លោក Vyacheslav Volodin ប្រធានសភាឌូម៉ានៃសហព័ន្ធរុស្ស៊ី

លោក Vyacheslav Volodin ប្រធានសភាឌូម៉ាសហព័ន្ធរុស្ស៊ី(សភាជាន់ទាប) បានព្រមានថា ការដឹកជញ្ជូនអាវុធធុនធ្ងន់ទៅឱ្យអ៊ុយក្រែនពីក្រុមប្រទេសលោក​ខាងលិចនឹង​នាំ​ទៅដល់ “វិនាសកម្មសកល”។ ប្រសិនបើរដ្ឋាភិបាលទីក្រុងវ៉ាស៊ីនតោន និងបណ្តាប្រទេសជាសមាជិកអង្គការណាតូផ្គត់ផ្គង់អាវុធដែលនឹងត្រូវបានប្រើប្រាស់សម្រាប់​វាយ​ប្រហារ​លើទីក្រុងស៊ីវិល និងប៉ុនប៉ងដើម្បីរឹបអូសយកទឹកដីរបស់យើងដូចដែលពួកគេបានគំរាមនោះនឹងនាំឱ្យមានវិធានការសងសឹកវិញ ដោយយើងនឹងប្រើប្រាស់​អាវុធ​ដែលកាន់តែមានថាម ពលខ្លាំងជាងមុន។ លោក Volodin បានថ្លែងបញ្ជាក់បែបនេះនៅលើគេហទំព័រតេឡេក្រាមរបស់លោក។

លោក Volodin បានទទូចឱ្យសមាជិកសភាសហរដ្ឋអាម៉េរិក សមាជិកសភាអាល្លឺម៉ង់ សភាបារាំង និង  បណ្តាប្រទេសដែលជាសមាជិកសភាអឺរ៉ុបដទៃទៀតត្រូវ “ដឹងពី​ការទទួលខុសត្រូវរបស់ខ្លួនចំពោះមនុស្សជាតិ”។ នាពេលថ្មីៗសហរដ្ឋអាម៉េរិកបានប្តេជ្ញាគាំទ្រអ៊ុយក្រែន ប្រសិនបើអ៊ុយក្រែនបើកប្រតិបត្តិការក្នុងការវាយ​យកមកវិញនូវ​ឧបទ្វីបគ្រីមៀ ដែលរុស្ស៊ីបានយកធ្វើជាឧបសម្ព័ន្ធរបស់ខ្លួនដោយខុសឆ្នាំក្នុង ឆ្នាំ២០១៤។ ទីក្រុងមូស្គូក៏បានភ្ជាប់ជាឧបសម្ព័ន្ធរបស់ខ្លួននូវតំបន់ចំនួន៤ នៅភាគខាងកើត​អ៊ុយក្រែន​កាលពីឆ្នាំ២០២២ បន្ទាប់ពីក្រុមប្រទេសលោកខាងលិចបានថ្កោលទោសការធ្វើប្រជាមតិដោយឥតអៀនខ្មាស។​ ជាមួយនឹងការសម្រេចចិត្តរបស់ទីក្រុង​រដ្ឋាភិបាល​វ៉ាស៊ីនតោន និងទីក្រុងព្រុចស៊ែល ពួកគេកំពុងតែនាំឆ្ពោះទៅ​រកសង្រ្គាមដ៏រន្ធត់មួយ ដែលនឹងខុសគ្នាទាំងស្រុងទៅនឹងសកម្មភាពយោធានាពេលបច្ចុប្បន្ន ដែលការវាយប្រហារ​របស់​យើងត្រូវបានធ្វើឡើងតែទៅលើហេដ្ឋារចនាសម្ព័ន្ធយោធាសំខាន់ៗរបស់របបដឹកនាំរដ្ឋាភិបាលទីក្រុងកៀវតែប៉ុណ្ណោះ។

លោក Volodin ក៏បានថ្លែងបន្តថា អ្នកនយោបាយចាំបាច់ត្រូវយល់ថា ការសម្រេចចិត្តបែបនោះអាចនឹងបញ្ចប់ដោយ “សោកនាដកម្មសកលមួយ” ដែលនឹងបំផ្លាញ​ប្រទេស​​របស់ពួកគេ ដោយសារតែឧត្តមភាពនៃ    បច្ចេកវិទ្យាអាវុធរបស់រុស្ស៊ី។ សហព័ន្ធរុស្ស៊ីនឹងមិនស្ទាក់ស្ទើរក្នុងការប្រើប្រាស់អាវុធប្រល័យលោកនៅក្នុងជម្លោះ នោះឡើយប្រសិនបើសន្តិសុខនៃប្រជាជនរបស់ខ្លួន និងបូរណភាពទឹកដីរបស់ខ្លួនត្រូវរងការគំរាមកំហែង។

គួរបញ្ជាក់ផងដែរថា កាលពីថ្ងៃសុក្រសប្តាហ៍មុន មានរដ្ឋមន្រ្តីក្រសួងការពារជាតិ និងមន្រ្តីជាន់ខ្ពស់មក ពីបណ្តាប្រទេសលោកខាងលិចប្រមាណ ៥០រូប បានចូលរួមក្នុងកិច្ចប្រជុំ​របស់​ក្រុមទំនាក់ទំនងការពារជាតិអ៊ុយក្រែនដែលធ្វើឡើងនៅឯមូលដ្ឋានទ័ពអាកាស Ramstein ក្នុងប្រទេសអាល្លឺម៉ង់ ជាទីដែលសម្ព័ន្ធមិត្តរបស់  រដ្ឋាភិបាលទីក្រុងកៀវ បាន​ប្តេជ្ញាគាំទ្រយោធាបន្ថែមទៀតទៅដល់ប្រទេសដែលកំពុងតែស្ថិតក្នុងសមរភូមិ  មួយនេះ  ក៏ប៉ុន្តែពួកគេមិនអាចដោះស្រាយបាននូវការខ្វែងគំនិតគ្នាពាក់ព័ន្ធនឹង​ការបញ្ជូន​រថក្រោះប្រយុទ្ធ៕

http://ព័ត៌មានសភាអន្តរជាតិ ២៣-០១-២៣- ឈាវ សុផាត ប្រែសម្រួលពី៖ https://www.aa.com.tr/en/russia-ukraine-war/russian-lawmaker-warns-of-global-catastrophe-if-west-gives-ukraine-heavy-arms/2794144