លោក Kim Jin-pyo (ឆ្វេង) ប្រធានរដ្ឋសភាកូរ៉េខាងត្បូង និងលោក Joko Widodo ប្រធានាធិបតីឥណ្ឌូណេស៊ី ថតរូបក្នុងអំឡុងពេលកិច្ចប្រជុំក្នុងរដ្ឋធានីហ្សាការតា នាថ្ងៃទី១៩ ខែមករា ឆ្នាំ២០២៣
រដ្ឋធានីសេអ៊ូល៖ លោក Kim Jin-pyo ប្រធានរដ្ឋសភានៃសាធារណរដ្ឋកូរ៉េ (កូរ៉េខាងត្បូង) បានបញ្ចប់ទស្សនកិច្ចនៅសាធារណរដ្ឋសង្គមនិយមវៀតណាម និងសាធារណរដ្ឋឥណ្ឌូណេស៊ី ខណៈដែល ប្រទេសកូរ៉េខាងត្បូងកំពុងស្វែងរកការគាំទ្រកិច្ចសហប្រតិបត្តិការលើវិស័យសេដ្ឋកិច្ច និងសន្តិសុខជាតិ ជាមួយប្រជាជាតិនៃតំបន់អាស៊ីអាគ្នេយ៍។ លោក Kim ក៏បានស្វែងរកការគាំទ្រពីវៀតណាមផងដែរ ក្នុងកិច្ចខិតខំប្រឹប្រែងធ្វើជាម្ចាស់ផ្ទះនៃការតាំងពិព័រណ៍ពាណិជ្ជកម្មពិភពលោក ២០៣០ (2030 World Expo) នៅទីក្រុងកំពង់ផែ Busan ភាគខាងត្បូងប្រទេសកូរ៉េខាងត្បូង។
ក្នុងអំឡុងពេលនៃការស្នាក់នៅក្នុងប្រទេសវៀតណាមនោះ លោក Kim បានជួបពិភាក្សាការងារជាមួយលោក Nguyen Xuan Phuc ប្រធានាធិបតីវៀតណាម, លោក Pham Minh Chinh នាយករដ្ឋមន្ត្រី និងសមភាគីរបស់លោក គឺលោក Vuong Dinh Hue ប្រធានរដ្ឋសភាវៀតណាម។ ក្នុងអំឡុងពេលនៃកិច្ចប្រជុំនោះ លោក Kim បានកោតសរសើរខួបលើកទី៣០ នៃចំណងការទូត រវាងប្រទេសទាំងពីរ និងបានអំពាវនាវឱ្យពង្រឹងចំណងទាក់ទង ក្រោមភាពជាដៃគូយុទ្ធសាស្ត្រគ្រប់ជ្រុងជ្រោយ ដែលត្រូវបានបង្កើតឡើងដោយថ្នាក់ដឹកនាំនៃប្រទេសទាំងពីរ កាលពីអំឡុងខែធ្នូ ឆ្នាំ២០២២។
ក្នុងអំឡុងពេលស្នាក់នៅក្នុងប្រទេសឥណ្ឌូណេស៊ី លោក Kim បានជួបពិភាក្សាការងារជាមួយលោក Joko Widodo ប្រធានាធិបតីឥណ្ឌូណេស៊ី និងបានពិភាក្សាអំពីការលើកកម្ពស់កិច្ចសហប្រតិបត្តិការទ្វេភាគីលើវិស័យផ្សេងៗ។ លោក Kim ក៏បានស្នើឱ្យឥណ្ឌូណេស៊ី គាំទ្រការវិនិយោគរបស់ក្រុមហ៊ុនកូរ៉េខាងត្បូងក្នុងប្រទេសឥណ្ឌូណេស៊ី ផងដែរ។
