លោក Jorge Rodriguez ប្រធានសភានៃសាធារណរដ្ឋវ៉េណេស៊ុយអេឡា

លោក Jorge Rodriguez ប្រធានសភានៃសាធារណរដ្ឋវ៉េណេស៊ុយអេឡា បានថ្លែងថា លោកនឹង ពិចារណាលើសំណើដែលស្នើឡើងដោយ​ក្រុមគណបក្សប្រឆាំង ដើម្បី​តែងតាំងក្រុមប្រឹក្សាភិបាលថ្មីមួយសម្រាប់ក្រុមប្រឹក្សាជាតិរៀបចំការបោះឆ្នោត (CNE) ជាមួយនឹងការសម្លឹងឆ្ពោះទៅរកការបោះឆ្នោតប្រធា នាធិបតីវ៉េណេស៊ុយអេឡា​ឆ្នាំ២០២៤។

លោក Rodriguez បានថ្លែងក្នុងសន្និសីទសារព័ត៌មានមួយនៅក្នុងសភាថា “ក្នុងកិច្ចពិភាក្សាដែលលោកប្រធានាធិបតី Nicolás Maduro បានធ្វើឡើងជាមួយគណបក្ស​ប្រឆាំងជាច្រើន…នៅក្នុងកិច្ចពិភាក្សា ទាំងនោះ មិនតិចដងនោះទេ គណបក្សទាំងនោះបានស្នើឱ្យបង្កើតក្រុមប្រឹក្សាភិបាល CNE ថ្មីមួយឡើង”។   លោក Rodriguez បានថ្លែង​បន្ថែមថា សភាវ៉េណេស៊ុយអេឡាដែលមានអំណាចរដ្ឋធម្មនុញ្ញដើម្បីតែងតាំងក្រុមប្រឹក្សាភិបាល CNE ថ្មីមួយនោះ បានចូលរួមជាមួយលោក Maduro  ក្នុងកិច្ចពិភាក្សា​ទាំងនោះ ហើយសភានឹងពិចារណាដោយ “ស្ងប់ស្ងាត់ និងយ៉ាងដិតដល់” នូវសំណើមួយនេះរបស់ក្រុមគណបក្សប្រឆាំង។

គួរបញ្ជាក់ផងដែរថា កាលពីខែឧសភា ឆ្នាំ២០២១ សភាវ៉េណេស៊ុយអេឡាដែលមានសំឡេងភាគច្រើនគាំទ្រលោកប្រធានាធិបតី Maduro នោះ បានតែងតាំងសមាជិក​ក្រុមប្រឹក្សា​ភិបាល CNE ថ្មីចំនួន ៥រូប សម្រាប់អាណត្តិ៧ឆ្នាំ ដែលក្នុងនោះ ៣រូប ជាសម្ព័ន្ធមិត្តរបស់គណបក្សកាន់អំណាច និង២រូបទៀត មកពីគណបក្សប្រឆាំង។ ការតែងតាំងនេះបាននាំឱ្យមានការបញ្ជូនបេសកកម្មសង្កេតការណ៍បោះឆ្នោតរបស់សហភាពអឺរ៉ុប(MOE-EU) ដើម្បីត្រួតពិនិត្យការបោះឆ្នោតតំបន់ និងថ្នាក់មូលដ្ឋាន ដែលបាន​ធ្វើឡើងនៅក្នុងឆ្នាំដដែលនោះ។ សម្រាប់ការបញ្ជូនក្រុមបេសកកម្មខាងលើរបស់ប្លុកអឺរ៉ុបទៅកាន់ប្រទេស  វ៉េណេស៊ុយអេឡាបែបនេះ គឺជាលើកទី១ ហើយក្នុងរយៈពេល ១៥ឆ្នាំមកនេះ។

ក្រោយការបោះឆ្នោតទាំងពីរខាងលើ ក្រុមបេកសកម្មសង្កេតការណ៍បោះឆ្នោតរបស់សហភាពអឺរ៉ុប (MOE-EU) បានផ្តល់អនុសាសន៍ឱ្យពង្រឹង “ការបែងចែកអំណាច និងភាព​ជឿទុកចិត្តបានលើឯករាជ្យភាពរបស់តុលាការកំពូលវ៉េណេស៊ុយអេឡា ក៏ដូចជា ពង្រឹងអំណាចដាក់ទណ្ឌកម្មរបស់ CNE តាមរយៈ ការដាក់ចេញនូវប្រព័ន្ធនៃការត្រួតពិនិត្យ  និងការដាក់ទណ្ឌកម្មមួយ”៕

http://ព័ត៌មានសភាអន្តរជាតិ ១១-០១-២៣- ឈាវ សុផាត ប្រែសម្រួលពី៖ https://www.laprensalatina.com/venezuelan-parliament-to-weigh-establishment-of-new-election-board/