លោក Choe Won-gi ក្នុង​អំឡុងពេលផ្តល់បទ​សម្ភាស​​ជូនដល់​ទីភ្នាក់ងារ​ព័ត៌មាន​វៀតណាម

បញ្ញវន្តមួយរូបបាននិយាយថា ដំណើរទស្សនកិច្ចជាផ្លូវការនៅសាធារណរដ្ឋសង្គមនិយមវៀតណាម ដែលកំពុងប្រព្រឹត្តទៅពីសំណាក់លោក Kim Jin-pyo ប្រធានរដ្ឋសភានៃ​សាធារណរដ្ឋកូរ៉េ (កូរ៉េខាងត្បូង) ត្រូវបានគេ រំពឹងថានឹងបង្កើតកម្លាំងចលករសម្រាប់ប្រទេសទាំងពីរក្នុងការបំពេញគោលដៅរួម។ ដំណើរទស្សនកិច្ចពីថ្ងៃទី១២ ដល់ថ្ងៃទី១៨ ខែមករា ឆ្នាំ២០២៣នេះ ធ្វើឡើងតបតាមការអញ្ជើញរបស់លោក Vuong Dinh Hue ប្រធានរដ្ឋសភាវៀតណាម។

នេះគឺជាដំណើរទស្សនកិច្ចលើកដំបូងមកកាន់ប្រទេសវៀតណាមរបស់លោក Kim ចាប់តាំងពីលោក បានឡើងកាន់តំណែងកាលពីខែកក្កដា ឆ្នាំ២០២២ ហើយក៏ជាដំណើរ​ទស្សនកិច្ចលើកទីមួយដែររបស់ថ្នាក់ ដឹកនាំជាន់ខ្ពស់កូរ៉េខាងត្បូង ចាប់តាំងពីប្រទេសទាំងពីរបានធ្វើឱ្យប្រសើរឡើងនូវទំនាក់ទំនងរបស់ពួកគេ ទៅជាដៃគូយុទ្ធសាស្ត្រ គ្រប់ជ្រុង​ជ្រោយកាលពីខែធ្នូ ឆ្នាំ២០២២។ ក្នុង​បទ​សម្ភាស​ដែល​ផ្តល់​ជូន​ទីភ្នាក់ ងារ ​ព័ត៌មាន​វៀតណាម លោក Dr.Choe Won-gi ប្រធានមជ្ឈមណ្ឌលសម្រាប់ការសិក្សា​អាស៊ាន-​ឥណ្ឌា​នៅបណ្ឌិតសភាការទូតជាតិកូរ៉េ (KNDA) បាននិយាយថា ចំណុចសំខាន់នៃដំណើរទស្សនកិច្ចនេះ គឺការចូល រួមរបស់លោក Kim នៅក្នុងពិធីបើកវិទ្យាស្ថានវិទ្យាសាស្ត្រ និងបច្ចេកវិទ្យាវៀតណាម-កូរ៉េ (VKIST) ដែល គ្រោងនឹងធ្វើឡើងនៅថ្ងៃ ទី១៧ ខែមករា។ ទាក់ទិននឹងទស្សនវិស័យកិច្ចសហប្រតិបត្តិការ លោក Choe បានឱ្យដឹងថា ទំនាក់ទំនងទ្វេភាគីកូរ៉េខាងត្បូង-វៀតណាម បានបោះជំហានទៅមុខយ៉ាងលេចធ្លោចាប់តាំងពីការបង្កើតទំនាក់ទំនងការទូតក្នុងឆ្នាំ១៩៩២ ជាពិសេស លើវិស័យសេដ្ឋកិច្ច ហើយវាជាពេលវេលាសម្រាប់ប្រទេសទាំងពីរដើម្បីលើកកម្ពស់ទំនាក់ទំនងនេះ។

លោក Choe បានមានប្រសាសន៍បន្តថា វៀតណាម និងកូរ៉េខាងត្បូងបានចែករំលែកផលប្រយោជន៍ មិនត្រឹមតែក្នុងវិស័យសេដ្ឋកិច្ចប៉ុណ្ណោះទេ ថែមទាំងលើវិស័យការទូត និងសន្តិសុខ ព្រមទាំងបានអួតអំពីទំនាក់ទំនងវប្បធម៌ជិតស្និទ្ធផងដែរ ដោយលោកបានសង្កត់ធ្ងន់ថា កិច្ចសហប្រតិបត្តិការជាយុទ្ធសាស្ត្រគួរត្រូវបានពង្រឹងតាម​រយៈទំនាក់ទំនង​រវាងប្រជាជន និងប្រជាជន ព្រមទាំងវប្បធម៌។ លោក Choe បានសង្កត់ ធ្ងន់ថា ក្នុងចំណោមប្រទេសសមាជិកអាស៊ាន វៀតណាមគឺជាដៃគូដ៏គួរឱ្យទុកចិត្តបំផុត និងសំខាន់​របស់​កូរ៉េខាងត្បូង ៕

http://ព័ត៌មានសភាអន្តរជាតិ ១៧-០១-២៣-ផាត់ ត្រដែត ប្រែសម្រួលពី៖ https://en.vietnamplus.vn/top-korean-legislators-visit-to-create-impetus-for-common-goals-scholar/247055.vnp