លោក Nguyen Xuan Phuc ​ប្រធានាធិបតីវៀតណាម​ស្នើសុំលាលែងពីតំណែង

រដ្ឋធានីហាណូយ៖ រដ្ឋសភាប្រថាប់ត្រានៃសាធារណរដ្ឋសង្គមនិយមវៀតណាមបានអនុម័តការលាលែង តំណែងរបស់លោកប្រធានាធិបតី Nguyen Xuan Phuc។ ការអនុម័ត​នេះ​បានធ្វើឡើងតែមួយថ្ងៃ បន្ទាប់ពីលោកបានចុះចេញពីតំណែងដ៏គួរឱ្យភ្ញាក់ផ្អើល    ដែលជាផ្នែកមួយនៃយុទ្ធនាការប្រឆាំងអំពើពុករលួយ​។

ការចាកចេញពីតំណែងភ្លាមៗ និងមិនធ្លាប់មានពីមុនមករបស់លោក Phuc បានកើតមានឡើងក្នុងអំឡុងពេលនៃភាពចលាចលនយោបាយនៅក្នុងប្រទេសវៀតណាម ក្នុងការបោសសម្អាតប្រយុទ្ធប្រឆាំងនឹងអំពើពុករលួយ ដោយមានរដ្ឋមន្រ្តីជាច្រើនរូបត្រូវបានបណ្តេញចេញពីតំណែង។ ប្រព័ន្ធផ្សព្វផ្សាយរដ្ឋវៀតណាមបានរាយការណ៍ថា នៅ​ក្នុងសម័យប្រជុំវិសាមញ្ញនៃរដ្ឋសភា មានសមាជិករដ្ឋសភាជាង ៩៣% បានបោះឆ្នោត គាំទ្រការលាលែងពីតំណែងរបស់លោក Phuc។ អនុលោមតាមរដ្ឋធម្មនុញ្ញ​វៀតណាម ដោយសារមិនទាន់មានការតែងតាំងអ្នកស្នងតំណែងនៅឡើយ នោះលោកស្រី Vo Thi Anh Xuan ដែលជាអនុប្រធានាធិបតីក្នុងតំណែងបច្ចុប្បន្ន​នឹងក្លាយជា​ប្រធានា​ធិបតីស្តីទី​ដោយស្វ័យប្រវត្តិ។

របបផ្តាច់ការវៀតណាម គ្រប់គ្រងដោយបក្សកុម្មុយនិស្ត និងដឹកនាំជាផ្លូវការដោយអគ្គលេខាធិការបក្ស ដែលជាតំណែងដ៏មានអំណាចបំផុតនៅក្នុងបក្សប្រធានាធិបតី និងនាយករដ្ឋមន្ត្រី។ រាល់ការសម្រេចចិត្តសំខាន់ៗធ្វើឡើងដោយការិយាល័យនយោបាយ ដែលបច្ចុប្បន្នមានចំនួន ១៦រូប។  ការចាកចេញពីតំណែង  ភ្លាមៗរបស់លោក Phuc គឺជាសកម្មភាពមិនធម្មតាខ្លាំងបំផុតមួយនៅក្នុងប្រទេសវៀតណាម ព្រោះរាល់ការផ្លាស់ប្តូរនយោបាយ តាមធម្មតាគឺជាការរៀបចំយ៉ាងប្រយ័ត្នប្រយែងបំផុតដើម្បី​បង្ការស្ថិរ​ភាព​នយោបាយ។ ធ្លាប់ មានតែប្រមុខបក្សកុម្មុយនិស្ត​ ១រូបប៉ុណ្ណោះ ដែលបានចុះចេញពីតំណែង ដោយសារហេតុផលសុខភាព។

កាលពីថ្ងៃអង្គារ ដើមសប្តាហ៍​  បក្សកុម្មុយនិស្តវៀតណាមបានសម្រេចថា  ប្រធានាធិបតីវ័យ៦៨ឆ្នាំរូប នេះ ត្រូវទទួលខុសត្រូវចំពោះការប្រព្រឹត្តខុសរបស់រដ្ឋមន្រ្តីជាច្រើនរូប ដែលស្ថិតក្រោមបង្គាប់របស់លោកក្នុងឆ្នាំ២០១៦-២០២១ ក្នុងពេលលោកកាន់តំណែងជានាយករដ្ឋមន្រ្តី នៅមុនពេលលក្លាយជាប្រធានាធិបតី។ គួរបញ្ជាក់ផងដែរថា ឧបនាយករដ្ឋមន្រ្តីវៀតណាម ចំនួន២រូប គឺលោក Pham Binh Minh និងលោក Vu Duc Dam ត្រូវបានបណ្តេញចេញពីតំណែងនៅក្នុងខែមករា ឆ្នាំ២០២៣នេះ នៅក្នុង​ការបោសសម្អាតប្រឆាំងអំពើពុករលួយ ដែលឈានទៅដល់ការចាប់ខ្លួនមន្រ្តីជាច្រើនរូប ជាមួយនឹងការចោទប្រកាន់ប្រព្រឹត្តអំពើពុករលួយដែលជាផ្នែកមួយនៃការឆ្លើយតប​ជំងឺរាលដាលជាសកលកូវីដ-១៩ នៅក្នុងប្រទេសវៀតណាម៕

http://ព័ត៌មានសភាអន្តរជាតិ ១៩-០១-២៣- ឈាវ សុផាត ប្រែសម្រួលពី៖ https://mb.com.ph/2023/01/18/vietnam-parliament-approves-presidents-resignation/