ប្រធានរដ្ឋសភាកូរ៉េខាងត្បូង គ្រោងធ្វើទស្សនកិច្ចនៅវៀតណាម​ និងឥណ្ឌូណេស៊ី

រដ្ឋធានីសេអ៊ូល៖  លោក Kim Jin-pyo ប្រធានរដ្ឋសភានៃសាធារណរដ្ឋកូរ៉េ (កូរ៉េខាងត្បូង) គ្រោង ធ្វើដំណើរទស្សនកិច្ចទៅកាន់សាធារណរដ្ឋសង្គមនិយមវៀតណាម និង​សាធារណរដ្ឋឥណ្ឌូណេស៊ី នៅថ្ងៃព្រហស្បតិ៍ ទី១៩ ខែមករា ឆ្នាំ២០២៣ ខាងមុខ ដើម្បីពិភាក្សាអំពី ការពង្រីកកិច្ចសហប្រតិបត្តិការ លើវិស័យសេដ្ឋកិច្ច និងសន្តិសុខ ជាមួយ​ប្រទេសទាំងអស់ នេះបើតាមការឱ្យដឹងពីខុទ្ទកាល័យរបស់លោក Kim។ លោក Kim គ្រោងធ្វើទស្សនកិច្ចជាលើកដំបូងនៅរដ្ឋធានីហាណូយ ដើម្បីជួបពិភាក្សាការងារ​ជាមួយ​លោក Nguyen Xuan Phuc ប្រធានាធិបតីវៀតណាម និងមន្ត្រីរដ្ឋាភិបាលជាន់ខ្ពស់ជាច្រើនរូបទៀត​​ រួមទាំងសមភាគីវៀតណាមរបស់លោកផងដែរ ដើម្បីពិភាក្សាអំពីការ​លើក​​​កម្ពស់ចំណងទាក់ទងទ្វេភាគី រវាងប្រទេសទាំងពីរនៅក្នុងវិស័យផ្សេងៗ ដែលមកពីផ្នែកហិរញ្ញវត្ថុ និងសំណង់​ឧស្សាហកម្មការពារជាតិ។

ខណៈពេលស្នាក់នៅក្នុងប្រទេសវៀតណាមនោះ លោក Kim ក៏គ្រោងចូលរួមប្រារព្ធពិធីបញ្ចប់ការសាងសង់វិទ្យាស្ថានវិទ្យាសាស្ត្រ និងបច្ចេកវិទ្យាកូរ៉េ-វៀតណាម និងបន្តជំរុញកិច្ចខិតខំប្រឹងប្រែងរបស់​ប្រទេសកូរ៉េខាងត្បូងសម្រាប់ពិព័រណ៍ពាណិជ្ជកម្មពិភពលោកឆ្នាំ២០៣០ (2030 World Expo)។

នៅថ្ងៃពុធ ទី១៨ ខែមករា ឆ្នាំ២០២៣ ខាងមុខនេះ លោក Kim នឹងធ្វើដំណើរទស្សនកិច្ចទៅកាន់រដ្ឋធានីហ្សាការតាដើម្បីជួបពិភាក្សាការងារជាមួយ​ថ្នាក់ដឹកនាំសភា​ឥណ្ឌូណេស៊ីមួយចំនួន និងពិភាក្សាអំពី ការលើកកម្ពស់កិច្ចសហប្រតិបត្តិការក្នុងការអភិវឌ្ឍធនធានមនុស្ស និងឧស្សាហកម្មអាវុធ។

លោក Kim ក៏គ្រោងចែករំលែកផងដែរនូវបទពិសោធន៍របស់ប្រទេសកូរ៉េខាងត្បូង ក្នុងការកសាងទីក្រុងស្វយ័តពិសេស Sejong ដែលមានចម្ងាយប្រមាណជា ១២០ គីឡូម៉ែត្រ​ ភាគខាងត្បូងរដ្ឋធានី​សេអ៊ូល ជាមួយរដ្ឋាភិបាលឥណ្ឌូណេស៊ី និងពិភាក្សាអំពី ការពង្រីកសកម្មភាពក្រុមហ៊ុនកូរ៉េក្នុងប្រទេសតំបន់អាស៊ីអាគ្នេយ៍មួយនេះ៕

http://ព័ត៌មានសភាអន្តរជាតិ ១៣-០១-២៣-កែវ ធាវី ប្រែសម្រួលពី៖ https://en.yna.co.kr/view/AEN20230112006000315