លោក Kim Jin-pyo ប្រធានសភាកូរ៉េខាងត្បូង និងលោក Nguyen Phu Trong អគ្គលេខាធិការបក្សកុម្មុយនិស្តវៀតណាម

លោក Nguyen Phu Trong អគ្គលេខាធិការបក្សកុម្មុយនិស្តវៀតណាមបានកោតសរសើរចំពោះ វឌ្ឍនភាពនៃចំណងទាក់ទងរវាងវៀតណាម-កូរ៉េខាងត្បូង ក្នុងពេលដែល​លោក​ទទួលជួបលោក Kim Jin-pyo ប្រធានសភាកូរ៉េខាងត្បូង នៅក្នុងរដ្ឋធានីហាណូយ កាលពីថ្ងៃអង្គារ ទី១៧ ខែមករា ឆ្នាំ២០២៣។

ស្វាគមន៍ចំពោះដំណើរទស្សនកិច្ចផ្លូវការរបស់លោក Kim បន្ទាប់ពីប្រទេសទាំងពីរបានលើកកម្ពស់ ចំណងទាក់ទងរបស់ខ្លួនឈានទៅភាពជាដៃ​គូយុទ្ធសាស្រ្តគ្រប់ជ្រុង​ជ្រោយ មេដឹកនាំដែលជាម្ចាស់ផ្ទះរូបនេះបានថ្លែងថា ចំណងទាក់ទងទ្វេភាគីបានអភិវឌ្ឍន៍ឈានឡើងដោយផ្អែកលើទំនាក់ទំនងយូរអង្វែង ផលប្រយោជន៍រួម ពង្រឹងភាពរឹងមាំ និងសមិទ្ធផលជាង ៣០ឆ្នាំ ចាប់តាំងពីចំណងទាក់ទងរវាងប្រទេសទាំងពីរត្រូវបានបង្កើតឡើង។ លោកបានផ្តល់អនុសាសន៍ឱ្យប្រទេស​ទាំងពីរថែរក្សាកិច្ចសម្របសម្រួល​ជិតស្និទ្ធ ដើម្បីធ្វើឱ្យកិច្ចសហប្រតិបត្តិការកាន់តែមានសារៈសំខាន់ និងប្រសិទ្ធភាព ដោយផ្តោតលើការបង្កើនទស្សនកិច្ចកម្រិតខ្ពស់ទៅវិញទៅមក និងកិច្ចប្រជុំផ្សេងៗ ដើម្បី​ពង្រឹងការយោគយល់គ្នាទៅវិញទៅមក ពិភាក្សាលើគោលនយោបាយសំខាន់ៗ និងការតម្រង់ទិសសម្រាប់ចំណងទាក់ទងរវាងប្រទេសទាំងពីរ។

លោក Trong បានថ្លែងបន្ថែមថា ពាក់ព័ន្ធនឹងការទូតសភា សភានៃប្រទេសទាំងពីរគួរតែផ្តោតលើលទ្ធផលនៃកិច្ចសហប្រតិបត្តិការ និងចែករំលែកបទពិសោធនីតិកម្ម ដើម្បីបង្កើតនូវលក្ខខណ្ឌអំណោយផលសម្រាប់សហគ្រាស និងប្រជាជនវៀតណាម-កូរ៉េ និងប្រជាជននៅក្នុងប្រទេសរៀងៗខ្លួន។ លោក Trong បានសម្តែងនូវជំនឿថា ដំណើរទស្សនកិច្ចរបស់លោក Kim នឹងរួមចំណែកយ៉ាងធំធេងសម្រាប់ភាពជាដៃគូយុទ្ធសាស្រ្តគ្រប់ជ្រុងជ្រោយ។

សម្រាប់ភាគីកូរ៉េខាងត្បូង លោក Kim បានឯកភាពចំពោះទស្សនៈរបស់ភាគីម្ចាស់ផ្ទះពាក់ព័ន្ធនឹង ការពង្រឹងចំណងទាក់ទងទ្វេភាគី ដោយបានបង្ហាញនូវក្តីសោមនស្សចំពោះការ​អភិវឌ្ឍយ៉ាងឆាប់រហ័សនៃ ចំណងទាក់ទងរវាងវៀតណាម-កូរ៉េខាងត្បូង ជាពិសេស ចំពោះការឈានដល់កម្រិតភាពជាដៃគូយុទ្ធសាស្រ្តគ្រប់ជ្រុងជ្រោយ។ លោក Kim បាន​អះអាង​​ថា កូរ៉េខាងត្បូងបានផ្តល់ភាពសំខាន់ចំពោះជំហររបស់វៀត- ណាមក្នុងយុទ្ធសាស្រ្ត និងគំនិតផ្តួចផ្តើមថ្មីរបស់ខ្លួន ឆ្ពោះទៅក្នុងតំបន់ រួមទាំង គំនិតផ្តួចផ្តើមសាមគ្គីភាព កូរ៉េខាងត្បូង-អាស៊ាន។ លោកប្រធានសភាកូរ៉េខាងត្បូងរូបនេះ បានប្តេជ្ញាបន្តធ្វើពលិកម្មដើម្បីធ្វើឱ្យចំណង ទាក់ទងរវាងប្រទេសទាំងពីរកាន់តែរីកចម្រើនឈាន​ឡើងឥត​ឈប់ឈរយ៉ាងខ្លាំងក្លា និងកាន់តែមានប្រសិទ្ធភាពនៅក្នុងរយៈពេល ៣០ឆ្នាំ បន្ទាប់៕

http://ព័ត៌មានសភាអន្តរជាតិ ១៨-០១-២៣- ឈាវ សុផាត ប្រែសម្រួលពី៖ https://en.vietnamplus.vn/party-leader-receives-visiting-speaker-of-rok-parliament/247199.vnp