លោក Kishida Fumio នាយករដ្ឋមន្ត្រីជប៉ុនប្រឈមនឹងសំណួរជាច្រើន​ ក្នុងសភាអំពីសុន្ទរកថាស្តីពី គោលនយោបាយរបស់ខ្លួន

កាលពីថ្ងៃព្រហស្បតិ៍ ទី២៦ ខែមករា ឆ្នាំ២០២៣ លោក Kishida Fumio នាយករដ្ឋមន្ត្រីជប៉ុន បានប្រឈមនឹងសំណួរជាច្រើនរបស់សមាជិកសភាក្នុងសភាជាន់ខ្ពស់ អំពី​សុន្ទរកថាស្តីពី គោល នយោបាយ ដែលលោកបានថ្លែងក្នុងសប្តាហ៍នេះ។ កាលពីថ្ងៃពុធ ទី២៥ ខែមករា ឆ្នាំ២០២៣        លោក Izumi Kenta ប្រធានគណបក្សប្រឆាំង​ធំ​ជាងគេ គឺគណបក្សប្រជាធិបតេយ្យរដ្ឋធម្មនុញ្ញ បានរិះគន់ ក្នុងសភាជាន់ទាប អំពីផែនការបង្កើនចំណូលពន្ធរបស់លោក Kishida​ សម្រាប់យកទៅបង្កើនការចំណាយ​លើ​វិស័យការពារជាតិ។

លោក Izumi បានថ្លែងថា លោក Kishida គួរតែដាក់ឱ្យបោះឆ្នោតអនុម័ត ដើម្បីស្វែងរកការយល់ព្រមជាសាធារណៈលើបញ្ហានេះ។​ លោក Kishida បានថ្លែងថា ក្នុងនាម​លោកជានាយករដ្ឋមន្ត្រី លោកជាអ្នកសម្រេចលើបញ្ហានេះ ហើយលោកនឹងពិនិត្យឱ្យបានល្អិតល្អន់បំផុត។

លោក Kishida ក៏បានប្រឈមផងដែរ នឹងសំណួរជាច្រើនទៀតក្នុងសភាជាន់ទាប កាលពីរសៀលថ្ងៃព្រហស្បតិ៍ ទី២៦ ខែមករា ឆ្នាំ២០២៣​។ សមាជិកសភាជាច្រើនរូប មកពីក្រុមគណបក្សកាន់អំណាច ត្រូវបានគេរំពឹងថា នឹងទទូចឱ្យលោក Kishida ពន្យល់អំពីការកែសម្រួលគោលនយោបាយសន្តិសុខជាតិ ដែលរួមមាន សេចក្តីសម្រេចស្តីពី សមត្ថភាពវាយបក និងតម្រូវការសម្រាប់បង្កើនថវិកាជាតិ។ ក្រុមសមាជិកសភាទាំងនោះ បានចោទសួរលោក Kishida អំពីវិធីដែលលោកគ្រោងអនុវត្តន៍គោលនយោបាយ​របស់ខ្លួនលើទិដ្ឋភាពផ្សេងៗ ដើម្បីបង្កើនអត្រាកំណើតក្នុងប្រទេស និងអំពីវិធី ដែលលោក គ្រោងនឹងជួយដល់ក្រុមធុរកិច្ចខ្នាតតូច និងមធ្យម ដែលបានរងផលប៉ះពាល់ដោយ​សារតម្លៃពលកម្មប្រចាំខែឡើងខ្ពស់។

គណបក្សប្រឆាំងនេះ គ្រោងជំទាស់ការបង្កើនចំណូលពន្ធ ដែលសម្រាប់យកទៅបង្កើនការចំណាយលើវិស័យការពារជាតិ និងការចោទសួររាជរដ្ឋាភិបាល អំពីការរំលង​ការ​ពិនិត្យពិភាក្សារបស់សភា ក្នុងការធ្វើការសម្រេចចិត្តនេះ។ គណបក្សប្រឆាំងនឹងស្នើឱ្យមានវិធានការជាក់លាក់ដើម្បីដំឡើងប្រាក់ខែឱ្យបានកាន់តែច្រើនថែមទៀត ហើយក៏​នឹងចោទសួរផងដែរ អំពីផែនការរបស់រាជរដ្ឋាភិបាលលើការប្រើប្រាស់ថាមពលនុយក្លេអ៊ែរជាអតិបរមា៕

http://ព័ត៌មានសភាទ្វីបអាស៊ី ២៧-០១-២៣-កែវ ធាវី ប្រែសម្រួលពី៖ https://www3.nhk.or.jp/nhkworld/en/news/20230126_15/