លោក Farouk Bouasker ប្រធានអាជ្ញាធរជាន់ខ្ពស់ឯករាជ្យរៀបចំការបោះឆ្នោតទុយនីស៊ី(ISIE)

រដ្ឋធានីទុយនីស៖ អាជ្ញាធរជាន់ខ្ពស់ឯករាជ្យរៀបចំការបោះឆ្នោតនៃសាធារណរដ្ឋទុយនីស៊ី (ISIE) បានថ្លែងថា នាថ្ងៃអាទិត្យ ទី២៩ ខែមករា ឆ្នាំ២០២៣ ប្រជាជន​ទុយនីស៊ី​បានចាប់ផ្តើមបោះឆ្នោតជ្រើសតាំងសមាជិកសភាជុំទី២ របស់ខ្លួន។ មណ្ឌលបោះឆ្នោតសរុបចំនួន ៤,២២២មណ្ឌល និងស្ថានីយបោះឆ្នោតចំនួន ១០,០១២ស្ថានីយបោះឆ្នោត បានបើកដំណើរការជូនអ្នកបោះឆ្នោត នៅវេលាម៉ោង ៨៖០០នាទីព្រឹក ម៉ោងក្នុងប្រទេសទុយនីស៊ី ត្រូវនឹងម៉ោងសកល ០៧:០០ GMT ជាមួយនឹងវិធានការសន្តិសុខ​យ៉ាង​តឹងរ៉ឹង ហើយដំណើរការបោះឆ្នោតបានធ្វើឡើងរហូតដល់ម៉ោង ៦៖០០នាទីល្ងាច​ ម៉ោងក្នុងស្រុក ត្រូវនឹងម៉ោងសកល ១៧:00 GMT។

​លោក Farouk Bouasker ប្រធានអាជ្ញាធរជាន់ខ្ពស់ឯករាជ្យរៀបចំការបោះឆ្នោតទុយនីស៊ី (ISIE) បានថ្លែងនៅឯសន្និសីទសារព័ត៌មានមួយដែរធ្វើឡើងនៅក្នុងរដ្ឋធានីទុយនីស​នៃ​​ប្រទេសទុយនីស៊ី កាលពី អធ្រាត្រថ្ងៃសៅរ៍ ទី២៨ ខែមករា ឆ្នាំ២០២៣ថា “ចំនួនបេក្ខជនសរុបដែលឈរឈ្មោះក្នុងការបោះឆ្នោត ជ្រើសតាំងសមាជិកសភាជុំទី២ បាន​ឈានដល់ចំនួន ២៦២រូប ដែលក្នុងនោះរួមមាន បេក្ខភាពជាស្ត្រីចំនួន ​៣៤រូប”។ ការប្រកាសលទ្ធផលបឋមនៃការបោះឆ្នោតជុំទី២ នឹងត្រូវធ្វើឡើងមិនឱ្យហួសពីថ្ងៃទី០១ ខែកុម្ភៈ ឆ្នាំ២០២៣ ហើយលទ្ធផលផ្លូវការ បន្ទាប់ពីបញ្ចប់ការតវ៉ា នឹងត្រូវប្រកាសចេញនៅមុនថ្ងៃទី០៤ ខែមីនា ឆ្នាំ២០២៣។ នេះបើតាមប្រសាសន៍របស់លោក Farouk Bouasker បានថ្លែងឱ្យដឹងនៅក្នុងសន្និសីទខាងលើ។

គួរបញ្ជាក់ផងដែរថា ការបោះឆ្នោតជ្រើសតាំងសមាជិកសភាទុយនីស៊ីជុំទី១ បានធ្វើឡើងកាលពីថ្ងៃទី១៧ ខែធ្នូ ឆ្នាំ២០២៣ បានរកឃើញអត្រាអ្នកចេញទៅបោះឆ្នោតមាន​ចំនួនទាបត្រឹមតែ ១១.១២%ប៉ុណ្ណោះ ហើយមានតែបេក្ខជនចំនួន ២៣រូប៉ុណ្ណោះដែលទទួលបានអាស​នៈនៅក្នុងសភានីតិកាលថ្មី។ គួររំលឹកផងដែរថា លោក Kais Saied ប្រធានាធិបតីទុយនីស៊ីបានប្រកាសកាលពីថ្ងៃទី៣០ ខែមីនា ឆ្នាំ ២០២២ ពីការរំលាយសភាតំណាងប្រជាជន ដែលជាសភាទុយនីស៊ី៕

http://ព័ត៌មានសភាអន្តរជាតិ ៣០-០១-២៣- ឈាវ សុផាត ប្រែសម្រួលពី៖ https://english.news.cn/20230129/1f0e6faead2c4ce1a883c01681b95ef4/c.html