លោក Saysomphone Phomvihane (ស្តាំ) ក្នុងពិធីទទួលស្វាគមន៍លោក Pham Minh Chinh

លោក Pham Minh Chinh នាយករដ្ឋមន្ត្រីនៃសាធារណរដ្ឋសង្គមនិយមវៀតណាម និងលោក Saysomphone Phomvihane ប្រធានរដ្ឋសភានៃសាធារណរដ្ឋប្រជាធិបតេយ្យ​ប្រជាមានិតឡាវបានអះ អាងថា ជានិច្ចកាលការគោរព និងការផ្តល់អាទិភាពខ្ពស់បំផុត គឺជាការបង្រួបបង្រួម និងពង្រឹងទំនាក់ទំនង មិត្តភាព សាមគ្គីភាពពិសេស ព្រមទាំងកិច្ច​សហប្រតិបត្តិការលើគ្រប់វិស័យរវាងប្រទេសទាំងពីរ។

នៅក្នុងកិច្ចប្រជុំ នៅរដ្ឋធានីវៀងចន្ទន៍កាលពីថ្ងៃពុធ ទី១១ ខែមករា ឆ្នាំ២០២៣ ថ្នាក់ដឹកនាំទាំងពីរ បានសម្តែងនូវសេចក្តីរីករាយចំពោះការអភិវឌ្ឍនូវ​ទំនាក់ទំនងទ្វេភាគី​លើគ្រប់វិស័យ បើទោះបីជាមានជំងឺកូវីដ-១៩ក៏ដោយ  ជាពិសេស ស្ថាប័នបង្កើតច្បាប់របស់ពួកគេបានរក្សាការប្រជុំកម្រិតខ្ពស់ សិក្ខាសាលាតាម ប្រធានបទ ការចែករំលែក​បទពិសោធន៍ ព្រមទាំងការសម្របសម្រួល និងការគាំទ្រគ្នាទៅវិញទៅមកនៅលើ វេទិកាសភាអន្តរជាតិ និងតំបន់។ លោក Chinh ដែលកំពុងបំពេញទស្សនកិច្ចជាផ្លូវការ​នៅប្រទេសឡាវ បានកោតសរសើរចំពោះសមិទ្ធផលសំខាន់ៗ និងមានអត្ថន័យ ដែលបក្ស រដ្ឋ ប្រជាជនឡាវសម្រេចបានក្នុង ដំណើរការកសាង និងអភិវឌ្ឍន៍ប្រទេសជាតិ។ ថ្នាក់ដឹកនាំវៀតណាមបានវាយតម្លៃខ្ពស់ចំពោះលទ្ធផលនៃដំណើរទស្សនកិច្ចផ្លូវការរបស់លោក Saysomphone នៅក្នុងប្រទេសវៀតណាមកាលពីខែធ្នូ ឆ្នាំ២០២១ ក្នុងការ​រួមចំណែកពង្រឹងទំនាក់ទំនងដ៏រឹងមាំរវាងរដ្ឋសភាទាំងពីរ ព្រមទាំងជោគជ័យនៃឆ្នាំមិត្តភាព និងសាមគ្គី ភាពវៀតណាម-ឡាវ, ឡាវ-វៀតណាមឆ្នាំ២០២២។

ឆ្លៀតក្នុងឱកាសនោះ លោក Saysomphone បានសម្តែងនូវបំណងចង់រឹតពង្រឹងនូវកិច្ចសហប្រតិបត្តិការជិតស្និទ្ធរវាងស្ថាប័ននីតិប្បញ្ញត្តិទាំងពីរជានិច្ច រួមទាំងការ​សម្រប​សម្រួល​ប្រកបដោយប្រសិទ្ធភាព និងការអនុវត្តសកម្មភាពអធិការកិច្ចរួម ដើម្បីបម្រើឱ្យការអនុវត្តកាន់តែល្អប្រសើរនៃកិច្ចព្រមព្រៀងសហ ប្រតិបត្តិការកម្រិតខ្ពស់​របស់​ប្រទេសទាំងពីរ។ វាយតម្លៃខ្ពស់ចំពោះការគាំទ្រ និងជំនួយដ៏ធំធេងរបស់វៀត ណាមចំពោះឡាវនាពេលកន្លងមក រួមទាំងការសាងសង់វិមានរដ្ឋសភាឡាវផងដែរ លោក Saysomphone បានគូសបញ្ជាក់អំពីការគាំទ្ររបស់លោកចំពោះការលើកកម្ពស់ឥតឈប់ឈរ និងការធ្វើឱ្យកាន់តែស៊ីជម្រៅ នៃទំនាក់ទំនងមិត្តភាពដ៏អស្ចារ្យ សាមគ្គីភាព​ពិសេស និងកិច្ចសហប្រតិបត្តិការលើគ្រប់វិស័យរវាងប្រជាជាតិ ទាំងពីរ ៕

http://ព័ត៌មានសភាអន្តរជាតិ ១២-០១-២៣-ផាត់ ត្រដែត ប្រែសម្រួលពី៖ https://en.vietnamplus.vn/top-priority-given-to-consolidating-and-strengthening-vietnamlaos-ties-leaders/246887.vnp