រូបភាពក្នុងសម័យប្រជុំសភានៃព្រះរាជាណាចក្រម៉ារ៉ុក

កាលពីថ្ងៃចន្ទ ទី២៣ ខែមករា ឆ្នាំ២០២៣ សមាជិកសភានៃព្រះរាជាណាចក្រម៉ារ៉ុក បានបោះឆ្នោតជាឯកច្ឆន្ទដើម្បីពិនិត្យមើលឡើងវិញពីចំណងទាក់ទងជាមួយសភាអឺរ៉ុប ដោយបានចោទប្រកាន់ថាបានជ្រៀតជ្រែកចូលកិច្ចការផ្ទៃក្នុងរបស់ខ្លួន បន្ទាប់ពីសភាអឺរ៉ុបបានចេញសេចក្តីសម្រេចមួយទទូចឱ្យម៉ារ៉ុកគោរពដល់សេរីភាពសារព័ត៌មាន។ សមាជិកសភាម៉ារ៉ុកនៃសភាទាំងពីរថ្នាក់បានចូលប្រជុំក្នុងសម័យប្រជុំរួមមួយ ដើម្បីឆ្លើយតបទៅនឹងសេចក្តីសម្រេចរបស់សភាអឺរ៉ុប​ដែលបានអនុម័តកាលពីថ្ងៃ​ព្រហស្បតិ៍​សប្តាហ៍មុន។

នៅក្នុងសេចក្តីថ្លែងការណ៍មួយ ក្រោយបញ្ចប់សម័យប្រជុំ សមាជិកសភាម៉ារ៉ុកបានហៅ សេចក្តីសម្រេចរបស់សភាអឺរ៉ុបថាជា “ការវាយប្រហារមិនអាចទទួលយកបាន​មក​លើ​អធិបតេយ្យភាព សេចក្តីថ្លៃថ្នូរ និងឯករាជ្យភាពនៃស្ថាប័នយុត្តិធម៌នៅក្នុងប្រទេសរបស់ខ្លួន”។ សេចក្តីសម្រេចមួយនេះ បានប៉ះពាល់យ៉ាងធ្ងន់ធ្ងរដល់ទំនុក​ចិត្តជាមូល​ដ្ឋានរវាងស្ថាប័នទាំងពីរ។ ដូច្នឹងសភាម៉ារ៉ុកបានសម្រេចពិនិត្យពិចារណាមើលឡើងវិញពីចំណងទាក់ទងរបស់ខ្លួនជាមួយសភាអឺរ៉ុប និងពិនិត្យវាយតម្លៃជារួម។ នេះបើតាម​សេចក្តីថ្លែងការណ៍ដែលចេញដោយលោក  Rachid  Talbi Alami  ប្រធានសភាតំណាងម៉ារ៉ុក  ប៉ុន្តែលោកមិនបានថ្លែងបញ្ជាក់លម្អិតនោះឡើយ។​

គួរបញ្ជាក់ផងដែរថា ​ក្រោមកិច្ចព្រមព្រៀងឆ្នាំ១៩៩៦ ម៉ារ៉ុក និងសហភាពអឺរ៉ុបបានភ្ជាប់ចំណងទាក់ ទងសេដ្ឋកិច្ច​ និងពាណិជ្ជកម្មយ៉ាងស្អិតរមួត ជាពិសេសក្នុងវិស័យ​កសិកម្ម និងនេសាទ។ សមាជិកសភាអឺរ៉ុប នៅក្នុងទីក្រុងស្រ្តាសបួរ បានទទូចឱ្យប្រទេសម៉ារ៉ុក “គោរពសេរីភាពនៃការបញ្ចេញមតិ និងសេរីភាពសារព័ត៌ មាន ហើយត្រូវធានា​នូវ​ការ​កាត់ក្តីដោយយុត្តិធម៌សម្រាប់អ្នកសារព័ត៌មានដែលកំពុងតែជាប់ឃុំ”។

អ្នកសារព័ត៌មានម៉ារ៉ុក ២រូប ដែលជាអ្នកសារព័ត៌មានលេចធ្លោជាងគេ គឺលោក​ Omar Radi ​និងលោក Soulaimane Raissouni ត្រូវបានផ្តន្ទាទោសនៅឯតុលាការ​ឧទ្ធរណ៍​កាលពីឆ្នាំ២០២២ ក្នុងបទចោទរំលោភបំពានផ្លូវភេទ។ លោក Radi វ័យ ៣៦ឆ្នាំ ដែលតែងតែរិះគន់អាជ្ញាធរម៉ារ៉ុក ត្រូវទទួលការផ្តន្ទាទោសដាក់ពន្ធនា​គារ ៦ឆ្នាំ ចំពោះបទ​ចោទចាប់រំលោភ និងធ្វើចារកម្ម ប៉ុន្តែលោកបានបដិសេធ។ ឯលោក Raissouni ត្រូវផ្តន្ទាទោស ៥ឆ្នាំ ប៉ុន្តែលោកថាខ្លួនគ្មានទោសពៃទេ ហើយលោកត្រូវកាត់ទោសដោយសារតែ​ការបញ្ចេញមតិប៉ុណ្ណោះ។

កាលពីសប្តាហ៍មុន សមាជិកសភាអឺរ៉ុបក៏បានថ្លែងផងដែរថា ពួកគេមានការព្រួយបារម្ភយ៉ាងជ្រាលជ្រៅ ដោយបានចោទប្រកាន់ថា អាជ្ញាធរប្រទេសម៉ារ៉ុកបានសូកប៉ាន់​ដល់​សមាជិក​សភាអឺរ៉ុប និងអះអាងជាថ្មីថា សភាអឺរ៉ុបប្តេជ្ញា“ស៊ើបអង្កេតយ៉ាងពេញលេញ” ចំពោះអំពើសូកប៉ាន់ទាំងនេះ៕

http://ព័ត៌មានសភាអន្តរជាតិ ២៥-០១-២៣- ឈាវ សុផាត ប្រែសម្រួលពី៖ https://www.urdupoint.com/en/miscellaneous/morocco-votes-to-review-ties-with-european-pa-1630340.html