកំពុងពុះពារ​អភិវឌ្ឍន៍កិច្ចសហប្រតិបត្តិការ​គ្រប់ជ្រុងជ្រោយ ដោយសឱ្យឃើញតាម​រយៈដំណើរទស្សនកិច្ចកម្រិតខ្ពស់ទៅវិញទៅមកឥតឈប់ឈរ៕

http://ព័ត៌មានសភាទ្វីបអឺរ៉ុប ០១-០២-២៣- ឈាវ សុផាត ប្រែសម្រួលពី៖ https://menafn.com/1105498593/Development-Of-Mutually-Beneficial-Co-Op-With-Turkmenistan-One-Of-Russias-Priorities