សម័យប្រជុំរបស់សភាអ៊ីរ៉ង់

កាលពីថ្ងៃសៅរ៍ ទី២៨ ខែមករា ឆ្នាំ២០២៣ សមាជិកសភាជាន់ខ្ពស់នៃសាធារណរដ្ឋឥស្លាមអ៊ីរ៉ង់ម្នាក់ បានមានប្រសាសន៍ថា សភារបស់ប្រទេសនេះបានព្រាងផែនការ​សម្រាប់ការសងសឹកតាម “វិធីដ៏អាក្រក់បំផុត” ប្រឆាំងនឹងសកម្មភាព “ជ្រៀតជ្រែកចូលក្នុងកិច្ចការផ្ទៃក្នុង” របស់សហភាពអឺរ៉ុប (EU)។ លោក Vahid Jalalzadeh ប្រធាន​គណៈកម្មាធិការសន្តិសុខជាតិ និងគោលនយោបាយការបរទេសរបស់សភាអ៊ីរ៉ង់បានធ្វើការកត់សម្គាល់នេះនៅក្នុងបទសម្ភាសន៍ជាមួយទីភ្នាក់ងារព័ត៌មានផ្លូវការ IRNA។

លោក Jalalzadeh បានមានប្រសាសន៍បន្តថា ផែនការនេះមានគោលបំណងដាក់ទណ្ឌកម្មលើកង កម្លាំងប្រដាប់អាវុធនៃរដ្ឋមួយចំនួនរបស់សហភាពអឺរ៉ុប ដែលជាវិធានការ tit-for-tat សម្រាប់សកម្មភាព “ជាអ្នកអន្តរាគមន៍និយម” របស់ពួកគេ។ លោក Jalalzadeh បានមានប្រសាសន៍បន្ថែមថា ការរៀបចំផែនការ នេះ ទទួលបានសន្ទុះកាន់តែខ្លាំង បន្ទាប់ពីមានសកម្មភាព “ដែលប្រឆាំង និងជ្រៀតជ្រែកចូលក្នុងកិច្ចការផ្ទៃក្នុង” របស់អឺរ៉ុប ក្នុងអំឡុងពេល “កុបកម្ម” នាពេលថ្មីៗនេះ នៅក្នុងប្រទេសអ៊ីរ៉ង់ និងការអនុម័ត​របស់ សភា អឺរ៉ុបលើសេចក្តីសម្រេចដែលអំពាវនាវឱ្យដាក់ឈ្មោះអង្គភាពឆ្មាំបដិវត្តន៍ឥស្លាមអ៊ីរ៉ង់ (IRGC) ជា “អង្គការ ភេរវករ”។ លោក Jalalzade​ បាន​សង្កត់​ធ្ងន់​ថា ផែនការ​នេះ​ត្រៀម​នឹង​ដាក់ជូនសភា​ពិនិត្យ​ និងផ្តល់យោល់ ក្នុង​អំឡុង​ពេល​បើក​សម័យ​ប្រជុំរបស់​សភា​អ៊ីរ៉ង់។

លោក Jalalzadeh បានព្រមានអឺរ៉ុបប្រឆាំងនឹងការបន្ត “ការជ្រៀតជ្រែកចូលក្នុងកិច្ចការផ្ទៃក្នុងដោយ មិនសមហេតុផល” ដោយបានមានប្រសាសន៍ថា សភាអ៊ីរ៉ង់កំពុងតាម​ដានយ៉ាងដិតដល់នូវសកម្មភាពរបស់ ក្រុមប្រឹក្សាសហភាពអឺរ៉ុប។ លោក​បាន​បន្ថែមទៀត​ថា ប្រសិនបើ​ក្រុមប្រឹក្សា​ផ្តល់​ការ​ទាមទារ​របស់​ក្រុម​អ្នក​ រឹងរូស សភា​អ៊ីរ៉ង់​នឹង​អនុម័ត​ផែនការ​សងសឹក​ភ្លាមៗ។ កាលពីថ្ងៃទី១៩ ខែមករា សភាអឺរ៉ុបបានអនុម័តសេចក្តីសម្រេចមួយដោយអំពាវនាវឱ្យអឺរ៉ុបចាត់ទុក IRGC ជា “ក្រុមភេរវករ” ៕

http://ព័ត៌មានសភាអន្តរជាតិ ៣០-០១-២៣-ផាត់ ត្រដែត ប្រែសម្រួលពី៖ https://english.news.cn/20230129/7f3c0d82204b4a96b0ad388db346159e/c.html