សាធារណរដ្ឋសៀរ៉ាឡេអូន បានបង្កើតឱ្យមានច្បាប់ថ្មីមួយ កំណត់ឱ្យសភារបស់ខ្លួន ត្រូវមានសមាជិ- កា យ៉ាងតិច៣០% នៃសមាជិកសភាសរុប។ ច្បាប់ថ្មីនេះ ក៏បានកំណត់​ចំនួនកូតាស្រ្តីយ៉ាងតិច៣០% ផងដែរ សម្រាប់ស្ថាប័នផ្សេងៗទៀត ដែលក្នុងនោះរួមមាន ស្ថាប័នរដ្ឋាភិបាល ក្រុមប្រឹក្សាមូលដ្ឋាន មន្រ្តីការទូត និងមន្រ្តីសេវាស៊ីវិល។ ច្បាប់ថ្មី​នេះ មានឈ្មោះថាច្បាប់ស្តីពីសមភាពយេនឌ័រ និងការផ្តល់អំណាចដល់ស្រ្តី(The Gender Equality and Women’s Empowerment Act)។ សេចក្តីព្រាងច្បាប់នេះ ត្រូវបាន​ចុះហត្ថលេខា ឱ្យក្លាយជាច្បាប់ ដោយលោកប្រធានាធិបតីJulius Maada Bio កាលពីថ្ងៃទី១៩ ខែមករា ឆ្នាំ២០២៣ នៅមុនប៉ុន្មានខែនៃការបោះឆ្នោតសកល ដែលគ្រោង​ប្រព្រឹត្តិទៅក្នុង ខែកក្កដា​ ឆ្នាំ២០២៣។

ច្បាប់ថ្មីនេះ គូសបញ្ជាក់អំពីសារៈសំខាន់នៃចរន្តផ្តល់តម្លៃខ្ពស់ចំពោះទស្សនវិស័យយេឌ័រ និង​ការចូលរួមរបស់ស្រ្តីក្នុងតួនាទីនៃការធ្វើការសម្រេចចិត្ត ក្នុងគ្រប់វិស័យ។ ច្បាប់ថ្មីនេះ បានកំណត់ឱ្យការងារក្នុងវិស័យឯកជនទាំងអស់ មានត្រូវស្រ្តីចំនួន៣០%យ៉ាងតិច (សម្រាប់ក្រុមហ៊ុន ដែលមាននិយោជិតពី២៥នាក់ឡើងទៅ) ហើយការ​សម្រាកលំហែមាតុភាព ត្រូវបង្កើនពី១២ទៅ១៤សប្តាហ៍។

សភានៃប្រទេសសៀរ៉ាឡេអូន បច្ចុប្បន្ន មានសមាជិកាសភាចំនួន១២.៣៣% និងជាប់លេខ១៥៧ នៅក្នុងតារាងចំណាត់ថ្នាក់សមាជិកាសភា ប្រចាំខែធ្នូ ឆ្នាំ២០២២ របស់សហភាពអន្តរសភា។ ភាគរយនេះ គឺនៅទាបជាមធ្យមភាគសកល ដែលស្មើនឹង២៦.៤%។

អស់រយៈពេលជាច្រើនទសវត្សរ៍មកហើយ ដែលសហភាពអន្តរសភា បានធ្វើការតាមដានជាប្រចាំអំពីសមភាពយេនឌ័រ និងលើកកម្ពស់ចំនួនសមាជិកាសភា ពីព្រោះ​សហភាពអន្តរសភា មានជំនឿថា សភា ដែលមានបរិយាប័ន្ននិងភាពជាតំណាង គឺមានសារៈសំខាន់សម្រាប់ភាពរឹងមាំនៃលទ្ធិប្រជាធិបតេយ្យ។ កិច្ចការរបស់សហភាព​អន្តរសភា ផ្នែកសមភាពយេនឌ័រ គឺផ្តោតលើកម្មវត្ថុសំខាន់ចំនួន៣ គឺ៖ (១)ការបង្កើនចំនួនសមាជិកាក្នុងសភា តាមរយៈការរៀបចំឱ្យមានកូតា និងក្រុមសមាជិកសភា (២)ការគាំទ្រស្រ្តីនៅក្នុងសភា និង(៣)ការប្រែក្លាយសភាប្រទេសនានា ទៅជាស្ថាប័នដែលយកចិត្តទុកដាក់ខ្ពស់ចំពោះយេនឌ័រ និងសិទ្ធិរបស់ស្រ្តី។

សហភាពអន្តរសភា និងសភាប្រទេសសៀរ៉ាឡេអូន បានសហការគ្នាតាំងពីឆ្នាំ២០១៤ លើបញ្ហាយេ នឌ័រ ពាក់ព័ន្ធអំពើហិង្សាលើស្រ្តី និងការលុបបំបាត់ការកាត់ស្បែក​ចុង​​ប្រដាប់បន្តពូជស្រ្តី(Female genital mutilation)៕

http://ព័ត៌មានសភាអន្តរជាតិ ២៩-០១-២៣- តូនី ប្រែសម្រួលពី៖ https://www.ipu.org/news/news-in-brief/2023-01/sierra-leone-opens-door-more-women-in-parliament