លោក Recep Tayyip Erdogan ប្រធានាធិបតីនៃសាធារណរដ្ឋតួកគី

លោក Recep Tayyip Erdogan ប្រធានាធិបតីនៃសាធារណរដ្ឋតួកគីបានប្រកាសថា ថ្ងៃទី១៤ ខែឧសភា​ ឆ្នាំ២០២៣ ជាកាលបរិច្ឆេទសម្រាប់ការបោះឆ្នោតសភានីតិកាលថ្មី និងការបោះឆ្នោតប្រធានា ធិបតី។ លោក Erdogan ដែលមានផែនការស្វែងរកការជាប់ឆ្នោតជាថ្មីនោះ បានប្រកាសបែបនេះនៅក្នុង​សន្និសីទយុវជន​មួយដែលធ្វើឡើងខេត្ត Bursa ស្ថិតនៅភាគខាងជើងប្រទេស ដែលវីដេអូស្តីពីពិធីមួយនេះត្រូវបានផ្សព្វផ្សាយកាលពីថ្ងៃអាទិត្យ ទី២២ ខែមករា ឆ្នាំ២០២៣ កន្លងមក។

​លោក Erdogan បានថ្លែងនៅក្នុងខេត្ត Bursa នោះថា លោកនឹងប្រកាសជាផ្លូវការនៅថ្ងៃទី១០​ ខែមីនា ឆ្នាំ២០២៣ បន្ទាប់ពីឧត្តមក្រុមប្រឹក្សារៀបចំការបោះឆ្នោតតួកគី​បានរៀបចំរួចរាល់សម្រាប់ការបោះឆ្នោត។ ប្រសិនបើមិនមានបេក្ខជនរូបណា អាចទទួលបានសំឡេងឆ្នោតលើសពី ៥០% នោះការបោះឆ្នោតជុំទី២នឹងត្រូវធ្វើឡើងនៅ​ថ្ងៃទី២៨​​ ខែឧសភា ឆ្នាំ២០២៣។ លោក Erdogan ដែលកាន់តំណែងតាំងពីឆ្នាំ២០០៣មក ដំបូងឡើយជានាយករដ្ឋមន្រ្តី និងជាប្រធានាធិបតីចាប់ពីឆ្នាំ២០១៤មកនោះ នឹងប្រឈមនឹងការបោះឆ្នោតដ៏លំបាកបំផុតមួយ ក្នុងគ្រាដែលសេដ្ឋកិច្ចតួកគីកំពុងតែពុះពារជាមួយនឹងការកើនយ៉ាងគំហុកនៃអតិផរណា។

លោក Erdogan វ័យ៦៨ឆ្នាំ បានដាក់ចេញនូវប្រព័ន្ធអភិបាលកិច្ចថ្មីមួយក្នុងឆ្នាំ២០១៨​ ដែលបាន លុបចោលការិយាល័យនាយករដ្ឋមន្រ្តី និងប្រមូលផ្តុំអំណាចភាគច្រើនបំផុត​មកក្នុងដៃប្រធានាធិបតី។ កាលពីពេលមុន ការិយាល័យប្រធានាធិបតី គ្រាន់តែជាតំណែងពិធីការតែប៉ុណ្ណោះ។  ក្រោមប្រព័ន្ធថ្មី ការបោះឆ្នោតសភា  និងការបោះឆ្នោតប្រធានា​ធិបតី ត្រូវបានធ្វើឡើងក្នុងថ្ងៃតែមួយ។ ​ គណបក្សប្រឆាំងបានបន្ទោសការធ្លាក់ចុះសេដ្ឋកិច្ច សិទ្ធិ និងសេរីភាពប្រជាជនលើទៅលោក Erdogan ព្រោះថា ប្រព័ន្ធថ្មីនេះបាន​ប្រមូល​ផ្តុំអំណាចមកលើមនុស្សតែម្នាក់។ ប្រព័ន្ធប្រធានាធិបតីនិយម ត្រូវបានអនុម័តយ៉ាងប្រផិតប្រផើយនៅក្នុងការបោះឆ្នោតធ្វើប្រជាមតិមួយក្នុងឆ្នាំ២០១៧។

ដើមឡើយការបោះឆ្នោតក្នុងឆ្នាំ២០២៣នេះ គ្រោងនឹងធ្វើឡើងនៅក្នុងខែមិថុនា ប៉ុន្តែសមាជិកគណបក្សកាន់អំណាចបានថ្លែងថា ខែនោះជារដូវក្តៅ និងជាថ្ងៃបុណ្យសាសនា ញ៉ាំងឱ្យកាលបរិច្ឆេទនៃ ការបោះឆ្នោតជ្រើសតាំងសមាជិកសភា និងប្រធានាធិបតីតួកគីធ្វើឡើងលឿនជាងមុនកាលកំណត់៕

http://ព័ត៌មានសភាអន្តរជាតិ ២៤-០១-២៣- ឈាវ សុផាត ប្រែសម្រួលពី៖ https://www.middle-east-online.com/en/turkish-elections-be-held-may-14